ପୁରୀ,୧୧/୦୬: ଶ୍ରୀମନ୍ଦିର ସମ୍ପର୍କିତ ଦୁଇଟି ଶବ୍ଦ ଓ ଗୋଟିଏ ଲୋଗୋ ପାଟେଣ୍ଟ ଅନ୍ତର୍ଭୁକ୍ତ ହେଲା । ଆନନ୍ଦ ବଜାର, ଶ୍ରୀପତିତପାବନ ଦୁଇ ଶବ୍ଦାବଳୀ ଓ ଶ୍ରୀଜଗନ୍ନାଥ ଟେମ୍ପୁଲ ଆଡମିନିଷ୍ଟ୍ରେସନ୍ ବା ଏସ୍ଜେଟିଏ ଲୋଗୋକୁ ମିଳିଛି ଆଇପି ଇଣ୍ଡିଆର ଅନୁମୋଦନ । ଖୁବ୍ଶୀଘ୍ର ଆଉ ୨୬ଟି ନାମକୁ ନେଇ ରହିଥିବା ଆବେଦନପତ୍ରକୁ ମିଳିବ ଅନୁମୋଦନ । ଏନେଇ ଅଧିକ ତଥ୍ୟ ମାଗିଛି ଆଇପି ଇଣ୍ଡିଆ ବା ଇଣ୍ଡିଆନ୍ ପାଟେଣ୍ଟ ଅଫିସ୍ । ଏସମ୍ପର୍କରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ ସୂଚନା ଦେଇଛନ୍ତି । ଏହା ଶ୍ରୀମନ୍ଦିର ଐତିହ୍ୟ, ସଂସ୍କୃତି ସୁରକ୍ଷାରେ ବିଶେଷ ସହାୟକ ହେବ ବୋଲି ସେ ଆଶା ପ୍ରକାଶ କରିଛନ୍ତି ।
ପାଟେଣ୍ଟ ନିୟମ ଅନୁଯାୟୀ କୌଣସି ଜିନିଷ, ଦ୍ରବ୍ୟ କିମ୍ବା ଶବ୍ଦ ଅଥବା ଲୋଗୋକୁ ଅନୁମୋଦନ ମିଳିଲେ ତାହା ମୂଳ ସ୍ଥାନଠାରୁ ଅନ୍ୟତ୍ର ବ୍ୟବହାର, ବିକ୍ରି, ପ୍ରସ୍ତୁତି କିମ୍ବା ଆମଦାନୀ ଉପରେ ରୋକ ଲାଗିଥାଏ । ‘ଜଗନ୍ନାଥ ଧାମ’ ନାମ ପାଇଁ ମଧ୍ୟ ପାଟେଣ୍ଟ ଆବେଦନ କରିଛି ଶ୍ରୀମନ୍ଦିର ପ୍ରଶାସନ । ଏହାବାଦ୍ ଶ୍ରୀମନ୍ଦିରରେ ବ୍ୟବହୃତ ଆହୁରି ୨୬ଟି ସ୍ୱତନ୍ତ୍ର ଶବ୍ଦ ବା ନାମକୁ ପାଟେଣ୍ଟ ଅନ୍ତର୍ଭୁକ୍ତ କରିବା ନିମନ୍ତେ ଆବେଦନ ହୋଇଛି । ଏନେଇ ଅଧିକ ତଥ୍ୟ ଉପସ୍ଥାପନ ପରେ ମିଳିବ ପାଟେଣ୍ଟ ଅନୁମୋଦନ ।
ପଶ୍ଚିମବଙ୍ଗର ଦୀଘାରେ ମମତା ସରକାର ଜଗନ୍ନାଥ ଧାମ ଶବ୍ଦ ବ୍ୟବହାର କରିବା ଭଳି ମହାପ୍ରସାଦ, ନିର୍ମାଲ୍ୟ, ଆନନ୍ଦବଜାର, ରତ୍ନ ବେଦୀ, ଶ୍ରୀଗୁଣ୍ଡିଚା ମନ୍ଦିର, ବଡ଼ଦେଉଳ, ଶଙ୍ଖକ୍ଷେତ୍ର, ଶ୍ରୀପୁରୁଷୋତ୍ତମ କ୍ଷେତ୍ର ଭଳି ଅନେକ ନାମରେ ଅପବ୍ୟବହାର ହେଉଛି । ଶ୍ରୀମନ୍ଦିର ପ୍ରଶାସନ ଲୋଗୋର ଦୁରୁପଯୋଗ କରି ଜାଲ ୱେବସାଇଟ୍ କରାଯାଉଛି । ଲୋକେ ଏହାଦ୍ୱାରା ଠକେଇର ଶିକାର ହେଉଛନ୍ତି । ମୂଳପୀଠର ନାମ ଓ ପରମ୍ପରା ନାମରେ ବ୍ୟବସାୟୀକରଣ କରାଯାଉଛି । ଏହି ଶବ୍ଦ ଓ ପରମ୍ପରାର ଦୁରୁପଯୋଗ ରୋକିବାକୁ ପ୍ରଶାସନିକ ତତ୍ପରତା ପ୍ରକାଶ ପାଇଛି । ଆଇପି ଇଣ୍ଡିଆ ଶ୍ରୀମନ୍ଦିର ପ୍ରଶାସନ ଆବେଦନକୁ ଅନୁମୋଦନ କଲେ ଏହାକୁ ବାହାର ଦେଶରେ କିପରି ଲାଗୁ କରାଯିବ ତାହା ଏକ ପ୍ରଶ୍ନବାଚୀ ସୃଷ୍ଟି କରିଛି । ଯେଉଁଠି ବିଦେଶରେ ଅ-ତିଥିରେ ସ୍ନାନଯାତ୍ରା ଓ ରଥଯାତ୍ରା ରୋକିବାରେ ପ୍ରଶାସନ ବିଫଳ ହେଉଛି, ସେଠାରେ ପାଟେଣ୍ଟ ଶବ୍ଦର ଅପବ୍ୟବହାର ରୋକିବା ନିଶ୍ଚିତ ଆଉ ଏକ ଆହ୍ୱାନ ହେବ । କାରଣ ଏଥିନିମନ୍ତେ ୱାଲ୍ଡ ୱାଇଡ୍ ପାଟେଣ୍ଟର ଆବଶ୍ୟକତା ପଡ଼ିବ ।
ଅଧିକ ପଢ଼ନ୍ତୁ :- Digha Dham dispute : ଦୀଘା ଜଗନ୍ନାଥ ମନ୍ଦିରରୁ ହଟିଲା 'ଧାମ' ଶବ୍ଦ, ମୋହନଙ୍କ ଚିଠି ପରେ ହଟାଇଲେ ଶୁଭେନ୍ଦୁ ଅଧିକାରୀ
ସୂଚନା ମୁତାବକ ଆଇପି ଇଣ୍ଡିଆର ଅନୁମୋଦନ ପରେ ପ୍ରଶାସନ ଚାହିଁଲେ ୱାଲ୍ଡ ୱାଇଡ୍ ପାଟେଣ୍ଟ ନିମନ୍ତେ ପଦକ୍ଷେପ ନେଇପାରିବ । ପିସିଟି (ପାଟେଣ୍ଟ କର୍ପୋରେସନ ଟ୍ରିଟି) ଏହି ଆବେଦନକୁ ବିଚାର କରି ଆବଶ୍ୟକ ଅନୁମୋଦନ ଦେବ । ଏନେଇ ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ତଥା ଶ୍ରୀମନ୍ଦିର ପୁରୋହିତ ଡ. ସିଦେ୍ଧଶ୍ୱର ମହାପାତ୍ର କହିଛନ୍ତି, ଏହା ସ୍ୱାଗତଯୋଗ୍ୟ ପଦକ୍ଷେପ । ପୁରୀ ଓ ଶ୍ରୀମନ୍ଦିରରେ ବ୍ୟବହୃତ ଅନେକ ଶବ୍ଦକୁ ନେଇ ସେ ‘ପୁରୀ ବୋଲି’ ନାମକ ଏକ ପୁସ୍ତକ ରଚନା କରିଛନ୍ତି । ଏଥିରେ ଶ୍ରୀମନ୍ଦିର, ଶ୍ରୀକ୍ଷେତ୍ର, ଗୁଆଳି, ରହୁବର, ବଡ଼ଦେଉଳ ପ୍ରଭୃତି ବହୁ ସ୍ୱତନ୍ତ୍ର ଶବ୍ଦକୁ ନେଇ ଏକ ଶବ୍ଦକୋଷ କରାଯାଇଛି । ଅ’ରୁ କ୍ଷ’ ପର୍ଯ୍ୟନ୍ତ କ୍ରମାନ୍ୱୟରେ ଏହି ସ୍ୱତନ୍ତ୍ର ଶବ୍ଦକୋଷ ରହିଛି । ଏହା ଗବେଷକ ଓ ପାଠକଙ୍କ ବିଶେଷ ଆଦୃତି ପାଇଛି । ଏହାକୁ ସେ ମୁଖ୍ୟ ପ୍ରଶାସକଙ୍କୁ ମଧ୍ୟ ଭେଟି ଦେଇଥିବା ଡ. ମହାପାତ୍ର କହିଛନ୍ତି ।
