ପୁରୀ,୨୯/୦୫: ରଥ ଚାଳିରେ ବେଦି ସିଂହାସନ କାର୍ଯ୍ୟାରମ୍ଭ କରିଛନ୍ତି ରୂପକାର ସେବକ । ତିନି ବାଡ଼ର ମୁଖ୍ୟ ରୂପକାର ସେବକଙ୍କ ଦ୍ୱାରା ମାହାର୍ଦ୍ଦ ଓ ଶ୍ରୀଫଳ ଅର୍ପଣ ପୂର୍ବକ ମହାପ୍ରଭୁଙ୍କୁ ସୁମରଣା କରି ରଥ ସିଂହାସନରେ ରୂପ ଖୋଦେଇ କାର୍ଯ୍ୟ ଅନୁକୂଳ ହୋଇଛି । ପରେ ସମସ୍ତ ରୂପକାର ସେବକ ମିଳିତ ଭାବେ ଉକ୍ତ ରଥାଂଶରେ ସୂତାରେ ଦାଗ ଦେଇ ରୂପ ଖୋଦେଇ କାର୍ଯ୍ୟ କରୁଛନ୍ତି । ଚଳିତ ବର୍ଷ ନିର୍ମାଣ ପାଇଁ ଏକ ମାସ ଅଧିକ ମିଳିଥିବାରୁ ଠାକୁରଙ୍କ ରଥ କାର୍ଯ୍ୟ କେତେ ଅଧିକ ନିଖୁଣ ଓ ସୁନ୍ଦର ହେବ ସମସ୍ତେ ଲାଗି ପଡ଼ିଛନ୍ତି ।
ଶ୍ରୀମନ୍ଦିର ରୂପକାର ନିଯୋଗ ସମ୍ପାଦକ ରାଜେନ୍ଦ୍ର ମହାପାତ୍ର କୁହନ୍ତି, ପ୍ରଥମେ ବେଦି ସିଂହାସନରେ ଜଳ ଛିଞ୍ଚି ପବିତ୍ର କରାଗଲା । ସେଥିରେ ଚକ୍ ସାହାଯ୍ୟରେ ଗାରେଇ ମହାପ୍ରଭୁଙ୍କ ଆଜ୍ଞା ଆଣି କାର୍ଯ୍ୟାରମ୍ଭ କଲୁ । ରଥରେ ଚକା ସିଂହାସନରେ ଅଧିଷ୍ଠିତ ହୁଅନ୍ତି ଠାକୁରେ । ସେହି ଚକା ସିଂହାସନର ଏହା ନିମ୍ନ ଅଂଶ । ଏଥିରେ କଳସ ରୂପ ସହ ମତ୍ସ୍ୟ, ହସ୍ତୀ ଓ ଡାଳି ଲତା ଆଦି ଖୋଦେଇ ହେବ । ଶାଢ଼ି ବନ୍ଧା ରୂପକାରଙ୍କ ଦ୍ୱାରା ଅନୁକୂଳ ହୋଇଥାଏ । ବଡ଼ବାଡ଼ (ଶ୍ରୀବଳଭଦ୍ର)ର ଗଣେଶ୍ୱର ମହାପାତ୍ର ଓ ପୂର୍ଣ୍ଣଚନ୍ଦ୍ର ମହାପାତ୍ର, ମଝିବାଡ଼ର (ମା’ସୁଭଦ୍ରା) ପୂର୍ଣ୍ଣଚନ୍ଦ୍ର ମହାପାତ୍ର ଓ ହରିହର ମହାପାତ୍ର ଓ ମହାପ୍ରଭୁ (ଶ୍ରୀଜଗନ୍ନାଥ) ଙ୍କ ବାଡ଼ର ଲିଙ୍ଗରାଜ ମହାପାତ୍ର ଓ ରାଜେନ୍ଦ୍ର ମହାପାତ୍ରଙ୍କ ତତ୍ତ୍ୱାବଧାନରେ ରୂପକାର ରଥ କାର୍ଯ୍ୟ ଜାରି ରଖିଛନ୍ତି । ଏପଟେ ଦଣ୍ଡା ଫ୍ରେମ୍ କରିବାରେ ବ୍ୟସ୍ତ ବିଶ୍ୱକର୍ମା ଓ ଭୋଇ ସେବକ । ସାଲ ହୋଇଥିବା ପାଞ୍ଚ ଦଣ୍ଡାରେ ଆଗ ପଛ ମୁହାଁଟି ସଂଯୋଗ ପ୍ରସ୍ତୁତି ଚାଲିଛି । ମୁହାଁଟିରେ ୫ଟି ବିନ୍ଧ ହୋଇ ଦଣ୍ଡାରେ ଫିଟିଂ ହେବ । ମୁଖ୍ୟ ପାଞ୍ଚ ଦଣ୍ଡାରେ ଲାଗିବ ମୁହାଁଟି । ଆଗ ଓ ପଛ ମୁହାଁଟିରେ ପୋତା ହେବ ଗୁଜ । ଗୁଜ ଉପରେ ନିରାଡ଼ି ଉଠିବ । ପରେ ଚତୁଃପାଶ୍ୱର୍ରେ କୁଡ଼ୁକା ଲାଗିବ । ପାଶ୍ୱର୍ ଦଣ୍ଡା ଲାଗିବ । ପାଶ୍ୱର୍ ମୁହାଁଟି ସ୍ଥାପନ ହେବ ।
ପାଶ୍ୱର୍ ମୁହାଁଟିରେ କୋଣ ଗୁଜ ଓ ଜଳଯନ୍ତ୍ର ସ୍ଥାପନ ହୋଇ ପାଶ୍ୱର୍ ନିରାଡ଼ି ସ୍ଥାପନ ହେବ । ତିନି ରଥର ନିର୍ମାଣ କାର୍ଯ୍ୟରେ ସମନ୍ୱୟ ରଖାଯାଇ କାମ ଆଗଉଛି । କରତି ସେବକମାନେ ରଥର ଗୟଳ ଚିରଟ ଜାରି ରଖିଛନ୍ତି । ଓଝା ସେବକମାନେ ଶାଳରେ ରଥ ପାଇଁ ଆବଶ୍ୟକ ଦଣ୍ଡା ଓ ଗରଗରା କଣ୍ଟା ଆଦି ଲୁହା ସାମଗ୍ରୀ ତିଆରୁଛନ୍ତି । ରଥ କାର୍ଯ୍ୟରେ ଲାଗିବାକୁ ୧୮ ଖଣ୍ଡ ତାଳ ଗଡ଼ ଢେଙ୍କାନାଳରୁ ଆସିଥିବା ସୂଚନା ମିଳିଛି ।
ଅଧିକ ପଢ଼ନ୍ତୁ :- Balianta Murder case: ସୌମ୍ୟରଂଜନଙ୍କ ରକ୍ତରୁ ମିଳିଛି ‘ମର୍ଫିନ୍’ର ମାତ୍ରା ! କିଛି ଲୋକଙ୍କ ହେବ ପଲିଗ୍ରାଫ୍ ଟେଷ୍ଟ୍
ଗୁରୁବାର ତିନି ରଥର ପାଞ୍ଚ ଦଣ୍ଡାରେ ମୁହାଁଟ ସଂଯୋଗ ପରେ ଆଗ ଆଣି ମୁହାଁଟରେ ୫ଟି ସାଲ ଗୁଜ ଓ ପଛ ଆଣି ମୁହାଁଟରେ ୩ଟି ଜଳଯନ୍ତ୍ର ଓ ୨ ପାର୍ଶ୍ବରେ ଗୋଟିଏ ଗୋଟିଏ କୋଣଗୁଜ ଉଠି ସେହି ଗୁଜ ଉପରେ ନିରାଡ଼ି ସଂଯୋଗ ହୋଇଅଛି । ବାକି ରହିଛି ପାଞ୍ଚଦଣ୍ଡାର ଦୁଇ ପଟରେ କୁଡ଼ି ସଂଯୋଗ ହୋଇ ପାଶ୍ୱର୍ ଦଣ୍ଡା ସଂଯୋଗ କାର୍ଯ୍ୟ।
