ଭୁବନେଶ୍ୱର,୦୭/୦୫: ଅଲିମ୍ପିକ୍ସ  ଚାମ୍ପିଅନ ନୀରଜ ଚୋପ୍ରା ୨୦୨୪ର ପ୍ରଥମ  ଡାଏମଣ୍ଡ ଲିଗ୍‌ ଯାତ୍ରା ଏସୀୟ କ୍ରୀଡ଼ାରେ  ରୌପ୍ୟ ବିଜେତା କିଶୋର ଜେନାଙ୍କ ସହ  ଆରମ୍ଭ କରିବାକୁ ଯାଉଛନ୍ତି । ଆସନ୍ତା ୧୦  ତାରିଖରେ ଦୋହା ଡାଏମଣ୍ଡ ଲିଗ୍‌ । ଏଥିପାଇଁ  ଏଣ୍ଟ୍ରି ତାଲିକା ପ୍ରକାଶ ପାଇଛି । ନୀରଜଙ୍କ  ସହ ଏହି ତାଲିକାରେ ରହିଛନ୍ତି ଜାପାନର  ରଡେରିକ ଜେନକି ଡିନ, ଫିନ୍‌ଲାଣ୍ଡର ଓଲିଭର  ହେଲାଣ୍ଡର, କିଶୋର ଜେନା, ମଲଡୋଭାର  ଆଡ୍ରିଆନ ମାରଡାରେ, ଲିଥୁଆନିଆର ଏଡିସ  ମାତୁସେଭିସିୟସ, ଗ୍ରେନାଡାର ଆଣ୍ଡରସନ  ପିଟର୍ସ, ଆମେରିକାର କଟିସ ଥମ୍ପସନ,  ଚେକ ଗଣରାଜ୍ୟର ଜାକୁବ ଭାଦଲେଜଚ  ଏବଂ ଜର୍ମାନୀର ଜୁଲିଆନ ୱେବର । 

ଦୋହାରେ ୯୦ ମିଟର ମାର୍କ ଅତିକ୍ରମ  କରିବାର ରେକର୍ଡ ରହିଛି । ତେଣୁ ଯାହା  ଆଶା କରାଯାଉଛି ନୀରଜ ଓ କିଶୋର  ଏଥର ଏହି କ୍ଲବରେ ସାମିଲ ହେବେ ।  ପୂର୍ବରୁ ଉଭୟ ପ୍ୟାରିସ ଅଲିମ୍ପିକ୍ସକୁ  ଯୋଗ୍ୟତା ହାସଲ କରିସାରିଛନ୍ତି । ନୀରଜଙ୍କ  ଶ୍ରେଷ୍ଠ ପ୍ରଦର୍ଶନ ୮୯.୯୪ ମିଟର ଏବଂ  କିଶୋରଙ୍କ ୮୭.୫୪ ମିଟର ରହିଛି ।  ବିଶ୍ୱର ଶ୍ରେଷ୍ଠ ୧୦ ତାରକା ଜାଭେଲିନ  ଫିଙ୍ଗାଳିଙ୍କ ମଧ୍ୟରେ ଦୋହାରେ କଡ଼ା ପ୍ରତିଦ୍ୱନ୍ଦ୍ୱିତା  ହେବ । ଏହି ତାଲିକାରେ ଭାରତରୁ ୨ ଜଣ  ସାମିଲ ରହିବା କମ୍‌ ଗୌରବର କଥା ନୁହେଁ ।  ଆସନ୍ତା ୧୦ ତାରିଖରେ ପ୍ରତିଯୋଗିତା ଭାରତୀୟ  ସମୟ ରାତି ୧୦ଟା ୧୨ ମିନିଟରୁ ଆରମ୍ଭ ହେବ ।