ନୂଆଦିଲ୍ଲୀ,୨୯/୦୮: ଭାରତୀୟ କ୍ରିକେଟ ନିୟନ୍ତ୍ରଣ ବୋର୍ଡରେ ଏକ ବଡ଼ ପରିବର୍ତ୍ତନ ହୋଇପାରେ। ରିପୋର୍ଟ ଅନୁଯାୟୀ ବିସିଆଇ ସଭାପତି ରୋଜର ବିନ୍ନି ତାଙ୍କ ପଦରୁ ଇସ୍ତଫା ଦେଇଛନ୍ତି । ବୋର୍ଡ ଉପାଧ୍ୟକ୍ଷ ରାଜୀବ ଶୁକ୍ଳାଙ୍କୁ କାର୍ଯ୍ୟକାରୀ ସଭାପତି କରାଯାଇଛି । ଏବେ ସଭାପତିଙ୍କ ପାଇଁ ସ୍ପନସରସିପ ଖୋଜିବା ବଡ଼ ଚ୍ୟାଲେଞ୍ଜ ହେବ । ବିଭିନ୍ନ ଜାତୀୟ ଗଣମାଧ୍ୟମରେ ରୋଜର ବିନ୍ନି ଇସ୍ତଫା ଦେଇଥିବା ଚର୍ଚ୍ଚା ହେଉଛି ।
ରିପୋର୍ଟ ଅନୁଯାୟୀ, ଅଗଷ୍ଟ ୨୭ରେ ରାଜୀବ ଶୁକ୍ଳାଙ୍କ ଅଧ୍ୟକ୍ଷତାରେ ବିସିସିଆଇ ଅଧିକାରୀଙ୍କ ଏକ ବୈଠକ ଅନୁଷ୍ଠିତ ହୋଇଥିଲା । ଏଥିରେ ଡ୍ରିମ ୧୧ ପ୍ରତ୍ୟାହାର ପରେ ନୂଆ ସ୍ପନ୍ସର ଉପରେ ଆଲୋଚନା କରାଯାଇଥିଲା । ୨୦୨୨ରେ ସୌରଭ ଗାଙ୍ଗୁଲିଙ୍କ ସ୍ଥାନରେ ରୋଜର ବିନ୍ନି ବୋର୍ଡର ସଭାପତି ହୋଇଥିଲା । ବର୍ତ୍ତମାନ ରୋଜର ବିନ୍ନିଙ୍କ ବୟସ ୭୦ ବର୍ଷ । ସେ ସଭାପତି ପଦରୁ ଇସ୍ତଫା ଦେଇଥିବା କୁହାଯାଉଛି । ବିସିସିଆଇର ନିୟମ ଅନୁଯାୟୀ, ଯେକୌଣସି ଅଧିକାରୀଙ୍କୁ ୭୦ ବର୍ଷ ବୟସ ପରେ ତାଙ୍କ ପଦବୀ ଛାଡିବାକୁ ପଡିବ । ଏପରି ପରିସ୍ଥିତିରେ, ପୂର୍ବତନ ଟିମ ଇଣ୍ଡିଆ ଖେଳାଳି ରୋଜର ବିନ୍ନି ଏହି ପଦବୀରେ ରହିବା ପାଇଁ ଅଯୋଗ୍ୟ ହୋଇଛନ୍ତି । ରାଜୀବ ଶୁକ୍ଲା କିଛି ମାସ ପାଇଁ ଦାୟିତ୍ୱ ଗ୍ରହଣ କରିବେ । ନୂଆ ସଭାପତି ନିର୍ବାଚିତ ହେବା ପର୍ଯ୍ୟନ୍ତ ସେ କାର୍ଯ୍ୟକାରୀ ସଭାପତି ଭାବରେ କାର୍ଯ୍ୟ କରିବେ ।
ରାଜୀବ ଶୁକ୍ଲା ୨୦୨୦ ମସିହାରୁ ବିସିସିଆଇର ଉପାଧ୍ୟକ୍ଷ ଭାବରେ କାମ କରିଛନ୍ତି । ୧୯୮୩ ମସିହାରେ ଦିନିକିଆ ବିଶ୍ୱକପ୍ ଜିତିଥିବା ଦଳର ସଦସ୍ୟ ଥିଲେ ରୋଜର ବିନ୍ନି । ତାଙ୍କୁ ୨୦୨୨ ମସିହାରେ ପୂର୍ବତନ ଟିମ୍ ଇଣ୍ଡିଆ ଅଧିନାୟକ ସୌରଭ ଗାଙ୍ଗୁଲିଙ୍କ ସ୍ଥାନରେ ବିସିସିଆଇର ସଭାପତି କରାଯାଇଥିଲା । ବିନ୍ନି ହେଉଛନ୍ତି ତୃତୀୟ ପୂର୍ବତନ କ୍ରିକେଟର ଯିଏକି ବିସିସିଆଇ ସଭାପତି ହୋଇଥିଲେ ।
ଏବେ ପରବର୍ତ୍ତୀ ପଦକ୍ଷେପ କ’ଣ ହେବ? ଜାତୀୟ କ୍ରୀଡା ଆଇନ କାର୍ଯ୍ୟକାରୀ ହେବା ସତ୍ତ୍ୱେ, ବିସିସିଆଇ ଆସନ୍ତା ମାସରେ ଏହାର ବାର୍ଷିକ ସାଧାରଣ ବୈଠକ ଏବଂ ନିର୍ବାଚନ କରିବ । କାରଣ ଏହି ଆଇନ ଏପାବଦ ଆନୁଷ୍ଠାନିକ ଭାବରେ କାର୍ଯ୍ୟକାରୀ ହୋଇନାହିଁ । ରିପୋର୍ଟ ଅନୁଯାୟୀ, ଏହି ଆଇନ ଲାଗୁ ହେବାକୁ ଆହୁରି ୪ରୁ ୫ ମାସ ସମୟ ଲାଗିପାରେ । ତେଣୁ, ଆଗାମୀ ନିର୍ବାଚନକୁ ସ୍ଥଗିତ ରଖାଯାଇପାରିବ ନାହିଁ ।
