ମାଲକାନଗିରି,୨୪/୪ : ଗାଡି ଯାଞ୍ଚ ସମୟରେ ସନ୍ଦେହ ଜନକ ଭାବେ କାରରୁ ପୋଲିସ ୩୦ଲକ୍ଷ ଟଙ୍କା ଜବତ କରିଛି। ନିର୍ବାଚନ ସମୟରେ ଏତେଗୁଡିଏ ଟଙ୍କା କେଉଁଠୁ ଆସିଲା କେଉଁଠିକି ଯାଉଥିଲା ସେ ସମ୍ପର୍କରେ କାର ରେ ଥିବା ଦୁଇ ଜଣ ବ୍ୟକ୍ତିଙ୍କୁ ଆୟକର ବିଭାଗ ପକ୍ଷରୁ ପଚରା ଉଚରା ଜାରି ଚାଲିଛି।
ମଙ୍ଗଳବାର ରାତିରେ ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ ରାଜ୍ୟ ଆଡୁ ମାଲକାନଗିରି ଅଭିମୁଖେ ଏକ କାର ଦ୍ରୁତଗତିରେ ଆସୁଥିଲା। ମାଲକାନଗିରି ଚାଲାଣଗୁଡା ପୁଲିସ ଚେକ ପୋଷ୍ଟ ଠାରେ ମାଜିଷ୍ଟ୍ରେଷ୍ଟ ଙ୍କ ସହିତ ସ୍ୱତନ୍ତ୍ର ଫ୍ଲାଇଂ ସ୍କ୍ୱାର୍ଡ ପାର୍ଟି ଉକ୍ତ କାର କୁ ଅଟକାଇ ଯାଞ୍ଚ କରିବାରୁ କାର ଭିତରେ ଥିବା ଏକ ଆଟାଚ ମଧ୍ୟରୁ ବିଡ଼ା ବିଡ଼ା ୫୦୦ ଟଙ୍କିଆ ବଣ୍ଡଲ ମିଳିଥିଲା। ସେଗୁଡିକୁ ଗଣିବାରୁ ୩୦ଲକ୍ଷ ଟଙ୍କା ଥିଲା। ପୁଲିସ ଥାନା କୁ ନେଇ ପଚାରିବାରୁ ସେମାନେ କେନ୍ଦୁପତ୍ର ବ୍ୟବସାୟ କରୁଥିବାର ପ୍ରକାଶ କରିଥିଲେ। ସେ ମାନେ ଗତ କାଲି ବ୍ୟାଙ୍କରୁ ଟଙ୍କା ଉଠାଇ ପତ୍ରତୋଳାଳୀଙ୍କୁ ଟଙ୍କା ଦେବାକୁ ଯାଉଥିବାର ପ୍ରକାଶ କରିଥିଲେ। ଏହା ପରେ ପୁଲିସ ସେ ଦୁଇଜଣ ବ୍ୟକ୍ତିଙ୍କ ଅଣ୍ଡରଟେକିଙ୍ଗ ରଖି ଛାଡି ଦେବା ସହିତ ଏ ସମ୍ପର୍କରେ ଆୟକର ବିଭାଗ କୁ ସୂଚନା ଦେଇଥିଲେ। ମାଲକାନଗିରି ଆୟକର ବିଭାଗ ଟଙ୍କା ଜବତ କରି ସେ ଦୁଇଜଣଙ୍କୁ ଜେରା କରିବା ଆରମ୍ଭ କରିଥିବା ବେଳେ ପୁଲିସ ପକ୍ଷରୁ ଅଧିକ ତଦନ୍ତ ଚାଲିଛି।
ଆହୁରି ପଢନ୍ତୁ : ବସକୁ ଧକ୍କା ଦେଲା ଆମ୍ବୁଲାନ୍ସ , ରୋଗୀ ସମେତ ୫ ଗୁରୁତର