ସମ୍ବଲପୁର,୧୦/୦୨: ସମୟ ସୁଅରେ ସମ୍ପର୍କର ସଂଜ୍ଞା ବଦଳିଛି । ସ୍ୱାର୍ଥରେ ଆଞ୍ଚ୍ ଆସିଲେ ରକ୍ତର ଭାଇ ବି ରାକ୍ଷସ ସାଜୁଛି । ଯାହାକୁ ମଣିଷ ଜନ୍ମ ଦେଉଛି ସେ ବି ଜୀବନ ନେଉଛି । ଆଉ ଦୁଇ ଯା’ଙ୍କ ସମ୍ପର୍କକୁ ନେଇ କେତେ ଅପବାଦ ରହିଛି । ହେଲେ କିଛି ବର୍ଷ ତଳେ ଯୋଡ଼ି ହୋଇଥିବା ସମ୍ପର୍କ ପାଇଁ ନିଜ ଜୀବନକୁ ତୁଚ୍ଛ ମଣିଛନ୍ତି ସମ୍ବଲପୁର ଜିଲ୍ଲା ଯୁଯୁମୁରା ଝାଙ୍କରପାଲି ଗାଁର ପ୍ରତିମା ପ୍ରଧାନ । ସାନ ଯା’କୁ ନିଜର ଯକୃତ ଦେଇ ନୂଆ ଜୀବନ ଦେଇଛନ୍ତି ସେ । ତାଙ୍କର ଏହି ନିଃସ୍ୱାର୍ଥପର ସମ୍ପର୍କ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛି ।
ଯକୃତ ରୋଗରେ ପୀଡ଼ିତ ସାନ ଯା’ ଉମାକାନ୍ତି ପ୍ରଧାନଙ୍କୁ ଯକୃତ ଦାନକରି ନୂଆ ଜୀବନ ଦେଇଛନ୍ତି ପ୍ରତିମା । ଏ ନେଇ ସେ କହିଛନ୍ତି, ମୋ ସ୍ୱାମୀ ଓ ଦିଅରଙ୍କ ମା’ ନାହାନ୍ତି । ମୁଁ ବାହାଘର ହୋଇ ଆସିବା ଦିନଠୁ ଦିଅରକୁ ପୁଅ ଭଳି ଦେଖିଛି । ବାହା ହୋଇ ଉମାକାନ୍ତି ଘରକୁ ଆସିଲା । ସେ ବି ଝିଅ ହୋଇ ରହିଲା । ଏବେ ତା’ର ଏଭଳି ସମୟରେ କେମିତି ପଛକୁ ହଟିଯିବି । ମୋ ଯା’ ନୁହେଁ, ମୋ ଝିଅକୁ ଯକୃତ ଦେଇଛି । ମୋ ପିଲାଙ୍କ ଭଳି ତା’ର ବି ଛୁଆଟେ ଅଛି । ତା’ ଆଖିକୁ ଦେଖିଲେ ଭାରି କଷ୍ଟ ଲାଗେ । ଏଥିଲାଗି ମୋ ଜୀବନକୁ ବାଜି ଲଗାଇବାକୁ ବି ପ୍ରସ୍ତୁତ ଥିଲି ।
ଯକୃତ ନଷ୍ଟ ହେବାକୁ ନେଇ ଉମାକାନ୍ତିଙ୍କ ସ୍ୱାମୀ ମହାଦେବ ପ୍ରଧାନ କହିଛନ୍ତି, ୨୦୨୦ ଫେବ୍ରୁଆରୀ ୧୬ରେ ସମ୍ବଲପୁର ଜାତୀୟ ରାଜପଥକୁ ଲାଗିଥିବା ଏକ ଘରୋଇ ହସ୍ପିଟାଲରେ ସ୍ତ୍ରୀଙ୍କ ଅସ୍ତ୍ରୋପଚାର ହୋଇଥିଲା । ପିତ୍ତକୋଷରେ ପଥୁରି ରୋଗ ହୋଇଥିବାରୁ ସେଠାରେ ଅପରେସନ କରାଗଲା । ହେଲେ ପିତ୍ତନଳୀକୁ ଡାକ୍ତର କାଟି ଦେଇଥିବା ଜଣାପଡ଼ିଲା । ଏହି ଘଟଣାର ୪ ବର୍ଷ ପରେ ଅର୍ଥାତ ୨୦୨୪ ଡିସେମ୍ବର ୫ରେ ସ୍ତ୍ରୀଙ୍କ ଯକୃତ ସମ୍ପୂର୍ଣ୍ଣ ନଷ୍ଟ ହୋଇଯାଇଥିବା ହାଇଦ୍ରାବାଦର ଏକ ଡାକ୍ତରଖାନାରେ ଜଣାପଡ଼ିଲା । ଲିଭର ପ୍ରତିରୋପଣ ନ ହେଲେ ଜୀବନ ପ୍ରତି ବିପଦ ଥିବାରୁ ତୁରନ୍ତ ଡୋନର୍ ଖୋଜିବାକୁ ପରାମର୍ଶ ଦେଇଥିଲେ । ମୋର ବ୍ଲଡଗ୍ରୁପ୍ ମ୍ୟାଚ୍ କଲା ନାହିଁ । ହେଲେ ଭାଉଜ ପ୍ରତିମାଙ୍କ ବ୍ଲଡଗ୍ରୁପ ମ୍ୟାଚ୍ ହୋଇଥିଲା । ନିଜ ସ୍ୱାସ୍ଥ୍ୟବସ୍ଥା କଥା ନ ଭାବି ସେ ଯକୃତ ଦେବାକୁ ତୁରନ୍ତ ରାଜି ହୋଇଗଲେ । ଗତ ୬ ତାରିଖରେ ହାଇଦ୍ରାବାଦରେ ଅସ୍ତ୍ରୋପଚାର ହୋଇଛି । ରବିବାର ପ୍ରତିମା ଆଇସିୟୁରୁ ବାହାରିଛନ୍ତି । ତାଙ୍କର ସ୍ୱାସ୍ଥ୍ୟାବସ୍ଥା ଭଲ ଅଛି । ମୋ ସ୍ତ୍ରୀ ଏବେ ବି ଆଇସିୟୁରେ ରହିଛନ୍ତି । ପ୍ରତିମାଙ୍କ ତ୍ୟାଗ ହିଁ ଉମାକାନ୍ତିଙ୍କୁ ନୂଆ ଜୀବନ ଦେଇଛି । ଯକୃତ ଦେବାକୁ କାଗଜପତ୍ର ପାଇଁ ଜଟିଳ ସମସ୍ୟା ହୋଇଥିଲା । ହେଲେ ଭଟ୍ଲି ବିଧାୟକ ଈରାଶିଷ ଆଚାର୍ଯ୍ୟ ବହୁତ ସାହାଯ୍ୟ କରିଥିଲେ ବୋଲି ମହାଦେବ କହିଛନ୍ତି ।
