ବୁର୍ଲା,୨୬/୦୭: ବୁର୍ଲା ସହର ଗାନ୍ଧୀପଡ଼ା ଛକ ନିକଟରେ ଚଳନ୍ତା ଆମ ବସ୍ ଉପରକୁ ଦୁର୍ବୃତ୍ତମାନେ ପଥର ମାଡ଼ କରିଛନ୍ତି । ବସ୍ର ଝରକା କାଚ ଭାଙ୍ଗିଯିବା ସହ ଜଣେ ମହିଳା ଯାତ୍ରୀ ଆହତ ହୋଇଛନ୍ତି । ଘଟଣା ପରେ ବୁର୍ଲା ପୁଲିସ୍ ତଦନ୍ତ ଆରମ୍ଭ କରି ଦୁର୍ବୃତ୍ତଙ୍କୁ ଧରିବା ପାଇଁ ତନାଘନା ଚଳାଇଛି ।
ସୂଚନାନୁଯାୟୀ, ସମ୍ୱଲପୁରରୁ ବୁର୍ଲା ଦେଇ ଅଟଳ ଛକ ଅଭିମୁଖେ ଯାଉଥିବା ଆମ ବସ୍ ପ୍ଲାନେଟୋରିୟମ୍ ଛକରୁ ଜ୍ୟୋତିବିହାର ଛକକୁ ସଂଯୋଗ କରୁଥିବା ଭିଆଇପି ରାସ୍ତାର ଗାନ୍ଧୀପଡ଼ା ଛକ ନିକଟରେ ପହଞ୍ଚିଥିବାବେଳେ କିଛି ଦୁର୍ବୃତ୍ତ ପଥର ମାଡ଼ କରିଥିଲେ । ପଥର ଯାତ୍ରୀ ଚଢ଼ିବା ଦ୍ୱାର ନିକଟରେ ଥିବା ଝରକା କାଚରେ ବାଜିଥିଲା । ଫଳରେ କାଚ ଭାଙ୍ଗିଯିବା ସହ ସେହି ସିଟ୍ରେ ବସିଥିବା ଜଣେ ମହିଳାଙ୍କ ମୁଣ୍ଡରେ ପଥର ବାଜିଥିଲା । ଏଥିରେ ତାଙ୍କ ମୁଣ୍ଡ ଫାଟିଯାଇଛି । ଆହତ ମହିଳା ଯାତ୍ରୀ ହେଲେ ବୁର୍ଲା ବସନ୍ତ ବିହାର ଅଞ୍ଚଳର ମୀନାକ୍ଷୀ ବାରିକ (୩୬) । ଘଟଣା ପରେ ବସ୍ଟି ଜ୍ୟୋତିବିହାର ଛକରେ ଅଟକିଥିଲା । ଖବର ପାଇ ବୁର୍ଲା ପୁଲିସ୍ ଘଟଣାସ୍ଥଳରେ ପହଞ୍ଚି ଆହତ ମହିଳାଙ୍କୁ ଉଦ୍ଧାର କରି ଚିକିତ୍ସା ପାଇଁ ଭିମ୍ସାର୍ ପଠାଇଥିଲା । ତାଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଛି ।
ଅଧିକ ପଢ଼ନ୍ତୁ :- ମାଲେମାଲ ହେବା ଆଶାରେ ଚୋରା ରାଶି ଲଡୁ କିଣିଥିଲେ ଦୋକାନୀ, ଚଢ଼ାଉ କରି ମାଡ଼ି ବସିଲା ପୁଲିସ, ୫ ଲକ୍ଷ ଟଙ୍କାର ଲଡ଼ୁ ଜବତ
ଅନ୍ୟପକ୍ଷରେ ଘଟଣାସ୍ଥଳ ଅନ୍ଧାରରେ ବୁଡ଼ି ରହୁଥିବାରୁ ଏପରି ଅପରାଧ ଘଟିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ବଲେରପଡ଼ା ଛକରୁ ଗାନ୍ଧୀପଡ଼ା ଛକ ଦେଇ କୁଷ୍ଠରୋଗୀ କଲୋନି ପର୍ଯ୍ୟନ୍ତ ଭିଆଇପି ରାସ୍ତାରେ ଗୋଟିଏ ବି ଷ୍ଟ୍ରିଟ୍ ଲାଇଟ୍ ନ ଥିବାରୁ ସନ୍ଧ୍ୟା ପରେ ସମ୍ପୂର୍ଣ୍ଣ ଅନ୍ଧାର ରହୁଛି । ଏହାର ସୁଯୋଗ ନେଇ ଅସାମାଜିକ ଯୁବକମାନେ ଏଠାରେ ଆଡ୍ଡା ଜମାଉଥିବା ଅଭିଯୋଗ ହେଉଛି । ସ୍ଥାନୀୟ ବାସିନ୍ଦାଙ୍କ କହିବାନୁସାରେ, ଏହି ରାସ୍ତାରେ ଷ୍ଟ୍ରିଟ୍ ଲାଇଟ୍ ଲଗାଇବା ପାଇଁ ବାରମ୍ୱାର ସମ୍ୱଲପୁର ମହାନଗର ନିଗମ ନିକଟରେ ଅଭିଯୋଗ କରାଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ପଦକ୍ଷେପ ନିଆଯାଇନାହିଁ । ଫଳରେ ସାଧାରଣ ଲୋକ ଓ ଯାତ୍ରୀଙ୍କ ସୁରକ୍ଷା ନେଇ ପୁଣିଥରେ ପ୍ରଶ୍ନ ଉଠିଛି ।
