ଭୁବନେଶ୍ଵର, ୦୬/୦୩ : ନିଶା ନିବାରଣ କେନ୍ଦ୍ରରେ ଯୁବକଙ୍କୁ ପିଟିପିଟି ହତ୍ୟା। ମୃତ ଯୁବକ ଜଣଙ୍କ ହେଲେ ଭୁବନେଶ୍ଵର ଲକ୍ଷ୍ମୀସାଗର ଅଞ୍ଚଳର ଶୁଭାଶିଷ ନାୟକ। ଶୁଭାଶିଷଙ୍କ ବାପା ଏନେଇ ଥାନାରେ ଅଭିଯୋଗ କରିଛନ୍ତି। ପିପିଲି ଉତ୍ତରା ନିକଟସ୍ଥ ଦିଶା ଫାଉଣ୍ଡେସନ ବିରୋଧରେ ଏଭଳି ଅଭିଯୋଗ ଆସିଛି। ପୋଲିସ ଏହି ଘଟଣାରେ ୭ ଜଣଙ୍କୁ ଅଟକ ରଖି ପଚରାଉଚରା କରୁଛି।
ସୂଚନାନୁଯାୟୀ, ଭୁବନେଶ୍ଵର ଲକ୍ଷ୍ମୀସାଗର ଅଞ୍ଚଳର ଶୁଭାଶିଷ ନାୟକ ପିପିଲି ଉତ୍ତରା ନିକଟସ୍ଥ ଦିଶା ନିଶା ନିବାରଣ କେନ୍ଦ୍ରରେ ରହୁଥିଲେ। ବୁଧବାର ରାତିରେ ତାଙ୍କର ମୃତ୍ୟୁ ହୋଇଥିଲା। ଏନେଇ ପରିବାର ଲୋକଙ୍କୁ ଖବର ଦିଆଯାଇଥିଲା। ତେବେ ଶୁଭାଶିଷଙ୍କୁ ପିଟିପିଟି ମାରି ଦିଆଯାଇଥିବା ତାଙ୍କ ବାପା ନବକୃଷ୍ଣ ନାୟକ ଅଭିଯୋଗ କରିଛନ୍ତି। ଏହାପରେ ପିପିଲି ପୋଲିସ ଏବଂ ଫରେନସିକ୍ ଟିମ୍ ପହଞ୍ଚି ତଦନ୍ତ ଆରମ୍ଭ କରିଛି। ଘଟଣାସ୍ଥଳରୁ ପ୍ଲାଷ୍ଟିକ ଲାଠି ଏବଂ ସିସିଟିଭି ହାର୍ଡ ଡିସ୍କ ଜବତ ହୋଇଛି। ଯୁବକଙ୍କୁ ହତ୍ୟା ସନ୍ଦେହରେ ପୋଲିସ ୭ ଜଣଙ୍କୁ ଅଟକ ରଖି ପଚରାଉଚରା କରୁଛି।
ସୂଚନା ଥାଉକି, ୨୦୨୧ ମସିହାରେ ଦିଶା ଫାଉଣ୍ଡେସନର ଜଣେ ଅନ୍ତେବାସୀଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଥିଲା। ଏବେ ଶୁଭାଶିଷଙ୍କ ହତ୍ୟା ଖବର ମିଳିବା ପରେ ଅନ୍ୟ ଅନ୍ତେବାସୀଙ୍କୁ ସେମାନଙ୍କ ପରିବାର ଲୋକ ଆସି ଘରକୁ ଫେରାଇ ନେଉଛନ୍ତି।
ଏହି ଖବରଟିକୁ ପଢନ୍ତୁ-ନୂଆ ବାସଭବନରେ ମୁଖ୍ୟମନ୍ତ୍ରୀଙ୍କ ଗୃହ ପ୍ରବେଶ, ୨୬ ବର୍ଷ ପରେ ସିଏମ୍ କ୍ଵାର୍ଟରରେ ରହିବେ ମୋହନ
