ନୂଆଦିଲ୍ଲୀ: ଜାତିସଂଘ ସୁରକ୍ଷା ପରିଷଦ (ୟୁଏନଏସ୍ସି)ରେ ଭାରତକୁ ସ୍ଥାୟୀ ସଦସ୍ୟତା ଦେବା ଲାଗି ପୁଣି ଥରେ ଦାବି ହୋଇଛି । ଏହାକୁ ନେଇ ଟେସଲା ସିଇଓ ଏଲନ ମସ୍କ ମନ୍ତବ୍ୟ ଦେଇଛନ୍ତି । ମସ୍କ କହିଛନ୍ତି, ଭାରତକୁ ସ୍ଥାଇ ସିଟ୍ ମିଳିବା ଦରକାର । ଏହା ସହ ୟୁଏନଏସ୍ସି ନିୟମରେ ପରିବର୍ତ୍ତନ ହେବା ଦରକାର । ମସ୍କ ଏକ୍ସରେ ଲେଖିଛନ୍ତି ଯେ, ୟୁଏନଏସସିରେ ଭାରତକୁ ସ୍ଥାୟୀ ସଦସ୍ୟତା ନମିଳିବା ଅଜବ ଘଟଣା । ଜାତିସଂଘ ସୁରକ୍ଷା ପରିଷଦରେ ଆହୁରି ସୁଧାର କରି ଭାରତକୁ ସ୍ଥାୟୀ ସିଟ୍ ଦେବା ଦରକାର ।
ସେପଟେ ଆମେରିକା ବୈଦେଶିକ ମନ୍ତ୍ରାଳୟର ମୁଖପାତ୍ର ବେଦାନ୍ତ ପଟେଲ ଏହି ପ୍ରସଙ୍ଗରେ ସାମ୍ବାଦିକ ସମ୍ମିଳନୀ କରିଛନ୍ତି । ଜାତିସଂଘ ସୁରକ୍ଷା ପରିଷଦରେ ସୁଧାର ଆଣିବା ଲାଗି ଆମେରିକା ପ୍ରସ୍ତାବ ଦେଇଛି ବୋଲି ସେ କହିଛନ୍ତି । ଏବେ ଭାରତକୁ ୟୁଏଏସ୍ସିରେ ସ୍ଥାୟୀ ସଦସ୍ୟତା ଦେବା ସପକ୍ଷରେ ଆମେରିକା ଥିବା କଥା କୁହାଯାଉଛି । ଜାତିସଂଘ ମହାସଭାର ଅଧ୍ୟକ୍ଷ ଡେନିସ୍ ଫ୍ରାନ୍ସିସ ୫ ଦିନିଆ ଭାରତ ଗସ୍ତରେ ଥିବା ବେଳେ ଆମେରିକାର ଏହି ପଦକ୍ଷେପ ଭାରତ ପାଇଁ ବେଶ ଉତ୍ସାହଜନକ ।
ସେପଟେ ଭାରତ ମଧ୍ୟ ସ୍ଥାୟୀ ସଦସ୍ୟତା ପାଇବା ଲାଗି ଫ୍ରାନ୍ସିସଙ୍କ ସହ ଆଲୋଚନା କରିପାରେ ବୋଲି ମଧ୍ୟ ଚର୍ଚ୍ଚା ହେଉଛି । ତେବେ ଏଲନ ମସ୍କଙ୍କ ଦାବି ପରେ ଭାରତକୁ ନେଇ ଆମେରିକା ବିଚାର କରିବାକୁ ବାଧ୍ୟ ହୋଇଛି । ସବୁଠୁ ଅଧିକ ଲୋକସଂଖ୍ୟା ଥିବା ଦେଶ ଭାରତ ୟୁଏନଏସସିର ସ୍ଥାୟୀ ସଦସ୍ୟ ନହେବା ଆଶ୍ଚର୍ଯ୍ୟଜନକ ବୋଲି ମସ୍କ କହିଛନ୍ତି । ଏହା ସହ ଆଫ୍ରିକାକୁ ସଦସ୍ୟତା ଦିଆଯିବା ଦରକାର ବୋଲି ମଧ୍ୟ ଏଲନ ମସ୍କ ପରାମର୍ଶ ଦେଇଛନ୍ତି ।
ୟୁଏନଏସ୍ସିର ସ୍ଥାୟୀ ସଦସ୍ୟ
ଆମେରିକା, ବ୍ରିଟେନ୍, ଚୀନ୍, ଫ୍ରାନ୍ସ, ଏବଂ ଋଷ ୟୁଏନଏସସିର ସ୍ଥାୟୀ ସଦସ୍ୟ । ଏହି ଦେଶଗୁଡ଼ିକ ପାଖରେ ଭିଟୋ ପାଓ୍ବାର ରହିଛି । ଜାତିସଂଘର ନୂଆ ସଦସ୍ୟଙ୍କୁ ସାମିଲ କରିବାକୁ ହେଲେ ଏହି ଦେଶଗୁଡ଼ିକର ଅନୁମତି ଜରୁରି । ଯଦି ଏଥିରେ ସୁଧାର ହୁଏ ତେବେ ଭାରତ ୟୁଏନଏସ୍ସିର ସ୍ଥାୟୀ ସଦସ୍ୟ ହୋଇପାରିବ । ସେପଟେ ସ୍ଥାୟୀ ସଦସ୍ୟତା ପାଇବା ଲାଗି ଭାରତ ମଧ୍ୟ ଚେଷ୍ଟା କରିଆସିଛି ।
