ଜେରୁସାଲେମ୍: ଇରନାର ମିସାଇଲ୍ ଆକ୍ରମଣର ଜବାବ କେବେ ଓ କେମିତି ଦିଆଯିବ ସେନେଇ ଆଜି ନିଷ୍ପତ୍ତି ନେବ ଇସ୍ରାଏଲ । ଦେଶର ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ନେତୃତ୍ବରେ ଓ୍ବାର କ୍ୟାବିନେଟ୍ ଏବଂ ସୁରକ୍ଷା କ୍ୟାବିନେଟ୍ ଏହା ଉପରେ ମିଳିତ ଭାବେ ବୈଠକ କରିବେ । ସେପଟେ ସହଯୋଗୀ ଦେଶଙ୍କ ପରାମର୍ଶ ଯାହା ବି ହେଉ ନା କାହିଁକି ଏ ସଂପର୍କରେ ଇସ୍ରାଏଲ ନିଜେ ନିଷ୍ପତ୍ତି ନେବ ବୋଲି ନେତାନ୍ୟାହୁ କହିଛନ୍ତି । ଇସ୍ରାଏଲ ଗସ୍ତରେ ଆସିଥିବା ବ୍ରିଟେନ ଏବଂ ଜର୍ମାନୀର ବୈଦେଶିକ ମନ୍ତ୍ରୀଙ୍କୁ ନେତାନ୍ୟାହୁ ଏନେଇ ସୂଚନା ଦେଇଛନ୍ତି ।
ବ୍ରିଟେନର ବୈଦେଶିକ ମନ୍ତ୍ରୀ ଡେଭିଡ୍ କ୍ୟାମେରୁନ ସଂଯମତା ରକ୍ଷା କରିବାକୁ ଇସ୍ରାଏଲକୁ ପରାମର୍ଶ ଦେଇଥିଲେ । ହେଲେ ୧୩-୧୪ ଏପ୍ରିଲରେ ଇରାନ୍ର ୩୫୦ ମିସାଇଲ ମାଡ଼ର ଜବାବ ଦେବାକୁ ବେଞ୍ଜାମିନ ନେତାନ୍ୟାହୁ ଏବଂ ଇସ୍ରାଏଲ ସେନା ମନସ୍ଥ କରିସାରିଛନ୍ତି । ଏଭଳି ସ୍ଥିତିରେ ଇସ୍ରାଏଲ ସାମ୍ନାରେ ଦୁଇ ଦୁଇଟି ଆହ୍ବାନ ରହିଛି । ପ୍ରଥମତଃ ଇରାନ ଉପରେ ଆକ୍ରମଣ କରିବା ଲାଗି ଇସ୍ରାଏଲକୁ ସବୁଜ ସଂକେତ ଦେଇନାହିଁ ଆମେରିକା । ଅନ୍ୟପଟେ ହିବ୍ରୁ ୟୁନିଭର୍ସିଟରେ ହୋଇଥିବା ଓପିନିୟନ ପୋଲ୍ ଅନୁସାରେ, ୭୪ ପ୍ରତିଶତ ଲୋକ ବିଶ୍ବାସ କରୁଛନ୍ତି ଯଦି ସହଯୋଗୀ ଦେଶଙ୍କ ଅନୁମତି ମିଳିନାହିଁ ତେବେ ଇରାନ ଉପରେ ଇସ୍ରାଏଲ ଆକ୍ରମଣ କରିବା ଉଚିତ ହେବ ନାହିଁ ।
ଅନ୍ୟପଟେ ନିଜ ଉପରେ ହୋଇଥିବା ଆକ୍ରମଣର ଜବାବ ଦେବାକୁ ଇସ୍ରାଏଲ ସ୍ଥିର କରିସାରିଥିବା କୁହାଯାଉଛି । କିନ୍ତୁ ଏଥିପାଇଁ ଆମେରିକା ଏବଂ ଅନ୍ୟ ସହଯୋଗୀ ଦେଶଙ୍କ ସହାୟତା ଦରକାର । ଇରାନ ଏବଂ ଇସ୍ରାଏଲ ମଧ୍ୟରେ ଦୂରତା ୧୫୦୦ କିଲୋମିଟର । ଆକାଶମାର୍ଗରେ ଇରାନ ଉପରେ ଆକ୍ରମଣ କରିବାକୁ ହେଲେ ଇସ୍ରାଏଲକୁ ଜୋର୍ଡାନ, ଇରାକ ଏବଂ ସିରିୟାର ଆକାଶମାର୍ଗର ବ୍ୟବହାର କରିବାକୁ ପଡ଼ିବ । ଇରାନ ୩୫୦ରୁ ଅଧିକ ମିସାଇଲ ଏବଂ ଡ୍ରୋନ୍ ଆକ୍ରମଣ କରିଥିବା ବେଳେ ଇସ୍ରାଏଲ ନିଶ୍ଚିତ ରୂପେ ଏହାଠୁ ଅଧିକ ମିସାଇଲ ମାଡ଼ କରିପାରେ ।
ଇରାନ୍ ଉପରେ ଆକ୍ରମଣ କରିବାକୁ ହେଲେ ଇସ୍ରାଏଲକୁ ମଧ୍ୟ-ପୂର୍ବରେ ଥିବା ଆମେରିକାର ସୈନ୍ୟ ବେସ୍ ଏବଂ ଲୋହିତ ସାଗରରେ ଥିବା ଏୟାରକ୍ରାଫ୍ଟ କ୍ୟାରିୟରର ସହାୟତା ନେବାକୁ ପଡ଼ିବ । ଏସବୁ ଭିତରେ ଇସ୍ରାଏଲ ସେନା ସରକାରଙ୍କ ପାଖରେ ଏକାଧିକ ବିକଳ୍ପ ନେଇ ପ୍ରସ୍ତାବ ରଖିଛି । ଯଦିଓ ଇରାନ ସମର୍ଥିତ ହେଜବୁଲ୍ଲା ଏବଂ ହମାସ ଉପରେ ଇସ୍ରାଏଲ ଆକ୍ରମଣ ଜାରି ରଖିଛି । କିନ୍ତୁ ଏହାକୁ ଇରାନ୍ ସହ ଡାଇାରେକ୍ଟ ଓ୍ବାର ଭାବେ ଇସ୍ରାଏଲ ଦେଖୁନାହିଁ । ଅନ୍ୟପକ୍ଷରେ ଇସ୍ରାଏଲକୁ ସମର୍ଥନ ଦେଲେ ଇରାନ୍ ଉତକ୍ଷିପ୍ତ ହୋଇଉଠିବ ବୋଲି ଆମେରିକା ବିଶ୍ବାସ କରୁଛି । ଯଦି ଏଭଳି ହୁଏ ତେବେ ମଧ୍ୟପ୍ରାଚ୍ୟରେ ଥିବା ଆମେରିକା ବେସ୍ ଉପରେ ଆକ୍ରମଣ ହୋଇପାରେ । ଏହା ସହ ଯୁଦ୍ଧ ବହୁ ଦେଶକୁ ବ୍ୟାପିଯାଇପାରେ ବୋଲି ଆମେରିକା ଆଶଙ୍କା କରୁଛି । ସବୁଠୁ ବଡ଼ କଥା ହେଉଛି ଯଦି ଇସ୍ରାଏଲ ଆକ୍ରମଣ କରେ ତେବେ ପ୍ରତିଆକ୍ରମଣ ପାଇଁ ଇରାନ୍ ମଧ୍ୟ ଯୋଜନା କରିସାରିଛି ବୋଲି କୁହାଯାଉଛି । ତେଣୁ ସହଯୋଗୀ ଦେଶଙ୍କ ଅନୁମତି ବିନା ଇସ୍ରାଏଲ ଇରାନ ଉପରେ ଆକ୍ରମଣ କରିବା ଅନୁଚିତ ବୋଲି ପ୍ରତିରକ୍ଷା ସମୀକ୍ଷକ ମତ ଦେଇଛନ୍ତି ।