କିଭ୍: ୟୁକ୍ରେନର ରକେଟ ମାଡ଼ରେ ଋଷର ଦୁଇଟି ବଡ଼ ତୈଳ ଡିପୋ ଧ୍ବଂସ ହୋଇଛି । ବୁଧବାର ଋଷର ସ୍ମୋଲେନ୍ସକ୍ ପ୍ରାନ୍ତରେ ଥିବା ଦୁଇଟି ରୋଜନେଫ୍ଟ ତୈଳ ଡିପୋକୁ ଉଡ଼ାଇ ଦେଇଥିବା ନେଇ ୟୁକ୍ରେନ୍ର ଗୁଇନ୍ଦା ବିଭାଗ ପକ୍ଷରୁ ସୂଚନା ଦିଆଯାଇଛି । ୟୁକ୍ରେନ୍ର ଏସବିୟୁ ସୁରକ୍ଷା ୟୁନିଟ୍ ଦ୍ବାରା ଏହି ଆକ୍ରମଣ କରାଯାଇଥିବା ଜଣାପଡ଼ିଛି ।
ରୟଟର୍ସରେ ପ୍ରକାଶିତ ଖବର ଅନୁସାରେ, ଦୁଇଟି ଡିପୋରେ ପ୍ରାୟ ୨୬ ହଜାର କ୍ୟୁବିକ୍ ମିଟର ଇନ୍ଧନ ଥିବାରୁ ରକେଟ ମାଡ଼ ପରେ ଏଥିରେ ଭୟଙ୍କର ବିସ୍ଫୋରଣ ଘଟିଥିଲା । ତେବେ ୟୁକ୍ରେନ୍ରେ ଯୁଦ୍ଧ ଲଢ଼ିବା ଲାଗି ଋଷୀୟ ସୈନିକଙ୍କୁ ଇନ୍ଧନ ଏବଂ ଯୁଦ୍ଧାସ୍ତ୍ର ଯୋଗାଉଥିବା ଭିତ୍ତିଭୂମିଗୁଡ଼ିକୁ ଟାର୍ଗେଟ କରିଆସିଛି ୟୁକ୍ରେନ୍ର ଏସବିୟୁ ସୁରକ୍ଷା ୟୁନିଟ୍ ।
ଏହିଭଳି ଭିତ୍ତିଭୂମିଗୁଡ଼ିକ ଆମ ଟାର୍ଗେଟରେ ରହିଛି ବୋଲି ୟୁକ୍ରେନ୍ର ଜଣେ ଶୀର୍ଷ ଅଧିକାରୀ ସୂଚନା ଦେଇଥିବା ନେଇ ରୟଟର୍ସରେ ରିପୋର୍ଟ ପ୍ରକାଶ ପାଇଛି । ସେପଟେ ୟୁକ୍ରେନ୍ ପଟୁ ଆକ୍ରମଣ ହେବା ପରେ ଋଷ ତୈଳ ଡିପୋରେ ଭୟଙ୍କର ବିସ୍ଫୋରଣ ଘଟିଛି । ଫଳରେ ସେହି ଅଞ୍ଚଳରୁ ଲୋକମାନଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଛି । ସ୍ମୋଲେନ୍ସକ୍ ପ୍ରାନ୍ତର ଭଗର୍ଣ୍ଣର ବାସିଲି ଆନୋଖିନଙ୍କ ଅନୁସାରେ, ଡ୍ରୋନ୍ ଆକ୍ରମଣ ଯୋଗୁ ତୈଳ ଡିପୋରେ ଅଗ୍ନିକାଣ୍ଡ ଘଟିଛି । ଏହି ଆକ୍ରମଣରେ କେହି ମୃତାହତ ହୋଇନାହାନ୍ତି ।