ବେତନଟୀ,୦୯/୧୦: ୧୮ନମ୍ୱର ଜାତୀୟ ରାଜପଥ ଗଡ଼ଦେଉଳିଆ ଠାରେ ସଡ଼କ ଦୁର୍ଘଟଣା । ସୋମବାର ଅପରାହ୍ନ ଦେଢ଼ଟା ପାଖାପାଖି ସମୟରେ ଏକ ଟ୍ରକ୍ ଧକ୍କାରେ ଜଣେ ବୁଲେଟ୍ ଚାଳକଙ୍କର ଶୋଚନୀୟ ମୃତ୍ୟୁ ହୋଇଥିବା ବେଳେ ଜଣେ ଆହତ ହୋଇଛନ୍ତି । ମୃତ ଯୁବକ ଜଣକ ବାଲେଶ୍ୱର ଜିଲ୍ଲା ବାଲିଆପାଳ ଅଞ୍ଚଳର ଶିବ ଶଙ୍କର ଦାଶ ଏବଂ ଆହତ ଯୁବକ ଜଣକ ବିଶ୍ୱଜିତ ସେଠୀ ବୋଲି ଜଣା ପଡିଛି । ମୟୂରଭଞ୍ଜ ଜିଲ୍ଲା ବେତନଟୀ ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ବାଲେଶ୍ୱର ସହରରେ ଥିବା ସାଇସାଧନା ଅନୁଷ୍ଠାନର ଶିବ ଶଙ୍କର ଦାଶ ଓ ବିଶ୍ୱଜିତ ସେଠୀ ଓଡି -୦୧ଏୟୁ-୨୮୪୨ ନମ୍ବର ବିଶିଷ୍ଟ ବୁଲେଟ୍ ଯୋଗେ ବୈଶିଙ୍ଗାରୁ ବାଲେଶ୍ୱର ଅଭିମୁଖେ ଯାଉଥିଲେ । ଶିବ ଶଙ୍କର ବାଇକ ଚଳାଉଥିବା ବେଳେ ବିଶ୍ୱଜିତ ପଛରେ ବସିଥିଲେ । ସେହି ସମୟରେ ସମାନ ଦିଗରେ ବାଲେଶ୍ୱର ଯାଉଥିବା ଏମଏଚ -୪୦ବିଜି -୪୫୧୧ନମ୍ବର ବିଶିଷ୍ଟ ଟ୍ରକ୍ଟି ପଛପଟୁ ଆସି ବୁଲେଟ୍କୁ ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ହିଁ ଶିବ ଶଙ୍କରଙ୍କ ଶୋଚନୀୟ ମୃତ୍ୟୁ ଘଟିଥିବା ବେଳେ ବିଶ୍ୱଜିତ ସାମାନ୍ୟ ଆହତ ହୋଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ବୈଶିଙ୍ଗା ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏହା ସହ ଆହତ ବିଶ୍ୱଜିତଙ୍କୁ ଚିକିତ୍ସା ପାଇଁ ଡାକ୍ତରଖାନାକୁ ପଠାଇଛି । ଏଥି ସହିତ ଉଭୟ ଦୁର୍ଘଟଣାଗ୍ରସ୍ତ ଟ୍ରକ୍ ଓ ମୋଟର ସାଇକେଲକୁ ଜବତ କରି ତଦନ୍ତ ଆରମ୍ଭ କରିଛି ।
