ଓ୍ବାଶିଂଟନ ଡିସି: ଇସ୍ରାଏଲ-ହମାସ ଯୁଦ୍ଧକୁ ନେଇ ମଧ୍ୟପ୍ରାଚ୍ୟ ଅଶାନ୍ତ ହୋଇଉଠିଛି । ଯୁଦ୍ଧ ଯୋଗୁଁ ହଜାର ହାଜର ଲୋକଙ୍କ ଜୀବନ ଯାଉଛି । ଏଥିରେ ପାଲେଷ୍ଟାଇନ୍ ନାଗରିକ ବେଶୀ ପ୍ରଭାବିତ ହେଉଥିବା କୁହାଯାଉଛି । ଯୁଦ୍ଧଗ୍ରସ୍ତ ଗାଜାରେ ହାହାକାର ପଡ଼ିଥିବା ବେଳେ ବିଶ୍ବର ବିଭିନ୍ନ ସ୍ଥାନରେ ପାଲେଷ୍ଟାଇନ୍ ସମର୍ଥିତ ଆନ୍ଦୋଳନ ତୀବ୍ର ରୂପ ଧାରଣ କରିଛି । ଆମେରିକାର ବିଭିନ୍ନ ସ୍ଥାନରେ ପାଲେଷ୍ଟାଇନ୍ ସମର୍ଥନରେ ବିକ୍ଷୋଭ ପ୍ରଦର୍ଶନ ହେଉଛି । ନ୍ୟୁୟର୍କ ସହରରେ ଥିବା କଲମ୍ବିଆ ବିଶ୍ବବିଦ୍ୟାଳୟରେ ପାଲେଷ୍ଟାଇନ୍ ସମର୍ଥକଙ୍କ ଆନ୍ଦୋଳନ ଜୋର ଧରିଛି । ବିଦ୍ରୋହୀ ଗୋଷ୍ଠୀ ବିଶ୍ବବିଦ୍ୟାଳୟ ପରିସରରେ ଥିବା ଐତିହାସିକ ହାମିଲଟନ୍ ହଲ୍କୁ କବଜା କରିନେଇଛନ୍ତି । ଏହା ସହ ପାଲେଷ୍ଟାଇନ୍ ସମର୍ଥନରେ ବ୍ୟାନର ଧରି ବିକ୍ଷୋଭ ଜାରି ରଖିଛନ୍ତି ।
ହାମିଲଟନ ହଲ୍ ବହୁ ଛାତ୍ର ଆନ୍ଦୋଳନର ମୂକସାକ୍ଷୀ । କିନ୍ତୁ ଶେଷ ଥର ପାଇଁ ଭିଏତନାମ ଯୁଦ୍ଧ ସମୟରେ ୧୯୬୮ରେ ହାମିଲଟନ୍ ହଲକୁ କବଜା କରାଯାଇଥିଲା ।ଆଉ ଏବେ ପାଲେଷ୍ଟାଇନ୍ର ସମର୍ଥକ ମାନେ ବିଶ୍ବବିଦ୍ୟାଳୟ କ୍ୟାମ୍ପସ୍ର ଦକ୍ଷିଣ ଭାଗରେ ଥିବା ଏହି ଐତିହାସିକ ବିଲ୍ଡିଂକୁ ନିଜ କବଜାକୁ ନେଇଛନ୍ତି । ଚୌକି ରଖି ହମିଲଟନ୍ ହଲର ଦ୍ବାରକୁ ବନ୍ଦ କରିଯାଇଥିବା ବେଳେ ଶତାଧିକ ଆନ୍ଦୋଳନକାରୀ ହଲ ବାହାରେ ବିକ୍ଷୋଭ ଜାରି ରଖିଛନ୍ତି ।
ହାମିଲଟନ୍ ହଲ ବାହାରେ ଆନ୍ଦୋଳନକାରୀ ଧରିଥିବା ଧଳା ବ୍ୟାନରରେ ‘ହିନ୍ଦ୍ର ହଲ୍’ ବୋଲି ଲେଖା ଯାଇଛି । ୨୦୨୪ ଆରମ୍ଭରୁ ଗାଜା ଯୁଦ୍ଧରେ ପ୍ରାଣ ହରାଇଥିବା ଜଣେ ୬ ବର୍ଷୀୟ ନାବାଳିକା ହିନ୍ଦ ରଜାବର ସ୍ମୃତିରେ ଏହି ବ୍ୟାନ୍ର ଧରିଛନ୍ତି ଆନ୍ଦୋଳନକାରୀ । ଆମେରିକାର ବିଭିନ୍ନ ଶିକ୍ଷାନୁଷ୍ଠାନରେ ଗାଜା ଯୁଦ୍ଧ ବିରୋଧରେ ବିକ୍ଷୋଭ ଜାରି ରହିଛି । ଶତାଧିକ ଗିରଫ ଏବଂ ବ୍ୟାନ୍ ଭୟ ଦେଖାଇବା ସତ୍ବେ ଏହି ଆନ୍ଦୋଳନ ଜାରି ରହିଛି ।