ଭୁବନେଶ୍ୱର,୩୦/୦୬: ଶ୍ରୀଲିଙ୍ଗରାଜ ମହାପ୍ରଭୁଙ୍କର ହଜାର ହଜାର ଏକର ଭୂସମ୍ପତ୍ତି । ଏତେ ସମ୍ପତ୍ତିର ମାଲିକ ହୋଇବି ଶ୍ରୀଲିଙ୍ଗରାଜଙ୍କ ରୁକୁଣା ରଥର ଚକ, ଅଖ ଆଦି ରଖିବାକୁ ବଡ ଷ୍ଟୋର ରୁମ ନାହିଁ ।
ଗତ ଏପ୍ରିଲ ମାସରେ ମହାପ୍ରଭୁଙ୍କ ରୁକୁଣା ରଥଯାତ୍ରା ସମ୍ପନ୍ନ ହୋଇଥିଲା। ଏବେ ସେଇ ରଥରୁ କାଠ ବାହାର କରି ଅଳ୍ପ କିଛି ହାଟ ପାଖ ଛୋଟିଆ ଷ୍ଟାରରେ ରଖାଯାଇଛି । ଆଉ କିଛି ଚକ ଓ ଅଖ ହାଟର ଗୋଟିଏ କଡ଼ରେ ରଖାଯାଇଛି ଯେଉଁଠି ଲୋକେ ପରିସ୍ରା କରୁଛନ୍ତି, ହାଟର ଅଳିଆ ଗଦା ହେଉଛି । ସେଠାରେ ଅଳିଆ ବୁହା ଟ୍ରଲି ଗୁଡିକ ରଖାଯାଇଛି । ରୁକୁଣା ରଥଯାତ୍ରାର ସୁଖ୍ୟାତି ସାରା ବିଶ୍ୱରେ ବିଦିତ । ରଥରେ ବ୍ୟବହୃତ ପ୍ରତିଟି ଅଂଶ ଆଧ୍ୟାତ୍ମିକ ମହତ୍ତ୍ୱ ବହନ କରେ । ଏହି କାରଣରୁ ରଥ ଚକ, ଅଖ ରଥ ସାମଗ୍ରୀ ସବୁକୁ ଅତି କଦର୍ଯ୍ୟ ସ୍ଥାନରେ ରଖିବା ଶ୍ରଦ୍ଧାଳୁମାନଙ୍କୁ ବ୍ୟଥିତ କରୁଛି । ଯଦି ରଖିବାକୁ ଜାଗା ନାହିଁ, ତାକୁ ସ୍ୱତନ୍ତ୍ର ବିଜ୍ଞପ୍ତି ଜାରି କରି ନିଲାମ କରାଯାଉ ।
ପୁରୀ ରଥଯାତ୍ରାର ରଥ ଚକ ପରି ରୁକୁଣା ରଥଯାତ୍ରାର ଚକ, ଅଖ କିଣିବାକୁ ଅନେକ ବ୍ୟକ୍ତିବିଶେଷ ଏବଂ ସଂସ୍ଥା ନିଶ୍ଚୟ ଆଗ୍ରହ ପ୍ରକାଶ କରିବେ । ପୂର୍ବରୁ କିଛି ସେବାୟତ ସେବା ବାବଦ ପାଉଣା ପାଇଁ ରଥ ଚକକୁ ନେଇ ଜାଳେଣି କରୁଥିଲେ । ତେବେ ଏଥିରେ ଲାଗି ଥିବା କଣ୍ଟା ଓ କିଳା ମନ୍ଦିର ପ୍ରଶାସନକୁ ଫେରାଉ ଥିଲେ । ମାତ୍ର ଏବେ ଘରେ ରନ୍ଧନ ଗ୍ୟାସ ବ୍ୟବହାର କରୁଥିବାରୁ ଆଉ ଏହି କାଠ ନେବାକୁ ସେବାୟତ ଚାଁହୁନାହାନ୍ତି ।
ବରିଷ୍ଠ ସମାଜ ସେବୀ ତଥା ଏକାମ୍ର ଜନ ଜାଗରଣ ମଞ୍ଚର ସଭାପତି ଭୀଷ୍ମ ନାରାୟଣ ନାୟକ କହିଛନ୍ତି ଯେ,ଏହି ଅଭାବନୀୟ ସ୍ଥିତି ପାଇଁ ଉଭୟ ପ୍ରଶାସନ ଆଉ ପରିଚାଳନା କମିଟି ଦାୟୀ । ଆଗକୁ ରଥ ନିର୍ମାଣ ପାଇଁ କାଠ ମିଳିବା କଷ୍ଟ ହେବ । ଯଦି ଅଖ, ଚକ ଏବଂ ରଥର ଅନ୍ୟାନ୍ୟ ଅଂଶ ଠିକ୍ ଭାବେ ରଖାଯିବ ତା’ହେଲେ ଅନେକ ସୁଫଳ ମିଳିବ । ମନ୍ଦିର କାର୍ଯ୍ୟାଳୟର କିଛି କର୍ମଚାରୀ ଏହି ପ୍ରସଙ୍ଗ ଟ୍ରଷ୍ଟ ବୋର୍ଡ ବୈଠକରେ ଉଠାଇବେ ବୋଲି ମତ ରଖିଛନ୍ତି । ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ତଥା ଭୁବନେଶ୍ୱର ଅତିରିକ୍ତ ଜିଲ୍ଲାପାଳ ରୁଦ୍ର ନାରାୟଣ ମହାନ୍ତି କହିଛନ୍ତି ‘ପ୍ରସ୍ତାବ ଆସିଛି, ଯାହା ସମ୍ଭବ ହେବ ବିଚାର କରାଯିବ ।
