କୋଲକାତା: ପଶ୍ଚିମବଙ୍ଗର ନଦିଆ ଜିଲ୍ଲାର କାଲିଗଞ୍ଜ ବିଧାନସଭା ଉପନିର୍ବାଚନର ଭୋଟ୍ ଗଣନା ସମୟରେ ଏକ ଅଭାବନୀୟ ଘଟଣାରେ ଜଣେ ୧୦ ବର୍ଷୀୟ ଶିଶୁକନ୍ୟାର ମୃତ୍ୟୁ ଘଟିଛି। ବାରୋଚାନ୍ଦଗର ଗାଁରେ ଏକ ହାତ ଛଟା ବୋମା ବିସ୍ଫୋରଣ ହେତୁ ଚତୁର୍ଥ ଶ୍ରେଣୀରେ ପଢ଼ୁଥିବା ତମନ୍ନା ଖାତୁନ ଗୁରୁତର ଆହତ ହୋଇଥିଲେ ଏବଂ ପରେ ତାଙ୍କର ମୃତ୍ୟୁ ହୋଇଥିବା ନେଇ ସୂଚନା ମିଳିଛି। ଏହି ଘଟଣା ସମୟରେ ତୃଣମୂଳ କଂଗ୍ରେସ (ଟିଏମସି) ନିର୍ବାଚନରେ ବଡ଼ ବ୍ୟବଧାନରେ ଆଗୁଆ ଥିଲା। ଓ ଏହି ବିଜୟ ଖୁସି ବେଳେ ଏହି ଦୁର୍ଘଟଣା ଘଟିଥିବା ଜଣାପଡିଛି।
ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହି ଘଟଣା ପ୍ରତି ଗଭୀର ଦୁଃଖ ପ୍ରକାଶ କରିଛନ୍ତି। ସେ ଏକ ବିବୃତିରେ କହିଛନ୍ତି, “ବାରୋଚାନ୍ଦଗରରେ ବିସ୍ଫୋରଣରେ ଜଣେ ନାବାଳିକାର ମୃତ୍ୟୁ ମୋତେ ଆଘାତ ଦେଇଛି। ମୁଁ ତାଙ୍କ ପରିବାର ପ୍ରତି ସମବେଦନା ଜଣାଉଛି। ପୁଲିସ ଦୋଷୀମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନେବ।” କୃଷ୍ଣାନଗର ପୁଲିସ ଜିଲ୍ଲାର ଏସପି କେ. ଅମରନାଥ ଘଟଣାସ୍ଥଳ ପରିଦର୍ଶନ କରି ଦୋଷୀମାନଙ୍କୁ ଗିରଫ କରିବାକୁ ପ୍ରତିଶ୍ରୁତି ଦେଇଛନ୍ତି। ଏପର୍ଯ୍ୟନ୍ତ ଯାଏଁ ଜଣେ ବ୍ୟକ୍ତିଙ୍କୁ ଗିରଫ କରାଯାଇଛି।
ବିରୋଧୀ ଦଳ ଭାରତୀୟ ଜନତା ପାର୍ଟି (ବିଜେପି) ଏହି ଘଟଣାକୁ ନେଇ ମମତା ସରକାରଙ୍କୁ ଟାର୍ଗେଟ କରିଛି। ବିଜେପି ଅଭିଯୋଗ କରିଛି ଯେ ଟିଏମସି କର୍ମୀମାନେ ବିଜୟ ଉତ୍ସବ ସମୟରେ ସିପିଆଇ(ଏମ) ସମର୍ଥକଙ୍କ ଘର ଆଡ଼କୁ ବୋମା ଫିଙ୍ଗିଥିଲେ। ଯାହା ଫଳରେ ଏହି ଦୁର୍ଘଟଣା ଘଟିଛି। ତମନ୍ନାଙ୍କ ମା’ ସବିନା ୟାସମିନ ଅଭିଯୋଗ କରିଛନ୍ତି ଯେ ସେ ବୋମା ଫିଙ୍ଗୁଥିବା ଲୋକମାନଙ୍କ ମୁହଁ ଦେଖିଥିଲେ।
ଏହି ଘଟଣା ପଶ୍ଚିମବଙ୍ଗରେ ନିର୍ବାଚନୀ ହିଂସାର ଦୀର୍ଘ ଇତିହାସକୁ ପୁନର୍ବାର ଆଲୋଚନାକୁ ଆଣିଛି। ପୂର୍ବରୁ ୨୦୨୧ ବିଧାନସଭା ନିର୍ବାଚନ ଓ ୨୦୨୩ ପଞ୍ଚାୟତ ନିର୍ବାଚନ ପରେ ମଧ୍ୟ ହିଂସାରେ ଅନେକ ଲୋକଙ୍କ ଜୀବନ ଯାଇଥିଲା। ନିର୍ବାଚନ ଆୟୋଗ ଏହି ଘଟଣାର ବିସ୍ତୃତ ରିପୋର୍ଟ ମାଗିଛନ୍ତି ଏବଂ ଆଗାମୀ ୨୦୨୬ ବିଧାନସଭା ନିର୍ବାଚନ ପୂର୍ବରୁ କଡ଼ା ନିୟମ ଲାଗୁ କରିବା ଉପରେ ଆଲୋଚନା କରୁଛନ୍ତି।
ପୁଲିସ ତଦନ୍ତ ଜାରି ରଖିଛି ଏବଂ ଏହି ମାମଲାରେ ସମ୍ପୃକ୍ତ ଅଧିକ ଅଭିଯୁକ୍ତଙ୍କୁ ଗିରଫ କରିବା ପାଇଁ ଚେଷ୍ଟା କରୁଛି। ଏହି ଘଟଣା ସ୍ଥାନୀୟ ଅଞ୍ଚଳରେ ଉତ୍ତେଜନା ସୃଷ୍ଟି କରିଛି ଏବଂ ରାଜନୈତିକ ଦଳମାନଙ୍କ ମଧ୍ୟରେ ବାକ୍ଯୁଦ୍ଧ ତୀବ୍ର ହେବାରେ ଲାଗିଛି।
