ଲାଞ୍ଜିଗଡ଼,୦୬/୦୮: କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଳକ୍ କାଣ୍ଡାମା ଗାଁରେ ଅନ୍ଧବିଶ୍ବାସ । ଗୁଣି ଗାରେଡ଼ି ସନ୍ଦେହରେ ନିଖୋଜ ରଘୁ ପାତ୍ର(୬୦ ବର୍ଷ)ଙ୍କୁ ହତ୍ୟା କରାଯାଇଥିବା ଅଭିଯୋଗ । ଏହି ଘଟଣାରେ ବିଶ୍ୱନାଥପୁର ନାଥା ପୁଲିସ ଏକ ମାମଲା ରୁଜୁ କରି ୨ଜଣ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି ।
ସୂଚନା ଅନୁସାରେ, ବୃଦ୍ଧ ରଘୁ ପାତ୍ର ଜୁଲାଇ ୩୦ ତାରିଖରୁ କେଉଁ ଆଡ଼େ ନିଖୋଜ ହୋଇ ଯାଇଥିଲେ । ୫ ଦିନ ବିତି ଯାଇଥିଲେ ମଧ୍ୟ ତାଙ୍କର କୌଣସି ପତ୍ତା ମିଳିନଥିଲା। ଏନେଇ ପରିବାର ବାରମ୍ବାର ଥାନାରେ ଅଭିଯୋଗ କରିଥିଲେ । ଗଣମାଧ୍ୟମରେ ଖବର ପ୍ରକାଶ ପାଇବା ପରେ ସୋମବାର କେସିଙ୍ଗା ଏସଡିପିଓ ସନ୍ଦୀପ କୁମାର ମାଝୀଙ୍କ ନେତୃତ୍ବରେ ବିଶ୍ୱନାଥପୁର ଥାନା ଅଧିକାରୀ ତୁଳସୀରାମ ଶବର, ସନ୍ଧାନୀ କୁକୁର ଓ ସାଇଣ୍ଡିଫିକ୍ ଟିମ୍ ସହାୟତାରେ ତଦନ୍ତ କରିଥିଲା । ସନ୍ଧାନୀ କୁକୁର ଦୁଇ ସନ୍ଦିଗ୍ଧ ନରେଶ ଦୋରା ଓ ସୁଶାନ୍ତ ହରିଜନଙ୍କୁ ଚିହ୍ନଟ କରିଥିଲା । ଏହାପରେ ନରେଶକୁ ପଚରାଉଚୁରା କରିବାରୁ ବୃଦ୍ଧ ରଘୁଙ୍କୁ ସେମାନେ ହତ୍ୟା କରିଥିଲା ସ୍ବୀକାର କରିଛନ୍ତି । ହତ୍ୟା ପରେ ଏକ ବାଇକରେ ରାୟଗଡା ଜିଲ୍ଲା ଦହିଖାଲ ନିକଟରେ ରେଳ ଧାରଣାରେ ଫିଙ୍ଗି ଦେଇଥିଲେ ।
ଅଭିଯୁକ୍ତ ନରେଶର ବାପା ଦୁଃଶାସନଙ୍କ ମାସେ ତଳେ ମୃତ୍ୟୁ ଘଟିଥିଲା। ରଘୁ ତାଙ୍କୁ ଗୁଣି କରି ମାରିଥିବା ନରେଶର ପରିବାର ସନ୍ଦେହ କରୁଥିଲେ । ସେହି ରାଗରେ ବୃଦ୍ଧ ରଘୁଙ୍କୁ ଦୁଇଜଣ ମିଶି ହତ୍ୟା କରିଥିବା ସ୍ବୀକାର କରିଛନ୍ତି । ଦିନେ ସନ୍ଧ୍ୟାରେ ରଘୁ ନିକଟସ୍ଥ ବଣ୍ଡେଲ ଗାଁରୁ ଫେରୁଥିବା ବେଳେ ଏକ ନିଛାଟିଆ ସ୍ଥାନରେ ତାଙ୍କୁ ଦେଖି ଅତର୍କିତ ଆକ୍ରମଣ କରିଥିଲା। ହତ୍ୟା ପରେ ନିଜ ସହଯୋଗୀ ସହିତ ଶବକୁ ଗାଏବ୍ କରିଦେଇଥିଲା । ଅଭିଯୁକ୍ତଙ୍କ ସୂଚନା ଆଧାରରେ ମୃତଦେହ ଖୋଜିବାକୁ ପୁଲିସ ଅମ୍ବାଦୋଳା ଦହିଖାଳକୁ ସଂଯୋଗ କରୁଥିବା ରେଳ ଟ୍ରାକ୍କୁ ଯାଇଥିଲା। ହେଲେ ଗଳିତ ମୃତଦେହକୁ ରେଳବାଇ ପୁଲିସ ଜବତ କରି ରାୟଗଡ଼ା ମୁଖ୍ୟାଳୟକୁ ପଠାଇଥିଲା । ସୋମବାର ବିଶ୍ଵନାଥପୁର ପୁଲିସ ସେଠାକୁ ଯାଇ ଶବ ଜବତ କରିବା ସହ ପରିବାର ଲୋକଙ୍କୁ ହସ୍ତାନ୍ତର କରିଛି।
ଏପଟେ ପୁଲିସ ପକ୍ଷରୁ ତଦନ୍ତ ଜାରି ରହିଥିବାବେଳେ, ଅଭିଯୁକ୍ତଙ୍କୁ ସହଯୋଗ କରିଥିବା ସନ୍ଦେହରେ କାଣ୍ଡାମାର ଆଉ ୨ଜଣ ପ୍ରଦୀପ ହରିଜନ ଓ ଭୋଳା ଦୋରାଙ୍କୁ ଥାନାରେ ଅଟକ ରଖି ପଚରାଉଚରା କରିଥିଲେ। ମଙ୍ଗଳବାର ଅଟକ ଥିବା ୪ଜଣଙ୍କୁ କାଣ୍ଡାମା ଗାଁକୁ ଯାଇ ରଘୁଙ୍କୁ ମାରିଥିବା ସ୍ଥାନ ଓ ହତ୍ୟାରେ ବ୍ୟବହାର କରିଥିବା ମହୁଲ ବାଡ଼ି ସହିତ ହତ୍ୟା ପରେ କେଉଁ ବାଇକରେ ଫିଙ୍ଗିବାକୁ ନେଇଥିଲେ ସେହି ବାଇକକୁ ପୁଲିସ ଜବତ କରିଛି। ତଦନ୍ତ ପରେ କାଣ୍ଡାମା ଗାଁର ନରେଶ ଦୋରା ଓ ନିକଟସ୍ଥ ବଣ୍ଡେଲ ଗାଁର ପ୍ରଦୀପ ହରିଜନଙ୍କୁ ପୁଲିସ କୋର୍ଟ ଚାଲାଣ କରିଛି ।
