ଲକ୍ଷ୍ନୌ: ଭାରତୀୟ କମ୍ୟୁନିଷ୍ଟ ପାର୍ଟି(CPI)ର ନ୍ୟାସନାଲ ସେକ୍ରେଟାରୀ ଅତୁଲ କୁମାର ଅଞ୍ଜନଙ୍କ ପରଲୋକ । ମୃତ୍ୟୁ ବେଳକୁ ତାଙ୍କୁ ମାତ୍ର ୬୧ ବର୍ଷ ହୋଇଥିଲା । ଦୀର୍ଘ ଦିନ ଧରି ରୋଗାକ୍ରାନ୍ତ ଥିବା ଅତୁଲ ଲକ୍ଷ୍ନୌର ମେୟୋ ହସ୍ପିଟାଲରେ ଭର୍ତ୍ତି ହୋଇଥିଲେ । । ଲକ୍ଷ୍ନୌ ୟୁନିଭରସିଟି ଛାତ୍ର ସଂଘର ଅଧ୍ୟକ୍ଷ ଭାବେ ୧୯୭୭ ମସିହାରେ ଅତୁଲ କୁମାର ରାଜନୀତିରେ ପାଦ ଦେଇଥିଲେ ।
ସେ ୪ ବର୍ଷ ଧରି ଲକ୍ଷ୍ନୌ ବିଶ୍ବବିଦ୍ୟାଳୟ ଛାତ୍ର ସଂଘ ଅଧ୍ୟକ୍ଷ ଭାବେ ନିର୍ବାଚିତ ହୋଇଥିଲେ । ମାତ୍ର ୨୦ ବର୍ଷ ବୟସରେ ସେ ନ୍ୟାସନାଲ କଲେଜ ଷ୍ଟୁଡେଣ୍ଟସ୍ ୟୁନିୟନର ଅଧ୍ୟକ୍ଷ ଭାବେ ନିର୍ବାଚିତ ହୋଇଥିଲେ । ନିଜ ଛାତ୍ର ଜୀବନରୁ ହିଁ ସେ ବାମପନ୍ଥୀ ଆବର୍ଶରେ ଅନୁପ୍ରାଣିତ ହୋଇ ରାଜନୀତି କରିଆସିଥିଲେ । ସିପିଆଇର ସେ ଜଣେ ବରିଷ୍ଠ ନେତା ଥିଲେ । ଘୋସି ଲୋକସଭା ଆସନରୁ ୪ ଥର ପ୍ରାର୍ଥୀ ହୋଇଥିଲେ ବି ତାଙ୍କୁ ପ୍ରତିଥର ପରାଜୟର ସାମ୍ନା କରିବାକୁ ପଡ଼ିଥିଲା ।
ଅତୁଲ ଅଞ୍ଜନଙ୍କୁ ୬ଟି ଭାଷା ଜଣାଥିଲା ।ନିଜର ଭାଷଣ ଦେବାର କଳା ପାଇଁ ଉତ୍ତର ପ୍ରଦେଶ ରାଜନୀତିରେ ତାଙ୍କର ପ୍ରତିଷ୍ଠା ଥିଲା । ସେ ୟୁପିର ପୋଲିସ-ପିଏସି ବିଦ୍ରୋହରେ ମୁଖ୍ୟ ଭୂମିକା ନେଇଥିଲେ । ଏଥିପାଇଁ ତାଙ୍କୁ ୪ ବର୍ଷ ଜେଲରେ ରହିବାକୁ ପଡ଼ିଥିଲା । ଅତୁଲ କୁମାରଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ରାଜନୈତକ ମହଲରେ ଶୋକର ଛାୟା ଖେଳି ଯାଇଛି। ବିଶିଷ୍ଟ ନେତୃବୃନ୍ଦ ଅତୁଳ କୁମାରଙ୍କ ବିୟୋଗରେ ଗଭୀର ଶୋକ ପ୍ରକାଶ କରି ଶୋକସନ୍ତପ୍ତ ପରିବାର ପ୍ରତି ସମବେଦନା ଜଣାଇଛନ୍ତି ।