ନୂଆଦିଲ୍ଲୀ,୦୩/୦୬: ଆଉ କିଛି ଘଣ୍ଟା ପରେ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଏବଂ ପଞ୍ଜାବ କିଙ୍ଗ୍ସ ମଧ୍ୟରେ ଆଇପିଏଲ୍ ଟାଇଟଲ ପାଇଁ ଲଢ଼େଇ ହେବ । ଫାଇନାଲ ସହ ଦୁଇ ଦଳର ଭାବପ୍ରବଣତା ଜଡ଼ିତ । ୧୮ ବର୍ଷ ହେଲା ସେମାନେ ଟ୍ରଫି ଜିତିବା ପାଇଁ ଅପେକ୍ଷା କରିଛନ୍ତି। ଗୋଟିଏ ଦଳର ସ୍ୱପ୍ନ ପୂରଣ ହେବ ଆଉ ଗୋଟିଏ ଦଳକୁ ନିରାଶ ହେବାକୁ ପଡ଼ିବ । ଅହମ୍ମଦାବାଦରେ ମଙ୍ଗଳବାର ବର୍ଷା ହେବାର ସମ୍ଭାବନା ରହିଛି । ତେଣୁ ଯଦି ବର୍ଷା ହୁଏ, ଖେଳ ହୋଇ ନପାରେ ତେବେ କ’ଣ ହେବ? ଏ ପ୍ରଶ୍ନ ସମସ୍ତଙ୍କ ମନକୁ ଆସୁଥିବ ନିଶ୍ଚିତ ।
ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, ‘ଫାଇନାଲରେ ବର୍ଷା ବାଧକ ସାଜିଲେ ଅତିରିକ୍ତ ୧୨୦ ମିନିଟର ସହାୟତା ନିଆଯାଇ ପାରିବ। ଯଦି ସଂପୂର୍ଣ୍ଣ ଦିବସଟି ଧୋଇ ଯାଏ, ତେବେ ୪ ତାରିଖ ରିଜର୍ଭ ଡେ’ରେ ଫାଇନାଲ ଖେଳାଯିବ । ସେହିପରି ରିଜର୍ଭ ଡେ’ ଯଦି ବର୍ଷାରେ ଧୋଇ ଯାଏ ତାହା ହେଲେ ଲିଗ୍ ପର୍ଯ୍ୟାୟରେ ଦୁହିଁଙ୍କ ମଧ୍ୟରୁ ପଏଣ୍ଟ ଟେବୁଲରେ ଯେଉଁ ଦଳ ଶୀର୍ଷରେ ରହିଥିବ ତାହାକୁ ବିଜେତା ଘୋଷଣା କରାଯିବ । ଏମିତି ହେଲେ ପଞ୍ଜାବ କିଙ୍ଗ୍ସ ଚାମ୍ପିଅନ ହେବ । କାରଣ ଲିଗ୍ ପର୍ଯ୍ୟାୟରେ ଦଳ ଟେବୁଲର ଶୀର୍ଷ ସ୍ଥାନରେ ରହିଥିଲା।’
