ନୂଆଦିଲ୍ଲୀ: ଆମେରିକା ସରକାରଙ୍କ ଷ୍ଟେଟ୍ ଡିପାର୍ଟମେଣ୍ଟ ଶନିବାର ଦିନ ଏକ ଗୁରୁତ୍ୱପୂର୍ଣ୍ଣ ଚେତାବନୀ ଜାରି କରି ସିରିଆରେ ଥିବା ତାଙ୍କ ନାଗରିକମାନଙ୍କୁ ସତର୍କ କରାଇଛନ୍ତି। ଏହି ଚେତାବନୀ ଅନୁସାରେ, ଆସନ୍ତା ଈଦ୍ ଉଲ୍-ଫିତର ଉତ୍ସବ ସମୟରେ ସିରିଆରେ ଆତଙ୍କବାଦୀ ଆକ୍ରମଣର ସମ୍ଭାବନା ରହିଛି। ଆତଙ୍କବାଦିମାନେ ଏହି ଆକ୍ରମଣ ଦୂତାବାସ, ଅନ୍ତର୍ଜାତୀୟ ସଂଗଠନ ଏବଂ ଦାମାସକସ୍ରେ ଥିବା ସରକାରୀ ଅନୁଷ୍ଠାନଗୁଡ଼ିକୁ ଟାର୍ଗେଟ୍ କରିପାରନ୍ତି ବୋଲି ଆଶଙ୍କା ପ୍ରକାଶ କରାଯାଉଛି।
ଷ୍ଟେଟ୍ ଡିପାର୍ଟମେଣ୍ଟ କହିଛନ୍ତି ଯେ, ଏକାକ ଆକ୍ରମଣକାରୀ, ସଶସ୍ତ୍ର ବନ୍ଦୁକଧାରୀ କିମ୍ବା ବିସ୍ଫୋରକ ଜରିଆରେ ଏହି ଆକ୍ରମଣ ହୋଇପାରେ। ଏହି ସୂଚନା ସହିତ ଆମେରିକୀୟ ନାଗରିକମାନଙ୍କୁ ତୁରନ୍ତ ସିରିଆ ତ୍ୟାଗ କରିବାକୁ ଅନୁରୋଧ କରାଯାଇଛି। ଏହା ସହିତ ସିରିଆ ପାଇଁ 'ଲେଭେଲ୍ ୪: ଡୁ ନଟ ଟ୍ରାଭେଲ' ଚେତାବନୀ ଜାରି କରାଯାଇଛି। ଏହି ସ୍ତରର ସୂଚକାଙ୍କ ସାଧାରଣତ ଆତଙ୍କବାଦ, ଗୃହଯୁଦ୍ଧ, ଅପହରଣ, ସଶସ୍ତ୍ର ଆକ୍ରମଣ ଏବଂ ବନ୍ଧକ ହେବାର ଆଶଙ୍କାକୁ ଆଧାର କରି ଜାରି କରାଯାଇଛି।
ବର୍ତ୍ତମାନ ସିରିଆରେ ଚାଲିଥିବା ଅସ୍ଥିର ପରିସ୍ଥିତି, ଆତଙ୍କବାଦୀ କାର୍ଯ୍ୟକଳାପ ଏବଂ ଅନ୍ୟାନ୍ୟ ସୁରକ୍ଷା ବିପଦକୁ ଦୃଷ୍ଟିରେ ରଖି ଆମେରିକା ଏହି ପଦକ୍ଷେପ ନେଇଛି। ଦମାସ୍କସରେ ଥିବା ଆମେରିକୀୟ ଦୁତାବାସ ୨୦୧୨ ପରଠୁ ବନ୍ଦ ରହିଛି। ତେଣୁ ସିରିଆରେ ଥିବା ଆମେରିକୀୟ ନାଗରିକମାନଙ୍କୁ ଆମେରିକା ଜରୁରିକାଳୀନ ସେବା ଯୋଗାଇ ପାରୁନାହିଁ। ଏଣୁ ନିଜ ନାଗରିକମାନଙ୍କୁ ସତ୍ତର୍କ କରିବା ପାଇଁ ଆମେରିକା ଏହି ସର୍କ୍ୟୁଲାର ଜାରି କରିଥିବା ଜଣାପଡିଛି।
