ରାୟଗଡ଼ା,୨୯/୦୪: ଆସନ୍ତା ମେ’ ୧୩ରେ କୋରାପୁଟ,  ନବରଙ୍ଗପୁର, ବ୍ରହ୍ମପୁର ଓ କଳାହାଣ୍ଡି ସଂସଦୀୟ କ୍ଷେତ୍ର ଓ  ଏହାର ଅଧୀନରେ ଥିବା ୨୮ ବିଧାନସଭା ଆସନରେ ନିର୍ବାଚନ  ଅନୁଷ୍ଠିତ ହେବ । ଏଠି ୮ ଜିଲ୍ଲାର ୪ ସାଂସଦ ଓ ୨୮ ବିଧାୟକ  ପ୍ରାର୍ଥୀଙ୍କ ପ୍ରାଇଁ ପ୍ରଚାର କରିବେ ରାହୁଲ ଗାନ୍ଧୀ । ଏଥିଲାଗି ସେ  ଆସନ୍ତା ମେ’ ୩ରେ ରାୟଗଡ଼ା ଆସୁଛନ୍ତି । ଏଠାରେ ଆୟୋଜିତ ଏକ ଜନସଭାକୁ ସମ୍ବୋଧିତ କରିବେ । ରାୟଗଡ଼ା ସହର ଉପକଣ୍ଠ  ବାଇପାସ୍‌ଠାରେ ଥିବା ବାରିଝୋଲା ପଡ଼ିଆରେ ସମସ୍ତ ବ୍ୟବସ୍ଥା  କରାଯାଇଛି । 

ରାୟଗଡ଼ା, କୋରାପୁଟ, ନବରଙ୍ଗପୁର, ମାଲକାନଗିରି,  କଳାହାଣ୍ଡି, ନୂଆପଡ଼ା, ଗଜପତି ଓ ଗଞ୍ଜାମ ଜିଲ୍ଲାର ନେତା ଓ  କର୍ମୀ ଯୋଗଦେବେ। ୮ ଜିଲ୍ଲାର ୧ ଲକ୍ଷ ଲୋକଙ୍କ ସମାଗମ ପାଇଁ  ବ୍ୟବସ୍ଥା କରାଯାଉଥିବା ଜଣାପଡ଼ିଛି । ଏଥିଲାଗି ଆଜିଠୁ ପ୍ରସ୍ତୁତି  ଆରମ୍ଭ ହୋଇଥିବା ସାଂସଦ ସପ୍ତଗିରି ଶଙ୍କର ଉଲ୍ଲାକା କହିଛନ୍ତି ।  ରାହୁଲଙ୍କ ପରେ ଆସିବେ ପ୍ରିୟଙ୍କା ଗାନ୍ଧି । ସେ ନବରଙ୍ଗପୁର  ଲୋକସଭା କ୍ଷେତ୍ରରେ ଜନସଭାରେ ଯୋଗଦାନ କରିବେ । ଅବିଭକ୍ତ  କୋରାପୁଟ ଓ କଳାହାଣ୍ଡି ଜିଲ୍ଲାକୁ ପୁଣି ଥରେ କଂଗ୍ରେସ ଦଖଲକୁ  ଆଣିବା ପାଇଁ ଗସ୍ତରେ ଆସୁଛନ୍ତି ଏଆଇସିସିର ହେଭିୱେଟ୍‌ ନେତା ।  ସେହିଭଳି ଆସନ୍ତା ମେ’ ୮ ତାରିଖରେ ତେଲେଙ୍ଗାନା ମୁଖ୍ୟମନ୍ତ୍ରୀ  ରେବନ୍ତ ରେଡ୍ଡୀ ଆସୁଥିବା ନେଇ ସୂଚନା ଦେଇଛନ୍ତି ଶ୍ରୀ ଉଲ୍ଲାକା ।