ନୂଆଦିଲ୍ଲୀ: ୨୦୨୩ ମେ ମାସରେ ସରକାର ଦୁଇ ହଜାର ଟଙ୍କିଆ ନୋଟକୁ ସମ୍ପୂର୍ଣ୍ଣ ବନ୍ଦ କରିଦେଇଥିଲେ। ଦୁଇ ହଜାର ଟଙ୍କିଆ ନୋଟ୍ ବନ୍ଦ ହେବାର ପ୍ରାୟ ଦୁଇ ବର୍ଷ ହୋଇଗଲାଣି। ପ୍ରକୃତରେ, ଦୁଇ ହଜାର ଟଙ୍କିଆ ନୋଟ ଯୋଗୁଁ ଲୋକମାନେ କାରବାରରେ ବହୁତ ସମସ୍ୟାର ସମ୍ମୁଖୀନ ହେଉଥିଲେ, କାରଣ ଅଧିକାଂଶ ଲୋକଙ୍କ ପାଖରେ ଦୁଇ ହଜାର ଟଙ୍କାର ଖୁଚୁରା ଟଙ୍କା ନଥିଲା। ଆରବିଆଇ ରିପୋର୍ଟରୁ ଜଣାପଡିଛି ଯେ ଭାରତୀୟ ରିଜର୍ଭ ବ୍ୟାଙ୍କ ୨୦୦୦ ଟଙ୍କା ନୋଟ୍ ପ୍ରତ୍ୟାହାର କରିବାର ଦୁଇ ବର୍ଷ ପରେ ମଧ୍ୟ ୬,୨୬୬ କୋଟି ଟଙ୍କାର ନୋଟ୍ ପ୍ରଚଳନରେ ରହିଛି। ଏହି ସୂଚନା ଏବେ RBI ତଥ୍ୟରୁ ପ୍ରକାଶ ପାଇଛି।

ଦୁଇ ହଜାର ଟଙ୍କାର ବ୍ୟାଙ୍କ ନୋଟ୍ ଏବେ ବି ବୈଧ ଏବଂ ପ୍ରଚଳିତ ରହିଛି ।୧୯ ମେ, ୨୦୨୩ ରେ ୨୦୦୦ ଟଙ୍କିଆ ନୋଟ୍ ପ୍ରଚଳନରୁ ପ୍ରତ୍ୟାହାର କରିବା ପାଇଁ RBI ଘୋଷଣା କରିଥିଲା। ତେବେ ଆଜି (ଶୁକ୍ରବାର) ଏକ ବିବୃତ୍ତିରେ RBI କହିଛି ଯେ,୩୦ ଏପ୍ରିଲ ୨୦୨୫ ସୁଦ୍ଧା, ମୋଟ ୬,୨୬୬ କୋଟି ଟଙ୍କାର ୨୦୦୦ ଟଙ୍କିଆ ନୋଟ୍ ବର୍ତ୍ତମାନ ପ୍ରଚଳନରେ ଅଛି।

୧୯ ମେ ୨୦୨୩ ସୁଦ୍ଧା, ସେହି ସମୟରେ ପ୍ରଚଳନରେ ଥିବା ୨୦୦୦ ଟଙ୍କାର ବ୍ୟାଙ୍କ ନୋଟର ମୋଟ ମୂଲ୍ୟ ୩.୫୬ ଲକ୍ଷ କୋଟି ଟଙ୍କା ଥିଲା। କେନ୍ଦ୍ରୀୟ ବ୍ୟାଙ୍କ କହିଛି,"ଏହିପରି, ୧୯ ମେ, ୨୦୨୩ ସୁଦ୍ଧା ପ୍ରଚଳନରେ ଥିବା ୨୦୦୦ ଟଙ୍କାର ବ୍ୟାଙ୍କ ନୋଟର ୯୮.୨୪ ପ୍ରତିଶତ ଫେରି ଆସିଛି।"

ଦେଶର ସମସ୍ତ ବ୍ୟାଙ୍କ ଶାଖାରେ ଦୁଇ ହଜାର ଟଙ୍କିଆ ବ୍ୟାଙ୍କ ନୋଟ୍ ଜମା କରିବା କିମ୍ବା ବଦଳାଇବାର ସୁବିଧା ୭ ଅକ୍ଟୋବର, ୨୦୨୩ ପର୍ଯ୍ୟନ୍ତ ଉପଲବ୍ଧ ଥିଲା। ବିମୁଦ୍ରୀକରଣ ହୋଇଥିବା ୨୦୦୦ ଟଙ୍କା ନୋଟ୍ ବଦଳାଇବାର ସୁବିଧା ୧୯ ମେ ୨୦୨୩ ଠାରୁ ରିଜର୍ଭ ବ୍ୟାଙ୍କର ୧୯ଟି ଜାରି କାର୍ଯ୍ୟାଳୟରେ ଉପଲବ୍ଧ। ଆରବିଆଇ ଜାରି କାର୍ଯ୍ୟାଳୟ ଗୁଡ଼ିକ ମଧ୍ୟ ୯ ଅକ୍ଟୋବର, ୨୦୨୩ ଠାରୁ ବ୍ୟକ୍ତି ଏବଂ ସଂସ୍ଥା ମାନଙ୍କ ଠାରୁ ୨୦୦୦ ଟଙ୍କା ନୋଟ୍ ସେମାନଙ୍କ ବ୍ୟାଙ୍କ ଆକାଉଣ୍ଟରେ ଜମା କରିବା ପାଇଁ ଗ୍ରହଣ କରୁଛନ୍ତି ।