ଅନୁଗୁଳ୧୬/୫(ବ୍ୟୁରୋ): ଅନୁଗୁଳ ସଦର ଥାନା ଇଲାକା ତାଳତଇଲା ନିକଟରୁ ଶୁକ୍ରବାର ଦ୍ୱିପ୍ରହର ବେଳେ ଜଣେ ଯୁବକଙ୍କୁ ଦୁର୍ବୃତ୍ତ ଉଠାଇନେଲେ। ଟଙ୍କା ମାଗି ନିରାଶ ହେବାରୁ ନିସ୍ତୁକ ପିଟିଲେ। ସୁନା ଚେନ୍, ମୁଦି, ବ୍ରେସଲେଟ ସହ ପାଖରେ ଥିବା ଟଙ୍କା ଏବଂ ମୋବାଇଲ ନେଇଗଲେ ଦୁର୍ବୃତ୍ତ। ତାଳଚେର ଥାନା ଗୋଡ଼ିବନ୍ଧ ଅଞ୍ଚଳରୁ ଅପହୃତ ଯୁବକଙ୍କୁ ଉଦ୍ଧାର କରାଯାଇଛି।
ପ୍ରକାଶ ଯେ, ଗୋପାଳପ୍ରସାଦ ଥାନା ଅନ୍ତର୍ଗତ ସୋଲଡ଼ା ଗ୍ରାମର ଦୀପକ ପ୍ରଧାନ ସ୍କୁଟରରେ ତାଳତଇଲା ସ୍ଥିତ ଘରକୁ ଆସୁଥିବା ବେଳେ କୁଇଓ ଠାରେ ୪ ଜଣ ଦୁର୍ବୃତ୍ତ ଗୋଟେ କାରରେ ଆସି ତାଙ୍କୁ ମାରଣାସ୍ତ୍ର ଦେଖାଇ ଅଟକାଇ ଥିଲେ। ଦୀପକ ଅଟକିବା ପରେ ତାଙ୍କୁ କାରରେ ଉଠାଇ ନେଇଥିଲେ। ଗୋଡ଼ିବନ୍ଧ ବଙ୍ଗାରୁ ନିକଟସ୍ଥ ଜଙ୍ଗଲରେ ତାଙ୍କ ହାତଗୋଡ଼ ବାନ୍ଧି ନିସ୍ତୁକ ମାଡ଼ ମାରିବା ସହ ୩୦ ଲକ୍ଷ ଟଙ୍କା ଦାବି କରିଥିଲେ। ଟଙ୍କା ନଦେଲେ କିମ୍ବା ପୁଲିସକୁ ଜଣାଇଲେ ଜୀବନରୁ ମାରିଦେବା ପାଇଁ ଧମକ ଦେଇଥିଲେ।
ସୌଭାଗ୍ୟବଶତଃ ନିକଟସ୍ଥ ଇଟା ଭାଟିରେ କାମ କରୁଥିବା କିଛି ଶ୍ରମିକ ଦେଖି ଗୋଡ଼ିବନ୍ଧ ଫାଣ୍ଡି ପୁଲିସକୁ ଜଣାଇଥିଲେ। ପୁଲିସ ଆସୁଥିବାରଦେଖି ଦୁର୍ବୃତ୍ତ କାର ଛାଡ଼ି ଛୁ' ମାରିଥିଲେ। ପୁଲିସ ଦୀପକଙ୍କୁ ଉଦ୍ଧାର କରିବା ସହ କାର ଜବତ କରିଛି। ଏ ଘଟଣା ପଛରେ କଣ ରହସ୍ୟ ଅଛି ପୁଲିସ ତଦନ୍ତ ଚଳାଇଛି।
