କଟକ,୦୪/୦୯: ୧୮୫୩ଟି ପଦରେ ସିପାହୀ, କନେଷ୍ଟବଳ ନିଯୁକ୍ତି ଉପରେ ଥିବା ଅଦାଲତି ବାଧା ହଟିଯାଇଛି । ଚୟନ ହେବା ପରେ ମଧ୍ୟ ପଦ ଅଭାବରୁ ନିଯୁକ୍ତିରୁ ବାଦ୍ ପଡ଼ିଥିବା ୪୧ ଜଣ ପ୍ରାର୍ଥୀଙ୍କୁ ଥଇଥାନ କରାଯିବ ବୋଲି ସରକାର ବୁଧବାର ହାଇକୋର୍ଟରେ ପ୍ରତିଶ୍ରୁତି ଦେଇଛନ୍ତି । ଆଉ ୪୧ଟି ନୂଆ ପଦ ସୃଷ୍ଟି କରାଯାଇ ସମସ୍ତଙ୍କୁ ନିଯୁକ୍ତି ଦିଆଯିବ ବୋଲି ସରକାରଙ୍କ ପ୍ରତିଶ୍ରୁତି ପରେ ହାଇକୋର୍ଟ ନିଯୁକ୍ତି ଉପରେ ଜାରି କରିଥିବା ଅନ୍ତରୀଣ ରହିତାଦେଶକୁ ଉଠାଇ ଦେଇଛନ୍ତି ।
ଫଳରେ ସମସ୍ତ ୧୮୫୩ ପଦ ଓ ଆଉ ନୂଆ ୪୧ଟି ପଦରେ ଯୋଗ୍ୟ ପ୍ରାର୍ଥୀଙ୍କୁ ନିଯୁକ୍ତି ମିଳିବ । ରାଜ୍ୟ ସରକାରଙ୍କ ଜବାବ ପରେ ହାଇକୋର୍ଟର ବିଚାରପତି ଜଷ୍ଟିସ୍ ବିରଜା ପ୍ରସନ୍ନ ଶତପଥୀ ମାମଲାର ଅନ୍ତ ଘଟାଇଛନ୍ତି । ଆବେଦନକାରୀଙ୍କ ପକ୍ଷରୁ ରବୀନ୍ଦ୍ରନାଥ ପଣ୍ଡା, ରାଜୀବ ରଥ ପ୍ରମୁଖ ମାମଲା ପରିଚାଳନା କରୁଥିଲେ।
