ୱାଶିଂଟନ୍, ୧୦/୦୩: ଆମେରିକା ମିସୌରି ରାଜ୍ୟର ଜଣେ ବିଚାରପତି କୋଭିଡ୍-୧୯ ମହାମାରୀ ତଥ୍ୟକୁ ଚୀନ୍ ଆରମ୍ଭରୁ ଦୁନିଆ ପାଇଁ ଲୁଚାଇଥିଲା ବୋଲି କହିଛନ୍ତି । ସାରା ବିଶ୍ୱକୁ ଭ୍ରମିତ କରିବା ପାଇଁ ଜଜ୍ ଷ୍ଟିଫେନ୍ ଏନ୍ ଲିବାଗ୍ ଚୀନ୍କୁ ଦୋଷୀ ସାବ୍ୟସ୍ତ କରିଛନ୍ତି । ଏଥିଲାଗି ଚୀନ୍ ଉପରେ ସେ ୨୪ ବିଲିୟନ ଡଲାର(ପ୍ରାୟ ୨ ଲକ୍ଷ ୯ ହଜାର ୧୬୦ କୋଟି ଟଙ୍କା) ଟଙ୍କା ଜରିମାନା ଲଗାଇଛନ୍ତି ।
୨୦୨୦ରେ ମିସୋରି ଆଟର୍ଣ୍ଣି ଜେନେରାଲଙ୍କ ପକ୍ଷରୁ ଚୀନ୍ ସରକାରଙ୍କ ବିରୋଧରେ ପିଟିସନ ଫାଇଲ ହୋଇଥିଲା । ଚୀନ୍ ସରକାର କୋଭିଡ୍ ଭୂତାଣୁ ବାବଦରେ ତଥ୍ୟ ଲୁଚାଇବା ଏବଂ ଦୁନିଆରେ ବ୍ୟକ୍ତିଗତ ସୁରକ୍ଷା ଉପକରଣ ବା ପିପିଇ କିଟ୍ ଯୋଗାଣରେ ବାଧା ଉପୁଜାଇଥିବା ପିଟିସନରେ ଦର୍ଶାଯାଇଥିଲା । ଏଥିସହ ମହାମାରୀ ଯୋଗୁ ଦୁନିଆ ବିପଦରେ ପଡ଼ିଥିବାବେଳେ ଚୀନ୍ ସଭିଁଙ୍କୁ ଭ୍ରମିତ କରିବାରେ ଲାଗିଥିଲା ବୋଲି ଅଭିଯୋଗ ହୋଇଥିଲା ।
ବିଚାରପତି ଲିମ୍ବାଗ୍ କହିଥିଲେ, ଚୀନ୍ ଦ୍ୱାରା ପିପିଇ କିଟ୍ର ବୈଶ୍ୱିକ ଯୋଗାଣରେ ବାଧା ସୃଷ୍ଟି କରାଯାଇଥିଲା । ବିଶ୍ୱକୁ ଏହି ଏସୀୟ ଦେଶ ଭ୍ରମିତ କରିବା ସହ ପିପିଇ କିଟ୍ ରଖିବା ଲାଗି ଏକଚାଟିଆ କାର୍ଯ୍ୟରେ ଲିପ୍ତ ଥିଲା । ଏଥିଯୋଗୁ ଆମେରିକାରେ ମହାମାରୀ ମୁକାବିଲା କରିବା ଲାଗି ପର୍ଯ୍ୟାପ୍ତ ଉପକରଣ କ୍ରୟ କରିବା ଏକପ୍ରକାର ଅସମ୍ଭବ ହୋଇପଡ଼ିଥିଲା । ଏଥିପାଇଁ ଚୀନ୍ର ଶାସକ କମ୍ୟୁନିଷ୍ଟ ଦଳ, ସେଠାକାର ସରକାର,ସ୍ୱାସ୍ଥ୍ୟ ଏଜେନ୍ସି ଏବଂ ସେଠାକାର ଲାବ୍ ଦାୟୀ । ଚୀନ୍ ରାଜ୍ୟ ଏବଂ ସଂଘୀୟ ଏକାଧିକାର ବିରୋଧ ଆଇନ ଉଲ୍ଲଂଘନ କରିଥିଲା । ଏହା ଦ୍ୱାରା ମିସୌରୀ ଟିକସ ହରାଇବା ସହ ପିପିଇ କିଟ୍ ବାବଦ ଖର୍ଚ୍ଚ ବୃଦ୍ଧି ଯୋଗୁ ଯଥେଷ୍ଟ କ୍ଷତି ସହିଥିବା ବିଚାରପତି ଲିମ୍ବାଗ କହିଥିଲେ ।
ମିସୌରୀ ଆଟର୍ଣ୍ଣି ଜେନେରାଲ ଆଣ୍ଡ୍ର୍ୟୁ ବେଲି କହିଛନ୍ତି, ଅଦାଲତ ଐତିହାସିକ ରାୟ ଦେଇଛନ୍ତି । ଚୀନ୍ ଅଦାଲତରେ ହାଜର ହେବାକୁ ମନା କରିଥିଲା । ହେଲେ କୋଭିଡ୍ ଯୋଗୁ ହୋଇଥିବା ଆର୍ଥିକ କଷ୍ଟ ଏବଂ ଅସରନ୍ତି ଦୁଃଖର ଉତ୍ତରଦାୟିତ୍ୱରୁ ଚୀନ୍ ବର୍ତ୍ତି ପାରିବ ନାହିଁ । ଏଠାରେ ଥିବା ଚୀନ୍ର ସମସ୍ତ ସମ୍ପତ୍ତି ବାଜ୍ୟାପ୍ତ କରାଯିବ ଏବଂ ସବୁ ରାଶି ଅସୁଲ ହେବ ।
ଏ ନେଇ ୱାଶିଂଟନ୍ରେ ଥିବା ଚୀନ୍ ଦୁତାବାସର ଜଣେ ମୁଖପାତ୍ର କହିଛନ୍ତି, ମିସୌରୀ ଅଦାଲତଙ୍କ ରାୟକୁ ଚୀନ୍ କେବେ ବି ସ୍ୱୀକାର କରିବ ନାହିଁ । ଏଭଳି ମକଦ୍ଦମା ସମ୍ପୂର୍ଣ୍ଣ ଅବାସ୍ତବିକ । ଏଥିଯୋଗୁ ଚୀନ୍ର ସ୍ୱାର୍ଥ କ୍ଷତିଗ୍ରସ୍ତ ହେଲେ ଅନ୍ତର୍ଜାତୀୟ ଆଇନ ଅନୁସାରେ ଏହା ବିରୋଧରେ ଦୃଢ଼ ପଦକ୍ଷେପ ନିଆଯିବ ।
