କଟକ,୩୦/୦୪: ଗ୍ୟାଙ୍ଗ୍ଷ୍ଟର ଧଳସାମନ୍ତ ଭାଇ ସୋମବାର ବାପା ସରୋଜ ଧଳସାମନ୍ତଙ୍କ ଦଶାହରେ ଯୋଗଦେଇଥିଲେ । ଜେଲ୍ରୁ ପୁଲିସ କଡର୍ନରେ ଆସି କର୍ମସାରି ଦୁଇ ଭାଇ ହାତୀଗଡ଼ା ଘାଟକୁ ଯାଇ ବାକି କର୍ମ ସାରିଥିଲେ । ପରେ ଦୁହେଁ ଝାରପଡ଼ା ଓ ଚୌଦ୍ୱାର ଜେଲ୍କୁ ଯାଇଛନ୍ତି । ବାପାଙ୍କ ଶୁଦ୍ଧି କର୍ମରେ ଯୋଗଦେବା ପାଇଁ କୋର୍ଟ ନିର୍ଦ୍ଦେଶ ଦେଇଥିଲେ । ଏହି କ୍ରମରେ ପୁଲିସ୍ ସୋମବାର ବଡ଼ ପୁଅ ସୁଶାନ୍ତକୁ ବଲାଙ୍ଗୀର ଜେଲ୍ ଓ ସାନ ପୁଅ ସୁଶୀଲକୁ ବାଲେଶ୍ୱର ଜେଲ୍ରୁ କଟକ ଆଣିଥିଲା । ଦୁହେଁ ଦିନ ପ୍ରାୟ ୧୦ଟାରେ ସିଡିଏସ୍ଥିତ ଘରେ ପହଞ୍ଚିଥିଲେ । ପରେ ପୁଲିସ ଭ୍ୟାନ୍ରେ ମହାନଦୀରେ ହାତୀଗଡ଼ା ତୁଠକୁ ଯାଇ କର୍ମରେ ସାମିଲ ହୋଇଥିଲେ । ଦିନ ପ୍ରାୟ ୩ଟାରେ ପୁଲିସ ଭ୍ୟାନ୍ରେ ଘରକୁ ଆସିଥିଲେ । ପରେ ଦଶାହର ଅନ୍ତିମ କର୍ମ ଘରେ କରାଯାଇଥିଲା । ଦିନ ପ୍ରାୟ ସାଢ଼େ ୪ଟାରେ ଖାଇସାରି ଦୁଇ ଭାଇ ଜେଲ୍କୁ ଯାଇଥିଲେ । ସୁଶାନ୍ତ ଝାରପଡ଼ା ଓ ସୁଶୀଲ ଚୌଦ୍ୱାର ଜେଲ୍ ଯାଇଛନ୍ତି ।
ସକାଳେ ପୁଣି ଘରକୁ ଆସିବେ । ଏକାଦଶାହ କର୍ମ ଆରମ୍ଭ ହେବ । ଅପରାହ୍ଣରେ ସବୁ କର୍ମ ସାରିବା ପରେ ଦୁଇ ଭାଇଙ୍କୁ ବଲାଙ୍ଗୀର ଓ ବାଲେଶ୍ୱର ଜେଲ୍ ଫେରାଇ ନିଆଯିବ । ଏହା ମଧ୍ୟରେ ଏକ ବିଷୟ ଶୁଣିବାକୁ ମିଳୁଛି । ଏକାଦଶାହରେ ବ୍ରାହ୍ମଣ ଭୋଜନ ପାଇଁ ସ୍ୱର୍ଗତ ସରୋଜ ଧଳସାମନ୍ତଙ୍କ ସମ୍ପର୍କୀୟ ଯୋଜନା କରିଛନ୍ତି । ପ୍ରାୟ ୫୦ ଜଣ ବ୍ରାହ୍ମଣଙ୍କୁ ନିମନ୍ତ୍ରଣ କରିବାକୁ ସ୍ଥିର କରିଛନ୍ତି । ମାତ୍ର ସମ୍ପର୍କୀୟମାନେ ଯାହାଙ୍କୁ ବି ଭୋଜନକୁ ନିମନ୍ତ୍ରଣ କରୁଛନ୍ତି ସେମାନେ ଭୟରେ ଡି’ ହାଉସ୍କୁ ଆସିବାକୁ ରାଜି ହେଉନାହାନ୍ତି । ତେଣୁ ସରୋଜ ଧଳସାମନ୍ତଙ୍କ ସମ୍ପର୍କୀୟ କିଛି ବ୍ରାହ୍ମଣଙ୍କୁ ରାଜି କରାଇବା ପାଇଁ ପୁଲିସ ନିକଟରେ ଗୁହାରି କରିଛନ୍ତି । ପୁଲିସ କିନ୍ତୁ ସରୋଜଙ୍କ ସମ୍ପର୍କୀୟଙ୍କୁ କିଛି ଠୋସ୍ ଉତ୍ତର ଦେଇନି ।
