ମୁମ୍ବାଇ,୧୨/୦୮: ମର୍ମନ୍ତୁଦ ସଡ଼କ ଦୁର୍ଘଟଣାରେ ସୋସିଆଲ ମିଡ଼ିଆ ଇନଫ୍ଲୁଏନ୍ସର ଅସଫିୟା ଖାନ୍ଙ୍କ ମୃତ୍ୟୁ । ମୁମ୍ବାଇ-ପୁଣେ ଏକ୍ସପ୍ରେସ ଓ୍ବେର ପନବେଲ ନିକଟରେ ଏହି ଦୁର୍ଘଟଣା ହୋଇଛି। ଏଥିରେ ଅସଫିୟାଙ୍କ ସହିତ ଥିବା ଆଉ ଚାରି ଜଣ ମଧ୍ୟ ଗୁରୁତର ଆହତ ହୋଇଛନ୍ତି।
ପନବେଲ ତାଲୁକା ପୁଲିସ ଷ୍ଟେସନରେ ଦାଖଲ ହୋଇଥିବା ରିପୋର୍ଟ ଅନୁଯାୟୀ, କାର୍ ଚଳାଉଥିବା ଡ୍ରାଇଭର ନୁର ଆଲମ ଖାନ୍ ଦ୍ରୁତ ଗତିରେ ଏବଂ ଅସାବଧାନତାର ସହ ଗାଡି ଚଲାଉଥିଲେ। ଯାହା ଫଳରେ ଗାଡିଟି ନିୟନ୍ତ୍ରଣ ହରାଇ ଦୁର୍ଘଟଣା ଘଟିଥିଲା। ଘଟଣା ସମୟରେ ଉପସ୍ଥିତ ଲୋକଙ୍କ କହିବା ଅନୁଯାୟୀ, ଗାଡିଟି ରାସ୍ତାରେ ୩ରୁ ୪ ଥର ଓଲଟି ପଡ଼ିଥିଲା । ଫଳରେ ଅସଫିୟାଙ୍କ ସହିତ ଆଉ ଚାରି ଜଣ ଗୁରୁତର ଆହତ ହୋଇଥିଲେ। ସମସ୍ତଙ୍କୁ ତୁରନ୍ତ ଉଦ୍ଧାର କରି ପାନବେଲ ଡ଼ାକ୍ତରଖାନାରେ ଭର୍ତ୍ତି କରାଯାଇଥିଲା । ହେଲେ ସେଠାରେ ତାଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଛି।
ତେବେ ଅସଫିୟା ଖାନ ଲକ୍ଷ୍ନୌର ବାସିନ୍ଦା ଥିଲେ। ସେ ଇନଷ୍ଟାଗ୍ରାମରେ ପୋଷ୍ଟ କରି ତାଙ୍କ ଫଲୋଅର୍ସଙ୍କ ସହ ତାଙ୍କ ଜୀବନ ସହ ଜଡିତ ସୂଚନା ସେୟାର କରୁଥିଲେ। ଏଥିସହ ଅସଫିୟା ଟ୍ରେଣ୍ଡିଂ ଗୀତରେ ରିଲ୍ ତିଆରି କରି ଭାଇରାଲ ମଧ୍ୟ ହୋଇଥିଲେ। ଇନଷ୍ଟାରେ ତାଙ୍କର ୧ ହଜାରରୁ ଅଧିକ ପୋଷ୍ଟ ଥିବାବେଳେ ୨ ଲକ୍ଷରୁ ଉର୍ଦ୍ଧ୍ବ ଫଲୋଅର୍ସ ଥିଲେ। ତେବେ ତାଙ୍କ ମୃତ୍ୟୁ ଖବର ଶୁଣି ଦୁଃଖ ପ୍ରକାଶ କରୁଛନ୍ତି ଫ୍ୟାନ୍ସ ।
