ନୂଆଦିଲ୍ଲୀ,୦୫/୧୦: ଡୋନାଲ୍ଡ ଟ୍ରମ୍ପଙ୍କୁ ଝଟକା । ୧୮ ବର୍ଷ ବୟସ ହେବା ପରେ ଏକା ଆମେରିକା ଆସିଥିବା ଅବୈଧ ପ୍ରବାସୀ ପିଲାଙ୍କୁ ଅଟକ କେନ୍ଦ୍ରକୁ ପଠାଇବା ଉପରେ ଲାଗିଲା ରୋକ୍ । ଆମେରିକାର ସଂଘୀୟ ବିଚାରପତି ଟ୍ରମ୍ପ ପ୍ରଶାସନର ଏହି ନୂଆ ନୀତି ଉପରେ ଅସ୍ଥାୟୀ ଭାବ ରୋକ୍ ଲଗାଇଛନ୍ତି । ବିଚାରପତି ରୁଡୋଲଫ୍ କଣ୍ଟରେରାସ୍ ଆମେରିକାର ଇମିଗ୍ରେସନ ଏବଂ କଷ୍ଟମ୍ସ ପ୍ରବର୍ତ୍ତନକୁ ଏପରି କୌଣସି ପିଲାଙ୍କୁ ହେପାଜତରେ ନ ରଖିବାକୁ ନିର୍ଦ୍ଦେଶ ଦେଇଛନ୍ତି।
ବିଚାରପତି କହିଛନ୍ତି ଯେ, ଏହି ନିୟମ ୨୦୨୧ ମସିହାରେ କୋର୍ଟଙ୍କ ଦ୍ବାରା ଦିଆଯାଇଥିବା ଆଦେଶକୁ ଉଲ୍ଲଂଘନ କରୁଛି। ଆଇନଜୀବୀଙ୍କ ଆହ୍ୱାନ ପରେ ବିଚାରପତି ଏହି ନିଷ୍ପତ୍ତି ନେଇଛନ୍ତି । ଏହି ଆଦେଶର ଲକ୍ଷ୍ୟ ହେଉଛି, ବିନା ଅନୁମତିରେ ଆମେରିକାରେ ପ୍ରବେଶ କରିଥିବା ପ୍ରବାସୀ ପିଲାମାନଙ୍କର ସୁରକ୍ଷା ସୁନିଶ୍ଚିତ କରିବା ଏବଂ ସେମାନଙ୍କ ଅଧିକାରକୁ ସୁରକ୍ଷା ଦେବା। ଅନ୍ୟପଟେ ଅବୈଧ ପ୍ରବାସୀ ପିଲାଙ୍କୁ ନିଜ ଦେଶକୁ ପଠାଇବା ପାଇଁ ୨,୫୦୦ ଡଲାର ପ୍ରଦାନ କରିବାକୁ ସୁପାରିସ୍ କରାଯାଇଛି । ଗତ ମାସରେ ଅନ୍ୟ ଜଣେ ଫେଡେରାଲ୍ ବିଚାରପତି ଆମେରିକାରେ ଏକାକୀ ପ୍ରବେଶ କରିଥିବା ଗ୍ୱାଟେମାଲାନ୍ ପିଲାମାନଙ୍କୁ ତୁରନ୍ତ ଦେଶାନ୍ତର କରିବା ପ୍ରୟାସକୁ ଅବରୋଧ କରିଥିଲେ। ସେହି ବିଳମ୍ବିତ ରାତିର ଅପରେସନ୍ ସମୟରେ କିଛି ପିଲାଙ୍କୁ ବିମାନରେ ବସାଇ ଦିଆଯାଇଥିଲା, କିନ୍ତୁ ବିଚାରପତି ଏହା ଉପରେ ରୋକ୍ ମଧ୍ୟ ଲଗାଇଛନ୍ତି ।
ଆମେରିକୀୟ ଇମିଗ୍ରେସନ କାଉନସିଲର ଜଣେ ଆଇନଜୀବୀ ମିଶେଲ ଲାପଏଣ୍ଟ କହିଛନ୍ତି ଯେ, ଏହି ନୀତି ଯୁବ ପ୍ରବାସୀମାନଙ୍କୁ ଆମେରିକାରେ ସୁରକ୍ଷା ପାଇବାର ଅଧିକାର ସହିତ ବୁଝାମଣା କରିବାକୁ ବାଧ୍ୟ କରିବାର ଏକ ରଣନୀତିର ଅଂଶ। ବିଚାରପତି କଣ୍ଟରେରାସଙ୍କ ୨୦୨ ଆଦେଶ ଅନୁଯାୟୀ ପିଲାମାନଙ୍କୁ ୧୮ ବର୍ଷ ବୟସ ହେବା ପରେ ସର୍ବନିମ୍ନ ପ୍ରତିବନ୍ଧକପୂର୍ଣ୍ଣ ସ୍ଥାନରେ ମୁକ୍ତ କରାଯିବା ଆବଶ୍ୟକ। ପ୍ରକାଶ ଥାଉକି,ଆମେରିକା ସୀମା ଅଧିକାରୀମାନେ ଅକ୍ଟୋବର ୨୦୨୧ ପରଠାରୁ ଏପର୍ଯ୍ୟନ୍ତ ସେମାନଙ୍କ ପିତାମାତାଙ୍କ ବିନା ସୀମା ପାର କରୁଥିବା ପିଲାମାନଙ୍କୁ ୪ଲକ୍ଷରୁ ଅଧିକ ଥର ଗିରଫ କରାଯାଇଛି। ୨୦୦୮ର ଏକ ଆଇନ ଅନୁଯାୟୀ, ସେମାନଙ୍କୁ ନିଜ ଦେଶକୁ ଫେରାଇବା ପୂର୍ବରୁ ଜଣେ ଇମିଗ୍ରେସନ ବିଚାରପତିଙ୍କ ସମ୍ମୁଖରେ ହାଜର ହେବା ବାଧ୍ୟତାମୂଳକ।
