ଢେଙ୍କାନାଳ,୦୮/୦୮: ଢେଙ୍କାନାଳ ସଦର ଥାନା ତରଭା ଫାଣ୍ଡି ନୂଆଗାଁରେ ଅଘଟଣ। ଜଣଙ୍କ ଘର ଉପରକୁ ବୋମାମାଡ଼ । ବୋମାମାଡ଼ରେ ଘର ମାଲିକ ବିଜୟ ନାଏକ ଆହତ ହୋଇଛନ୍ତି । ତେବେ କେଉଁ କାରଣରୁ ବୋମାମାଡ ହୋଇଛି ଜଣାପଡିନଥିବା ବେଳେ ପୁଲିସ ପହଞ୍ଚି କରୁଛି ଛାନଭିନ୍ ।
ସୂଚନା ମୁତାବକ, ଗୁରୁବାର ରାତି ପ୍ରାୟ ୩ଟା ବେଳେ ବିଜୟଙ୍କ ପରିବାର ଶୋଇଥିଲେ । ସେହି ସମୟରେ ଦୁର୍ବୃତ୍ତ ତାଙ୍କ ଘର ଉପରକୁ ବୋମା ମାଡ କରିଥିଲେ । ଘର ଝରକା ଉପରେ ବୋମା ପଡିଥିଲା । ଯାହାଫଳରେ ଲୁହା ଝରକା ସହ କାନ୍ଥ ଫାଟି ଯାଇଛି । ଘର ଭିତରେ ବିଜୟ ଶୋଇଥିବାରୁ କାନ୍ଥ ପ୍ଲାଷ୍ଟର ଛିଟିକି ତାଙ୍କ ମୁଣ୍ଡରେ ବାଜିବାରୁ ମୁଣ୍ଡ ଫାଟିଛି। ଏନେଇ ବିଜୟଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ଜଣାପଡ଼ିଛି। ତେବେ ସେ ଜଣେ ଚିତ୍ରକର ହୋଇଥିବାବେଳେ ତାଙ୍କର କାହା ସହ ଶତୃତା ନାହିଁ ବୋଲି ସେ କହିଛନ୍ତି । ଘଟଣାର ପ୍ରକୃତ କାରଣ ସ୍ପଷ୍ଟ ହୋଇନାହିଁ । ଏନେଇ ସଦର ପୁଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚି ତଦନ୍ତ କରୁଛି।
