ଦାରିଙ୍ଗବାଡି,୧୧/୦୧: ଓଡ଼ିଶାର କାଶ୍ମୀର କୁହାଯାଉଥିବା ଦାରିଙ୍ଗବାଡିରେ ଆଜି ସର୍ବାଧିକ ତୁଷାରପାତ ହୋଇଥିବା ଦେଖିବାକୁ ମିଳିଛି । ସାରା ବିଲ ମାଳ ତୁଷାରପାତରେ ଭରି ହୋଇ ରହିଛି । ଶନିବାର ସର୍ବାଧିକ ମାତ୍ରାରେ ତୁଷାର ପାତ ହୋଇଛି । ଯାହାକି ଚଳିତ ଶୀତ ଋତୁରେ ସର୍ବାଧିକ । ତୁଷାରପାତ ଫଳରେ ହାତ ଗୋଡ଼ କାଲୁଆ ମାରି ଯାଉଛି । ଘରୁ ବାହାରିବା ଏକ ପ୍ରକାର ମୁସ୍କିଲ ହୋଇ ପଡ଼ିଛି । ଲୋକେ ଶୀତରୁ ରକ୍ଷା ପାଇବା ପାଇଁ ନିଆଁର ସାହାରା ହେଉ ଅବା ଶୀତ ବସ୍ତ୍ର ପରିଧାନ କରିବାକୁ ପଡ଼ୁଛି ।
ଗାଡ଼ି ଚଲେଇବା ବେଳେ ହେଉ ଅବା ଚାଲିକି ଗଲେ ମଧ୍ୟ ଗ୍ଲୋବ୍ସର ଆବଶ୍ୟକ ପଡ଼ୁଛି । ତୁଷାରପାତ ଦେଖିବା ପାଇଁ ଅଞ୍ଚଳବାସୀ ସମେତ ପର୍ଯ୍ୟଟକଙ୍କ ଭିଡ଼ ଜମୁଛି । ଆଜି ଶୀତ ମହୋତ୍ସବ ରହିଥିବା ବେଳେ ଦାରିଙ୍ଗବାଡିରେ ତୁଷାର ପାତ ମହୋତ୍ସବକୁ ଦ୍ଵିଗୁଣିତ କରିବ । ତୁଷାର ପାତ ଯୋଗୁଁ ବୃଦ୍ଧ ବୃଦ୍ଧାଙ୍କ ଦୁଃଖ ବଢ଼ି ଯାଇଥିବା ବେଳେ ଶ୍ରମିକ ଶ୍ରେଣୀର ଲୋକେ କାମ ଧନ୍ଦାକୁ ସଠିକ୍ ସମୟରେ ଯାଇ ପାରୁନାହାନ୍ତି । ଦିନ ୧୦ ଟାରୁ ୧୧ ଟା ନହେଲେ ଶୀତ ଛାଡ଼ୁ ନାହିଁ । ଦିନ ତମାମ ଥଣ୍ଡା ରହୁଥିବା ଯୋଗୁଁ ଶୀତ ବସ୍ତ୍ର ପରିଧାନ କରି ରହିବାକୁ ଇଚ୍ଛା ହେଉଛି।
