ବଲାଙ୍ଗିର, ୨୫।୬ : ଧୂପ, ଦୀପ, ନଡିଆ ଗୁଆ ସହ ଫୁଲ ମାଳ ଧରି ଶୋଭାଯାତ୍ରାରେ ଆସିଲେ । ଜିଲାପାଳଙ୍କ କାର୍ଯ୍ୟାଳୟକୁ ପଶିବା ମାତ୍ରେ ପୁଲିସ୍ ଅଟକାଇଥିଲେ । କିନ୍ତୁ ସମସ୍ତେ ଗିନା ଓ ଚାମୁଚ ବଜାଇ କାର୍ଯ୍ୟାଳୟକୁ ପଶି ହୁଳହୁଲି ଦେଇଥିଲେ। ବୁଧବାର ବଲାଙ୍ଗିର ଜିଲ୍ଲାପାଳ କାର୍ଯ୍ୟାଳୟରେ ଜିଲ୍ଲା ପରିଷଦ ସଦସ୍ୟମାନେ ଏଭଳି ଅଭିନବ ପ୍ରତିବାଦ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା ।
ମଙ୍ଗଳବାର ଠାରୁ ଜିଲ୍ଲା ପରିଷଦ ସଦସ୍ୟମାନେ ପ୍ରଶାସନର ଅସହଯୋଗ ଏବଂ ପାଣ୍ଠି ପ୍ରଦାନରେ ଅନିୟମିତତାକୁ ପ୍ରସଙ୍ଗ କରି ଆନ୍ଦୋଳନକୁ ଓହ୍ଲାଇଛନ୍ତି। ଏହା ଆଜି ଦ୍ବିତୀୟ ଦିନରେ ପହଞ୍ଚିଛି । ହେଲେ ଅପରାହ୍ନ ପର୍ଯ୍ୟନ୍ତ ବି ଜିଲ୍ଲାପାଳ ଧାରଣାସ୍ଥଳକୁ ଯାଇ ସଭ୍ୟାସଭ୍ୟଙ୍କ ସହ ଆଲୋଚନା କରିନଥିବାରୁ ସମସ୍ତେ ଗିନା,ଚାମଚ ବଜାଇ ଶୋଭାଯାତ୍ରାରେ ଜିଲ୍ଲାପାଳଙ୍କୁ ନିମନ୍ତ୍ରଣ କରିବାକୁ ଯାଇଥିଲେ । ନିଜେ ଜିଲ୍ଲା ପରିଷଦ ଅଧ୍ୟକ୍ଷ ଦେବକୀ ସାହୁ ଫୁଲ, ଚନ୍ଦନ, ଗୁଆ, ନଡିଆ, ଦୀପ ସଜାଇ ଜିଲ୍ଲାପାଳଙ୍କୁ ଧାରଣାସ୍ଥଳକୁ ଯିବା ପାଇଁ ନିବେଦନ କରିଥିଲେ । ଏପରିକି ଅନ୍ୟ ସଭ୍ୟମାନେ ତୁହାକୁତୁହା ହୁଳହୁଳି ଦେଇଥିଲେ । ଯାହାକୁ ନେଇ ଦୀର୍ଘସମୟ ପର୍ଯ୍ୟନ୍ତ ଜିଲ୍ଲାପାଳ ଏବଂ ଜିଲ୍ଲା ପରିଷଦଙ୍କ କାର୍ଯ୍ୟାଳୟ ସମ୍ମୁଖରେ ଆଲୋଚନା ହୋଇଥିଲା। ଶେଷରେ ସଂଧ୍ୟାରେ ଜିଲ୍ଲାପାଳ ଜିଲ୍ଲା ପରିଷଦ କାର୍ଯ୍ୟାଳୟକୁ ଯାଇ ସେଠାରେ ସମସ୍ତଙ୍କ ସହ ଆଲୋଚନା କରିଥିଲେ । ଏଥିସହ ଦାବିପତ୍ର ସରକାରଙ୍କ ନିକଟକୁ ପଠାଇ କିଭଳି ତାହାର ସୁଫଳ ମିଳିବ ସେନେଇ ପଦକ୍ଷେପ ନିଆଯିବ ବୋଲି କହିବା ପରେ ଧାରଣା ପ୍ରତ୍ୟାହୃତ ହୋଇଥିଲା । ଅପରପକ୍ଷେ, ଜିଲ୍ଲାପାଳ ଗୌରବ ଶିଙ୍ଖାଜୀ ଇସଲୱାର କହିଛନ୍ତି ଯେ, ଯେଉଁଦିନ ସଭ୍ୟ/ ସଭ୍ୟମାନେ ଦାବିପତ୍ର ଦେବାକୁ ଆସିଥିଲେ, ସେ ଅନୁପସ୍ଥିତ ଥିଲେ । ପ୍ରଶାସନ ସବୁବେଳେ ଜିଲ୍ଲା ପରିଷଦ ସଭ୍ୟ ସଭ୍ୟଙ୍କୁ ସମସ୍ତ ପ୍ରକାର ସମ୍ମାନ ଓ ସହଯୋଗ ଦେଉଛି ବୋଲି କହିଥିଲେ ।
ସୂଚନାଯୋଗ୍ୟ ଯେ, ସଦସ୍ୟମାନେ କେବିକେ ଜିଲ୍ଲାକୁ ଅନୁଦାନ ପ୍ରଦାନ, ଯୋଜନା ବୋର୍ଡ ଅଧ୍ୟକ୍ଷ ଓ ପଶ୍ଚିମ ଓଡ଼ିଶା ବିକାଶ ପରିଷଦ ଅଧ୍ୟକ୍ଷ ନିଯୁକ୍ତି, ଜିଲ୍ଲାରେ ଜନ ପ୍ରତିନିଧିମାନଙ୍କୁ ସରକାରୀ କାର୍ଯ୍ୟକ୍ରମକୁ ନ ଡାକିବା ଓ ସରକାରୀ କାର୍ଯ୍ୟରେ ପାତରଅନ୍ତର କରାଯାଉଥିବା ଅଭିଯୋଗ କରି ଧାରଣା ଦେଇଥିଲେ ।
