ସଂଘାଇ: ଭାରତ ଅଣ ଅଲିମ୍ପିକ କମ୍ପାଉଣ୍ଡ ତୀରନ୍ଦାଜିରେ ଦବଦବା ଜାହିର କରିଛି । ସଂଘାଇରେ ଆୟୋଜିତ ବିଶ୍ବକପ୍ର ପ୍ରଥମ ଚରଣରେ ଭାରତୀୟ ଟିମ୍ କ୍ଲିନ୍ ସ୍ବିପ୍ କରିବା ସହ ଗୋଲ୍ଡ ମେଡାଲ୍ର ହ୍ୟାଟ୍ରିକ୍ ଲଗାଇଛନ୍ତି । ଚଳିତବର୍ଷର ପ୍ରଥମ ବିଶ୍ବକପ୍ରେ ଭାରତ ମହିଳା କମ୍ପାଉଣ୍ଡ ଟିମ୍ ଇଟାଲୀକୁ ୨୩୬-୨୨୫ରେ ପରାସ୍ତ କରିଛି । ଜ୍ୟୋତି ସୁରେଖା ବେନ୍ନମ, ଆଦିତି ସ୍ବାମୀ ଏବଂ ପରନୀତ କୌରଙ୍କ ଭାରତୀୟ ଟିମ୍ ୨୪ ତୀରରେ କେବଳ ୪ ଅଙ୍କ ହରାଇ ଇଟାଲୀକୁ ବଡ଼ ଅନ୍ତରରେ ମାତ ଦେଇ ସ୍ବର୍ଣ୍ଣ ପଦକ ହାସଲ କରିଛି ।
ସେହିଭଳି ପୁରୁଷ ଟିମ୍ରେ ଅଭିଷେକ ବର୍ମା, ପ୍ରିୟାଂଶ ଏବଂ ପ୍ରଥମେଶ ଏଫ୍ ନେଦରଲ୍ୟାଣ୍ଡସକୁ ୨୩୮-୨୩୧ରେ ପରାସ୍ତ କରିଛି । ଏହା ପରେ ମିକ୍ସଡ୍ (ମିଳିତ) ଟିମ୍ କମ୍ପାଉଣ୍ଡ ବର୍ଗରେ ତୃତୀୟ ସ୍ବର୍ଣ୍ଣ ପଦକ ଜିତି କ୍ଲିନ୍ ସ୍ବିପ କରିଛନ୍ତି ।
ଏସୀୟ କ୍ରୀଡାର ଚାମ୍ପିୟନ୍ ଜ୍ୟୋତିଙ୍କ ଲାଗି ଏହା ଦ୍ବିତୀୟ ଗୋଲ୍ଡ ମେଡାଲ୍ । ସେ ବ୍ୟକ୍ତିଗତ ଭାବେ ଗୋଲ୍ଡ ମେଡାଲ ଦୌଡ଼ରେ ଥିବା ବେଳେ ଆଜି ସେ ସେମିଫାଇନାଲ୍ ଖେଳିବେ ।ପ୍ରିୟାଂଶ ମଧ୍ୟ ବ୍ୟକ୍ତିଗତ ବର୍ଗରେ ମେଡାଲ୍ ଦୌଡ଼ରେ ଅଛନ୍ତି । ପଦକ ରାଉଣ୍ଡ ରବିବାର ହେବାକୁ ଥିବା ଭାରତର ନଜର ଅଲିମ୍ପିକ ବର୍ଗର ଦୁଇଟି ଗୋଲ୍ଡ ମେଡାଲ୍ ଉପରେ ରହିଛି । ଭାରତୀୟ ପୁରୁଷ ଟିମ୍ ସ୍ବର୍ଣ୍ଣ ପଦକ ମୁକାବିଲାରେ ଅଲିମ୍ପିକ୍ ଚାମ୍ପିୟନ ଦକ୍ଷିଣ କୋରିଆ ସହ ସାମ୍ନାସାମ୍ନି ହେବ ।
