ଭୁବନେଶ୍ୱର,୦୧/୧୨: ରାଜ୍ୟରେ ଚଳିତ ଆର୍ଥିକ ବର୍ଷ ୨୦୨୪-୨୫ରେ ୨୪୮୯ ଜଣ ଏଡ୍ସ ରୋଗୀ ଚିହ୍ନଟ ହୋଇଥିବା ବେଳେ ପୂର୍ବ ଆର୍ଥିକ ବର୍ଷରେ ୩୭୨୬ ଜଣ ଚିହ୍ନଟ ହୋଇଥିଲେ । ତେଣୁ ପୂର୍ବ ବର୍ଷ ଅପେକ୍ଷା ଏଡ୍ସ ରୋଗୀଙ୍କ ସଂଖ୍ୟା କମିଛି ।
ଆଜି ବିଶ୍ୱ ଏଡ୍ସ ଦିବସ ପାଳନ କରାଯାଉଛି । ଏହି ଦିବସର ବିଷୟବସ୍ତୁ ରହିଛି ‘ଠିକ୍ ମାର୍ଗ ଅନୁସରଣ କର: ମୋ ସ୍ୱାସ୍ଥ୍ୟ ମୋ ଅଧିକାର’। ଓଡ଼ିଶା ଷ୍ଟେଟ୍ ଏଡ୍ସ କଣ୍ଟ୍ରୋଲ ସୋସାଇଟି ପକ୍ଷରୁ ମିଳିଥିବା ସୂଚନା ଅନୁଯାୟୀ, ୨୦୧୨ ମସିହାରୁ ଏ ପର୍ଯ୍ୟନ୍ତ ରାଜ୍ୟରେ ମୋଟ ୬୩ ହଜାର ୪୩୭ ରୋଗୀ ଚିହ୍ନଟ ହୋଇଛନ୍ତି । ଏଥିମଧ୍ୟରୁ ୧୨ହଜାର ୬୩୯ ଜଣଙ୍କ ମୃତ୍ୟୁ ହୋଇଥିଲା ବେଳେ ୪୭ହଜାର ୫୦୭ ବଞ୍ଚିଛନ୍ତି । ଆଉ କେତେଜଣ ବାହାର ରାଜ୍ୟର ରୋଗୀ ହୋଇଥିବାବେଳେ ସେମାନେ ଜୀବିତ କିମ୍ବା ମୃତ ତାହା ଜଣାପଡିନାହିଁ । ସେହିପରି ରାଜ୍ୟରେ ଜନ୍ମରୁ ୧୪ବର୍ଷ ମଧ୍ୟରେ ୨୭୦୮ ଜଣ ରୋଗୀ ଅଛନ୍ତି । ତେବେ ଚଳିତ ଆର୍ଥିକ ବର୍ଷରେ ଏପର୍ଯ୍ୟନ୍ତ ଏଥିମଧ୍ୟରୁ ୭୦ ଜଣ ଏହି ବର୍ଗର ରୋଗୀ ବୋଲି ଜଣାପଡିଛି । ଏବେ ରାଜ୍ୟରେ ଯେତେ ରୋଗୀ ଅଛନ୍ତି ସେମାନଙ୍କ ମଧ୍ୟରୁ ୦.୮ ପ୍ରତିଶତ ଛୁଞ୍ଚି ଓ .୦୯ ପ୍ରତିଶତ ରୋଗୀ ରକ୍ତ ଦ୍ୱାରା ସଂକ୍ରମିତ । ୨୦୧୨ ମସିହାରେ ୭ ଲକ୍ଷ ପରୀକ୍ଷା କରାଯାଇଥିଲା । ସେଥିରୁ ୧.୨୫ ପ୍ରତିଶତ ରୋଗୀ ଚିହ୍ନଟ ହୋଇଥିଲେ । ସେହିପରି ୨୦୨୩ରେ ୧୪ ଲକ୍ଷ ପରୀକ୍ଷା କରାଯାଇଥିଲା । ସେଥିରୁ ୦.୩ ପ୍ରତିଶତ ରୋଗୀ ଚିହ୍ନଟ ହୋଇଥିଲେ । ଗର୍ଭବତୀଙ୍କ ପରୀକ୍ଷା ବାଧ୍ୟତାମୂଳକ କରାଯାଇଛି ।
୨୦୧୨ରୁ ଆଜି ପର୍ଯ୍ୟନ୍ତ ରାଜ୍ୟରେ ଗଞ୍ଜାମ ଓ କଟକ ଜିଲ୍ଲାରେ ଏଡ୍ସ ରୋଗୀଙ୍କ ସଂଖ୍ୟା ଅଧିକ । ଗଞ୍ଜାମରେ ୧୯୧୫୫, କଟକରେ ୭୯୯୪, ବାଲେଶ୍ୱରରେ ୨୨୧୦, ଖୋର୍ଦ୍ଧାରେ ୪୨୧୦, କୋରାପୁଟରେ ୨୮୬୫, ସମ୍ବଲପୁରରେ ୩୮୦୭, ନୟାଗଡ଼ରେ ୧୧୪୫, ମୟୂରଭଞ୍ଜରେ ୧୪୫୪, ନବରଙ୍ଗପୁରରେ ୧୪୮୦, ପୁରୀରେ ୧୨୬୪, ସୁନ୍ଦରଗଡ଼ରେ ୧୩୬୫, ଅନୁଗୁଳରେ ୨୬୪୧, ଭଦ୍ରକରେ ୧୧୯୮, ବଲାଙ୍ଗିରରେ ୨୩୪୫, ବାଲେଶ୍ୱରରେ ୨୨୧୦ ଓ ରାୟଗଡ଼ାରେ ୨୧୪୬ ରୋଗୀ ଚିହ୍ନଟ ହୋଇଛନ୍ତି ।
