ନୂଆଦିଲ୍ଲୀ: ଦିଲ୍ଲୀରୁ ଶିମଲା ଯାତ୍ରା କରୁଥିବା ଆଲାଏନ୍ସ ଏୟାର ବିମାନକୁ ଜରୁରୀକାଳୀନ ଅବତରଣ କରାଯାଇଛି । ଏହି ବିମାନରେ ହିମାଚଳ ପ୍ରଦେଶର ଉପମୁଖ୍ୟମନ୍ତ୍ରୀ ମୁକେଶ ଅଗ୍ନିହୋତ୍ରୀ ଏବଂ ଡିଜିପି ଯାତ୍ରା କରୁଥିଲେ । ସୂଚନା ଅନୁଯାୟୀ, ସୋମବାର ସକାଳେ ଦିଲ୍ଲୀରୁ ସିମଲା ଯାଉଥିବା ଆଲାଏନ୍ସ ଏୟାରର ବିମାନ ନମ୍ବର 9I821ର ପାଇଲଟ୍ ସିମଲା ବିମାନବନ୍ଦରରେ ଅବତରଣ ସମୟରେ ବିମାନର ବ୍ରେକରେ ଯାନ୍ତ୍ରିକ ତ୍ରୁଟି ବିଷୟରେ ଜଣାଇଥିଲେ। ବିମାନରେ ହିମାଚଳ ପ୍ରଦେଶର ଉପମୁଖ୍ୟମନ୍ତ୍ରୀ ମୁକେଶ ଅଗ୍ନିହୋତ୍ରୀ ଏବଂ ଡିଜିପି ଡକ୍ଟର ଅତୁଲ ବର୍ମାଙ୍କ ସମେତ ୪୪ ଜଣ ଯାତ୍ରୀ ଥିଲେ।

ଏହି ଘଟଣା ସମ୍ପର୍କରେ ହିମାଚଳ ପ୍ରଦେଶର ଉପମୁଖ୍ୟମନ୍ତ୍ରୀ ମୁକେଶ ଅଗ୍ନିହୋତ୍ରୀ କହିଛନ୍ତି ଯେ,"ଆଜି ସକାଳେ ଆମେ ବିମାନ ଯୋଗେ ସିମଲାରେ ପହଞ୍ଚିଥିଲୁ। ବିମାନର ଅବତରଣରେ କିଛି ସମସ୍ୟା ହୋଇଥିଲା । ମୋର କୌଣସି ବୈଷୟିକ ଜ୍ଞାନ ନାହିଁ । କିନ୍ତୁ ମୁଁ ଜଣେ ସାଧାରଣ ଲୋକ ଭାବରେ କହିପାରିବି ଯେ ଯେତେବେଳେ ବିମାନଟି ଅବତରଣ କରିବାକୁ ଯାଉଥିଲା, ସେତେବେଳେ ଏହା ସଠିକ୍ ସ୍ଥାନରେ ଅବତରଣ କରିପାରିନଥିଲା । ଏହା ସଠିକ୍ ସ୍ଥାନରେ ଅଟକି ପାରିନଥିଲା ଏବଂ ରନୱେ ଶେଷ ହୋଇଥିବା ସ୍ଥାନରେ ପହଞ୍ଚିଥିଲା । ବିମାନକୁ ଅଟକାଇବା ପାଇଁ ଶକ୍ତ ବ୍ରେକ୍ ଲଗାଯାଇଥିଲା । କିନ୍ତୁ ଏହା ସଠିକ୍ ଭାବରେ କାର୍ଯ୍ୟ କରି ପାରିନଥିବା ଅନୁମାନ ହୋଇଥିଲା। ତେବେ ଏଭଳି ଅସୁବିଧା ପାଇଁ ଆମକୁ ଆହୁରି ୨୦-୨୫ ମିନିଟ୍ ପାଇଁ ବିମାନରେ ରହିବାକୁ ପଡିଲା ।