ବଣାଇ, ୧୨/୧୨: ଗର୍ଭବତୀଙ୍କୁ ଗୁଳି କରି ହତ୍ୟା । ବିଳମ୍ୱିତ ରାତିରେ ଲୁଟ୍ କରିବାକୁ ଆସି ଗୁଳି ମାଡ କଲେ ଦୁର୍ବୃତ୍ତ । ହତ୍ୟାକାଣ୍ଡ ଘଟାଇ ଘଟଣାସ୍ଥଳରୁ ଲୁଟେରାମାନେ ଫେରାର ହେଇଥିବା ଜଣା ପଡ଼ିଛି । ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ସୂଚନା ମୁତାବକ, ସୁନ୍ଦରଗଡ ଜିଲ୍ଲା ଟିକାୟତପାଲି ଥାନା ଅନ୍ତର୍ଗତ ଝିର୍ଡପାଲୀ ଗ୍ରାମରେ ଦୁଃଖଦ ଘଟଣା । ବୁଧବାର ବିଳମ୍ୱିତ ରାତିରେ କିଛି ଦୁର୍ବୃତ୍ତ ଲୁଟ୍ କରିବା ଉଦ୍ଦେଶ୍ୟରେ ମହିଳାଙ୍କ ଘରେ ପଶିଥିଲେ । ଏହି ସମୟରେ ଗର୍ଭବତୀ ମହିଳା ଜଣକ ଘରେ ଥିଲେ । ଦୁର୍ବୃତ୍ତ ମାନେ ଜବରଦସ୍ତି ଘରେ ପଶି ଲୁଟ୍ କରିଥିଲେ । ଏହା ଦେଖି ମହିଳା ଜଣକ ତାଙ୍କୁ ବିରୋଧ କରିଥିଲେ । ସେହି ସମୟରେ ଦୁର୍ବୃତ୍ତମାନେ ଗର୍ଭବତୀ ମହିଳାଙ୍କୁ ଗୁଳି ମାଡ଼ କରିଥିଲେ । ଫଳରେ ସେ ଘଟଣା ସ୍ଥଳରେ ପଡି ଯନ୍ତ୍ରଣାରେ ଚିତ୍କାର କରିଥିଲେ । ଏହାରି ଭିତରେ ଦୁର୍ବୃତ୍ତମାନେ ଲୁଟ୍ କରି ଫେରାର ହେଇଥିଲେ । ଗୁରୁତର ଅବସ୍ଥାରେ ମହିଳାଙ୍କୁ ଉଦ୍ଧାର କରି ପଡୋଶୀ ଲୋକେ ତାଙ୍କୁ ବଣାଇ ଚିକିତ୍ସାଳୟରେ ଭର୍ତ୍ତି କରାଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏନେଇ ଟିକାୟତପାଲି ଥାନା ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ।
