ନୂଆଦିଲ୍ଲୀ: ସମାଜବାଦୀ ପାର୍ଟି (ସପା)ର ବରିଷ୍ଠ ନେତା ଏବଂ ଉତ୍ତର ପ୍ରଦେଶର ପୂର୍ବତନ ମନ୍ତ୍ରୀ ଆଜମ ଖାନଙ୍କୁ ସୁପ୍ରିମକୋର୍ଟ ତାଗିଦ କରିଛନ୍ତି । ରାମପୁରରେ ସରକାରୀ ଜମିକୁ ମୌଲାନା ମହମ୍ମଦ ଅଲି ଟ୍ରଷ୍ଟକୁ ଦେବା ମାମଲାରେ ଆଜମ ଖାନଙ୍କ ଉପରେ ବର୍ଷିଛନ୍ତି ସୁପ୍ରିମକୋର୍ଟ । ଏହା ସହ ଟ୍ରଷ୍ଟ ପାଖରୁ ଜମି ପ୍ରତ୍ୟାହାର କରିନେବା ନେଇ ରାଜ୍ୟ ସରକାରଙ୍କ ନିଷ୍ପତ୍ତି ସଠିକ ବୋଲି ଦର୍ଶାଇଛନ୍ତି ସୁପ୍ରିମକୋର୍ଟ । ପ୍ରଧାନ ବିଚାରପତି ଜଷ୍ଟିସ୍ ଡିଓ୍ବାଇ ଚନ୍ଦ୍ରଚୂଡ, ଜଷ୍ଟିସ୍ ଜେବି ପାରଦୀଓ୍ବାଲା ଏବଂ ଜଷ୍ଟିସ୍ ମନୋଜ ମିଶ୍ରାଙ୍କ ଖଣ୍ଠପୀଠ ରାଜ୍ୟ ସରକାରଙ୍କ ନିର୍ଦ୍ଦେଶ ବିରୋଧରେ ଟ୍ରଷ୍ଟର ଆବେଦନକୁ ଖାରଜ କରିଦେଇଛନ୍ତି ।
ଅଧିକାରର ଦୁରୂପଯୋଗ କରି ମନ୍ତ୍ରୀ ଜମି ଆବଣ୍ଟନ କରିଥିବା ନେଇ ରକେର୍ଡରୁ ଜଣାପଡ଼ିଛି ବୋଲି ଖଣ୍ଡପୀଠ କହିଛନ୍ତି । ଆଜମ ଖାନ ସହରୀ ବିକାଶ ଏବଂ ସଂଖ୍ୟାଲଗୁ କଲ୍ୟାଣ ମନ୍ତ୍ରୀ ଥିବା ବେଳେ ଜମିର ଆବଣ୍ଟନ କରିଥିଲେ । ସରକାରୀ ଜମିକୁ ପରିବାରର ଟ୍ରଷ୍ଟକୁ ଦେଇଥିଲେ ଏବଂ ସେଥିରେ ସେ ଜଣେ ସଦସ୍ୟ ମଧ୍ୟ ଅଛନ୍ତି । ସେପଟେ ସରକାରୀ ଜମି ପାଇଁ ଉଦ୍ଦିଷ୍ଟ ପଟ୍ଟାକୁ କିଭଳି ବେସରକାରୀ ଟ୍ରଷ୍ଟକୁ ଦେଇଥିଲେ ବୋଲି ଆଜମ ଖାନଙ୍କୁ ପ୍ରଶ୍ନ କରିଛନ୍ତି ସୁପ୍ରିମକୋର୍ଟ ।
ସୂଚନାଯୋଗ୍ୟ, ସପାର ବରିଷ୍ଠ ନେତା ଆଜମ ଖାନ ଏବେ ଉତ୍ତର ପ୍ରଦେଶର ସୀତାପୁର ଜେଲରେ ଅଛନ୍ତି । ଜବରଦଖଲ ସମେତ ବିଭିନ୍ନ ମାମାଲାରେ ସେ ଦୋଷୀ ସାବ୍ୟସ୍ତ ହୋଇଥିଲେ । ଏହା ପୂର୍ବରୁ ଆହ୍ଲାବାଦ ହାଇକୋର୍ଟ ଟ୍ରଷ୍ଟର ଆବେଦନକୁ ଖାରଜ କରିଦେଇଥିଲେ । ଯେଉଁ ଜମି ଉପରେ ପ୍ରଶିକ୍ଷଣ ଓ ଗବେଷଣା ପ୍ରତିଷ୍ଠାନ ଗଢ଼ି ଉଠିଥିଲା ସେହି ଜମିକୁ ୨୦୧୫ରେ ଟ୍ରଷ୍ଟକୁ ଦେଇଥିଲେ ଆଜମ ଖାନ । ତେବେ ଏସଆଇଟିର ତଦନ୍ତ ପରେ ୨୦୨୩ରେ ରାଜ୍ୟ ସରକାର ଟ୍ରଷ୍ଟ ସହ ଜମି ବୁଝାମଣାକୁ ରଦ୍ଦ କରିଦେଇଥିଲେ ।
