ମୁମ୍ବାଇ ୦୬/୦୪: ଏକ ବିମାନରେ ଅଜବ ଘଟଣା ଘଟିଛି । ବିମାନ ଭିତରେ ଦୁଇ ମହିଳା ଯାତ୍ରୀଙ୍କ ମଧ୍ୟରେ ଭୀଷଣ ମାର୍ପିଟ୍ ଆରମ୍ଭ ହେଲା । ଲୋକେ ସେମାନଙ୍କୁ ଅଟକାଇବାକୁ ଚେଷ୍ଟା କରିବାରୁ ଝଗଡ଼ାର ଯେଉଁ କାରଣ ସାମ୍ନାକୁ ଆସିଲା, ତାହା ଅତ୍ୟନ୍ତ ଅଜବ ଥିଲା । ମହିଳା ଯାତ୍ରୀଙ୍କ ଝଗଡ଼ା ଯୋଗୁ ବିମାନ ୨ ଘଣ୍ଟା ବିଳମ୍ବରେ ଉଡ଼ିଲା ।
ଘଟଣା ଚୀନ୍ର ଶେନ୍ଜେନ ଏୟାରଲାଇନ୍ସର ଏକ ବିମାନରେ ଘଟିଛି । ଏଥିରେ ଦୁଇ ମହିଳା ଯାତ୍ରୀଙ୍କ ମଧ୍ୟରେ ଶରୀର ଦୁର୍ଗନ୍ଧ ଓ ପର୍ଫ୍ୟୁମ୍ର ଉତ୍କଟ ଗନ୍ଧକୁ ନେଇ ବିବାଦ ହିଂସ୍ର ରୂପ ନେଲା । ଉଭୟ ଯାତ୍ରୀଙ୍କ ଝଗଡ଼ାରେ ହସ୍ତକ୍ଷେପ କରିଥିବା ଜଣେ ବିମାନ କର୍ମଚାରୀଙ୍କ ହାତକୁ ଜଣେ ଯାତ୍ରୀ କାମୁଡ଼ିଦେଲେ । ବିମାନରେ ଜଣେ ମହିଳା ଯାତ୍ରୀ ଅନ୍ୟ ଜଣେ ମହିଳା ଯାତ୍ରୀଙ୍କ ଶରୀର ଗନ୍ଧକୁ ନେଇ ଆପତ୍ତି ଉଠାଇଲେ । ଏହାର ପ୍ରତିକ୍ରିୟାରେ ଅନ୍ୟ ମହିଳା ମଧ୍ୟ ତାଙ୍କ ଅତର ଗନ୍ଧକୁ ନେଇ ଆପତ୍ତି କଲେ । ଝଗଡ଼ା ଖୁବ୍ଶୀଘ୍ର ମାର୍ପିଟ୍ରେ ରୂପାନ୍ତର ହେଲା ।
ସ୍ଥିତି ନିୟନ୍ତ୍ରଣ କରିବାକୁ ପହଞ୍ଚିଥିବା ବିମାନ କର୍ମଚାରୀ ଏହାର ଶିକାର ହେଲେ । ତାଙ୍କ ହାତକୁ ଜଣେ ମହିଳା କାମୁଡ଼ିଦେଲେ । ଅନ୍ୟ ଜଣେ ଯାତ୍ରୀ ମଧ୍ୟ ଏହି ଘଟଣାରେ ଆହତ ହେଲେ । ବିମାନ କର୍ମଚାରୀଙ୍କୁ ହସ୍ପିଟାଲ ନିଆଗଲା । ବିବାଦ ଆରମ୍ଭ ହେବା ପରେ ଦୁଇଜଣ ମହିଳା ଫ୍ଲାଇଟ୍ ଆଟେଣ୍ଡାଣ୍ଟ୍ ଓ ଦୁଇ ପୁରୁଷ ସହକର୍ମୀ ସେମାନଙ୍କୁ ଅଟକାଇବାକୁ ଚେଷ୍ଟା କରିଥିଲେ । ଘଟଣା ପରେ ଦୁଇ ଯାତ୍ରୀଙ୍କୁ ପୁଲିସ ଗିରଫ କଲା । ଅନ୍ୟ ଯାତ୍ରୀଙ୍କୁ ବିମାନରୁ ଓହ୍ଲାଇ ଦିଆଗଲା ଏବଂ ଦୁଇ ଘଣ୍ଟା ବିଳମ୍ବରେ ସେମାନଙ୍କ ବିମାନ ଛାଡ଼ିଲା ।
