ନୂଆଦିଲ୍ଲୀ, ୧୮/୦୧: ଆର ଜି କର ମେଡ଼ିକାଲରେ ମହିଳା ଡ଼ାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣା । ପିଡ଼ୀତାଙ୍କ ପରିବାରକୁ ୧୬୧ ଦିନ ପରେ ମିଳିଲା ନ୍ୟାୟ । ଦୋଷୀ ସାବ୍ୟସ୍ତ ହେଲା ସଞ୍ଜୟ ରୟ। ତେବେ ସଞ୍ଜୟକୁ ପଶ୍ଚିମବଙ୍ଗ ସିଆଲଦା କୋର୍ଟ ଦୋଷୀ ସାବ୍ୟସ୍ତ କରିଛନ୍ତି । ୨୦ରେ ସଞ୍ଜୟ ରାୟକୁ ଦଣ୍ଡ ଶୁଣାଇବେ କୋର୍ଟ । ଆଜୀବନ ଜେଲ ନଚେତ୍ ମୃତ୍ୟୁ ଦଣ୍ଡାଦେଶ ଦେବା ସମ୍ଭାବନା ।
ସୂଚନା ମୁତାବକ, ୯ ଅଗଷ୍ଟ ୨୦୨୪ ଦିନ ସକାଳେ କୋଲକାତାର ଆର ଜି କର ମେଡିକାଲ କଲେଜରେ ଜଣେ ମହିଳା ଡାକ୍ତରଙ୍କ ମୃତଦେହ ମିଳିଥିଲା। ଯାହାଙ୍କ ଶରୀରରେ ଅନେକ ଆଘାତ ଚିହ୍ନ ଥିଲା। ଏନେଇ ପୋଲିସ ଘଟଣାର ତଦନ୍ତ କରି ସିସିଟିଭି ଫୁଟେଜର ଯାଞ୍ଚ କରିଥିଲା । ଯେଉଁଥିରେ ଘଟଣା ଦିନ ରାତିରେ ସେମିନାର୍ ହଲରେ ଅଭୟା ଶୋଇଥିବାବେଳେ ସଞ୍ଜୟ ସେ ରୁମକୁ ଯାଇଥିବା ଦେଖିବାକୁ ମିଳିଥିଲା । ସିସିଟିଭି ଫୁଟେଜ ଆଧାରରେ ସଞ୍ଜୟକୁ ଛାଡ଼ିଦେଲେ କୌଣସି ଷ୍ଟାଫ୍ ସେଠାକୁ ଯାଇ ନ ଥିଲେ । ଏଥିସହ ସଞ୍ଜୟର ବ୍ଲଟୁଥ୍ ଅଭୟାଙ୍କ ମୃତଦେହ ନିକଟରୁ ମିଳିଥିଲା । ଯାହା ଆଧାରରେ ସଞ୍ଜୟଙ୍କୁ ଗିରଫ କରିଥିଲା ପୋଲିସ । କୋର୍ଟ କହିଛନ୍ତି ଯେ ଅଭିଯୁକ୍ତଙ୍କ ବିରୋଧରେ ବିଏନଏସ୍ ଧାରା ୬୪, ୬୬ ଲଗାଯାଇଛି। ଡାକ୍ତରଙ୍କ ହତ୍ୟା ଏବଂ ବଳାତ୍କାର ମାମଲାର ଅଭିଯୁକ୍ତ ସଞ୍ଜୟ ରୟଙ୍କ ଶୁଣାଣି ଜାନୁଆରୀ ୯ ତାରିଖରେ ସରିଥିଲା । ଏହି ସମୟରେ ୫୦ ଜଣ ସାକ୍ଷୀଙ୍କୁ ପଚରାଉଚରା କରାଯାଇଥିଲା।ପୋଷ୍ଟମର୍ଟମ ରିପୋର୍ଟରୁ ଜଣାପଡିଛି ଯେ ଅପରାଧୀ ପ୍ରଥମେ ପୀଡିତାଙ୍କୁ ଦୁଷ୍କର୍ମ ଏବଂ ପରେ ତାଙ୍କୁ ଗଳା ଚିପି ହତ୍ୟା କରିଥିଲେ। ଆର୍.ଜି କର ମେଡିକାଲ କଲେଜ ପ୍ରଥମେ ଏହା ଏକ ଆତ୍ମହତ୍ୟା ବୋଲି କହିଥିଲା। କିନ୍ତୁ ପରେ ଏହି ଘଟଣା କ୍ରମାନୁସାରେ ପ୍ରକାଶ ପାଇବାରେ ଲାଗିଲା। ଏହି ଘଟଣାର ସତ୍ୟତା ସମଗ୍ର ଦେଶକୁ ଚକିତ କରିଦେଇଥିଲା।
