ଫ୍ଲୋରିଡା,୨୭/୦୪: ଜୁନ ୧ ତାରିଖରୁ ଆମେରିକା ଓ ୱେଷ୍ଟଇଣ୍ଡିଜରେ ଆରମ୍ଭ ହେବାକୁ ଯାଉଛି ଟି-ଟ୍ୱେଣ୍ଟି ବିଶ୍ୱକପ୍ । ପ୍ରଥମ ଥର କ୍ରିକେଟର ଏହି ମହାସମର ଆମେରିକାରେ ଆୟୋଜିତ ହେବାକୁ ଯାଉଛି । ସଂପୂର୍ଣ୍ଣ ନୂଆ ଷ୍ଟାଡିୟମରେ ବିଶ୍ୱକପ୍ ଆୟୋଜିତ ହେବ । ଆଉ ଏଥିରେ ଉଠା କ୍ରିକେଟ୍ ପିଚ ବା ଭ୍ରାମ୍ୟମାଣ ପିଚରେ ଟୁର୍ଣ୍ଣାମେଣ୍ଟ ଖେଳାଯିବ । ହୁଏତ ଏ କଥା ଶୁଣି ଆଶ୍ଚର୍ଯ୍ୟ ଲାଗିପାରେ, କିନ୍ତୁ କଥାଟି ସତ । ଆମେରିକାରେ ଯେଉଁ ୩ଟି ଷ୍ଟାଡିୟମରେ (ନ୍ୟୁୟର୍କ, ଫ୍ଲୋରିଡା, ଟେକ୍ସାସ) ୧୬ଟି ମ୍ୟାଚ୍ ଖେଳାଯିବ, ସବୁ ଷ୍ଟାଡିୟମରେ ଉଠା ପିଚ୍ ବିଛା ଯିବ । ଆଉ ଏଥିପାଇଁ ଅଷ୍ଟ୍ରେଲିଆରୁ ପିଚ୍ ଆସି ପହଞ୍ଚି ସାରିଛି ।
ସହ-ଆୟୋଜକ ଆମେରିକା ଆଡିଲେଡରୁ କ୍ରିକେଟ୍ ପିଚ୍ ମଗାଯାଇଥିଲା । ଜାହାଜରେ ପିଚ୍ ପ୍ରଥମେ ଆଡିଲେଡରୁ ବାହାରି ଫ୍ଲୋରିଡାରେ ପହଞ୍ଚିଥିଲା । ପରେ ନ୍ୟୁୟର୍କରେ ପହଞ୍ଚି ସାରିଛି ଏବଂ ସେଠାରୁ ଟେକ୍ସାସ ନିଆଯିବ । ଏଥିପାଇଁ ମୋଟ୍ ଜଳ ଓ ସ୍ଥଳ ପଥରେ ୨୨,୫୦୦ କି.ମି ଯାତ୍ରା କରିବାକୁ ପଡ଼ିଛି ।
ଯାହା ସୂଚନା ରହିଛି, ଷ୍ଟାଡିୟମରେ ପିଚ ବିଛାଇବା ପାଇଁ ୧୨ ଘଣ୍ଟା ସମୟ ଲାଗିବ । ସେଥିପାଇଁ ସ୍ୱତନ୍ତ୍ର ତାଲିମ ପ୍ରାପ୍ତ ପିଚ୍ କ୍ୟୁରେଟର ଏବଂ ଅନ୍ୟାନ୍ୟ ବିଶେଷଜ୍ଞମାନେ ଆସି ପହଞ୍ଚିଛନ୍ତି । ୩ଟି ଷ୍ଟାଡିୟମରେ ପିଚ୍ ବ୍ୟାଟର ନା ବୋଲରଙ୍କୁ ସହାୟତା କରିବ ତାହା ଏବେ କ୍ରିକେଟ୍ପ୍ରେମୀଙ୍କ ମନରେ ଉତ୍କଣ୍ଠା ସୃଷ୍ଟି କରିଛି ।
ଆଡିଲେଡ୍ ଓଭାଲର ପିଚ୍ କ୍ୟୁରେଟର ଡାମିଆନ ହ୍ୟୁଗ କହିଛନ୍ତି, ‘ପେସ ବୋଲର ଏବଂ ନିୟମିତ ବାଉନ୍ସ ହେଲା ଭଳି ପିଚ୍ ପ୍ରସ୍ତୁତ କରିବା ଆମର ଲକ୍ଷ୍ୟ । ବ୍ୟାଟରମାନେ ସେମାନଙ୍କ ସଟ୍ ଖେଳିବେ ।’ ବିଶ୍ୱକପ୍ ଶେଷ ହେବା ପରେ ପୁଣି ଆସନ୍ତା ଜାନୁଆରୀ ମାସରେ ପୁଣି ସମସ୍ତ ପିଚ୍ ଆଡିଲେଡ୍ ଫେରିଯିବ ।
ଗତ ଅକ୍ଟୋବର ମାସରେ ପିଚକୁ କିଭଳି ଗୋଟିଏ ସ୍ଥାନରୁ ଆଣି ଆଉ ଏକ ସ୍ଥାନରେ ବିଛା ଯିବ, ତାହାର ପରୀକ୍ଷଣ କରାଯାଇଥିଲା । ଏହି ଉଠା ପିଚ୍ରେ ଜୁନ ୯ ତାରିଖରେ ବିଶ୍ୱକପ୍ର ସବୁଠୁ ବଡ଼ ଲଢ଼େଇ ଭାରତ ଓ ପାକିସ୍ତାନ ମଧ୍ୟରେ ଖେଳାଯିବ ।