ନୂଆଦିଲ୍ଲୀ,୧୯।୩: ବଦଳିକ କି କେନ୍ଦ୍ର କର୍ମଚାରୀଙ୍କ ଅବସର ବୟସ ? ଏହାର ଉତ୍ତରରେ କେନ୍ଦ୍ର କାର୍ମିକ ରାଷ୍ଟ୍ରମନ୍ତ୍ରୀ ଜିତେନ୍ଦ୍ର ସିଂହ କହିଛନ୍ତି ସରକାର ଏଭଳି କୌଣସି ପ୍ରସ୍ତାବ ଉପରେ ବିଚାର କରୁନାହାନ୍ତି। ବୁଧବାର ଲୋକ ସଭାରେ ଏକ ପ୍ରଶ୍ନର ଲିଖିତ ଉତ୍ତରରେ ସେ ଏହି ସୂଚନା ଦେଇଛନ୍ତି। ସେ କହିଛନ୍ତି ଯେ ଜାତୀୟ ପରିଷଦଠାରୁ କର୍ମଚାରୀମାନଙ୍କ କୌଣସି ଆନୁଷ୍ଠାନିକ ପ୍ରସ୍ତାବ ମିଳିନାହିଁ। କେନ୍ଦ୍ର ଓ ବିଭିନ୍ନ ରାତ୍ୟ ସରକାରଙ୍କ କର୍ମଚାରୀଙ୍କ ଅବସର ବୟସର ବିବରଣୀ ଓ ତାଙ୍କର ଅବସର ବୟସରେ ଅସମାନତା କାରଣର ପ୍ରଶ୍ନ ଉପରେ ସିଂହ କହିଛନ୍ତି, ସରକାରରେ ଏଭଳି କୌଣସି ଡାଟା କେନ୍ଦ୍ରୀୟ ରୂପରେ ରଖାଯାଏନି, କାରଣ ବିଷୟ ରାଜ୍ୟର ସୂଚୀରେ ଆସିଥାଏ।’'
ଏହା ବ୍ୟତୀତ ଅନ୍ୟ ଏକ ପ୍ରଶ୍ନର ଉତ୍ତରରେ କେନ୍ଦ୍ର ବୁଧବାର ଦିନ କହିଛି ଯେ ବୃଦ୍ଧ ପେନସନଭୋଗୀଙ୍କୁ ଅତିରିକ୍ତ ପେନସନ ଦିଆଯାଇଛି। କାରଣ ଏହା ସେମାନଙ୍କ ଆବଶ୍ୟକତା ବିଶେଷକରି ସ୍ୱାସ୍ଥ୍ୟ ସମ୍ବନ୍ଧୀୟ ଅବସ୍ଥାକୁ ବିଚାର ଦିଆଯାଏ। କେନ୍ଦ୍ର କାର୍ମିକ ରାଷ୍ଟ୍ରମନ୍ତ୍ରୀ ଜିତେନ୍ଦ୍ର ସିଂହ ଲୋକସଭାରେ ଏକ ପ୍ରଶ୍ନର ଲିଖିତ ଉତ୍ତରରେ କହିଛନ୍ତି ଯେ ପେନସନ ପ୍ରଦାନକାରୀ କର୍ତ୍ତୃପକ୍ଷ/ବ୍ୟାଙ୍କ ଦ୍ୱାରା ପେନସନଭୋଗୀ/ପରିବାର ପେନସନଭୋଗୀଙ୍କୁ ଅତିରିକ୍ତ ପେନସନ ସ୍ୱୟଂଚାଳିତ ଭାବରେ ପ୍ରଦାନ କରାଯାଏ।
ମନ୍ତ୍ରୀଙ୍କ କହିବା ଅନୁସାରେ, ଷଷ୍ଠ କେନ୍ଦ୍ରୀୟ ବେତନ କମିଶନ (ସିପିସି)ର ସୁପାରିଶ ଅନୁଯାୟୀ ସରକାର ୮୦ ବର୍ଷ ବୟସରେ ୨୦ ପ୍ରତିଶତ, ୮୫ ବର୍ଷ ବୟସରେ ୩୦ ପ୍ରତିଶତ, ୯୦ ବର୍ଷ ବୟସରେ ୪୦ ପ୍ରତିଶତ, ୯୫ ବର୍ଷ ବୟସରେ ୫୦ ପ୍ରତିଶତ ଏବଂ ୧୦୦ ବର୍ଷ ବୟସରେ ଶତ ପ୍ରତିଶତ ଅତିରିକ୍ତ ପେନସନ ମଞ୍ଜୁର କରିଛନ୍ତି।
