ଭୁବନେଶ୍ୱର,୩୦/୦୪: ମଙ୍ଗଳବାରଠୁ ରାଞ୍ଚିରେ ଆରମ୍ଭ ହେବାକୁ ଯାଉଛି ଜାତୀୟ ମହିଳା ହକି ଲିଗର ପ୍ରଥମ ପର୍ଯ୍ୟାୟ । ଏ ନେଇ ସମସ୍ତ ପ୍ରସ୍ତୁତି ଶେଷ ହୋଇଛି । ମୋଟ୍ ୮ଟି ଦଳ ଏଥିରେ ଭାଗ ନେଇଛନ୍ତି । ଉଦ୍ଘାଟନୀ ମ୍ୟାଚରେ ଓଡ଼ିଶା ଓ ହରିଆନା ମଧ୍ୟରେ ଖେଳାଯିବାର କାର୍ଯ୍ୟକ୍ରମ ରହିଛି । ଏହି ପ୍ରତିଯୋଗିତା ୨ଟି ପର୍ଯ୍ୟାୟରେ ଆୟୋଜିତ ହେଉଛି ।
ମଙ୍ଗଳବାର ଠାରୁ ପ୍ରଥମ ପର୍ଯ୍ୟାୟ ଆରମ୍ଭ ହୋଇ ମେ’ ୯ ତାରିଖରେ ଶେଷ ହେବ । ଏହି ପର୍ଯ୍ୟାୟର ୨୮ଟି ଯାକ ମ୍ୟାଚ୍ ରାଞ୍ଚି ଜୟପାଲ ସିଂ ହକି ଷ୍ଟାଡିୟମରେ ଖେଳାଯିବ । ଯେଉଁ ୮ଟି ଦଳ ଜାତୀୟ ପ୍ରତିଯୋଗିତାରେ ଶ୍ରେଷ୍ଠ ପ୍ରଦର୍ଶନ ଆଧାରରେ ସାମିଲ ହୋଇଛନ୍ତି, ସେମାନେ ହେଲେ ଓଡ଼ିଶା, ହରିଆନା, ମହାରାଷ୍ଟ୍ର, ଝାଡ଼ଖଣ୍ଡ, ମଧ୍ୟପ୍ରଦେଶ, ପଶ୍ଚିମବଙ୍ଗ, ମିଜୋରାମ ଓ ମଣିପୁର । ହକି ଇଣ୍ଡିଆ ସଭାପତି ପଦ୍ମଶ୍ରୀ ଦିଲ୍ଲୀପ ତିର୍କୀ କହିଛନ୍ତି, ‘ ପ୍ରଥମ ସଂସ୍କରଣ ଆରମ୍ଭ ହେବାକୁ ନେଇ ଆମେ ଉତ୍ସାହିତ ରହିଛୁ । ଏହା କେବଳ ଏକ ପ୍ରତିଯୋଗିତା ନୁହେଁ, ବରଂ ଭାରତୀୟ ହକିକୁ ତୃଣମୂଳ ସ୍ତରରୁ ବିକାଶ କରିବା ଦିଗରେ ଏକ ପ୍ରୟାସ ।’