ମାଲକାନଗିରି, ୯/୫ : ଆଦିବାସୀ ଅଧ୍ୟୁଷିତ ମାଲକାନଗିରି ଜିଲ୍ଲାରେ ପ୍ରାୟ ୮୫ ପ୍ରତିଶତ ଲୋକେ କୃଷି ଉପରେ ନିର୍ଭର କରି ଚଳିଥାନ୍ତି। ଏହା ଏକ କୃଷି ପ୍ରଧାନ୍ୟ ଜିଲ୍ଲା କହିଲେ ଅତ୍ୟୁକ୍ତି ହେବ ନାହିଁ। ଜିଲ୍ଲା କୃଷି ବିଭାଗ ପକ୍ଷରୁ ବିଭିନ୍ନ ଯୋଜନା ରହିଛି, ହେଲେ ଜିଲ୍ଲା କୃଷି ବିଭାଗରେ ୧୭୬ ଟି ପଦବୀ ଥିବା ବେଳେ ମାତ୍ର ୮୨ଜଣ କର୍ମଚାରୀ ଜିଲ୍ଲାକୁ ଚଲାଇଛନ୍ତି। ଜିଲ୍ଲା କୃଷି ବିଭାଗରେ ୯୪ଟି ପଦବୀ ଖାଲି ପଡିଥିବାରୁ ଉନ୍ନୟନ କାର୍ଯ୍ୟରେ ବାଧାସୃଷ୍ଟି ହେଉଛି।
ବିଶେଷ କରି ୧୧୧ ଟି ପଞ୍ଚାୟତ ପାଇଁ ଭିଏଡବ୍ଲୁ ୮୭ଟି ପଦବୀର ଆବଶ୍ୟକ ସ୍ଥଳେ ଅଛନ୍ତି ମାତ୍ର ୪୩ ଜଣ । ଖାଲି ପଡିଛି ୪୪ଟି ପଦବୀ। ସହକାରୀ କୃଷି ଅଧିକାରୀ ୧୫ଟି ପଦବୀ ସ୍ଥଳେ ଅଛନ୍ତି ମାତ୍ର ୨ଜଣ। ୧୩ଟି ପଦବୀ ଖାଲି ପଡିଛି। ୩ଟି ଅତିରିକ୍ତ ଜିଲ୍ଲା କୃଷି ଅଧିକାରୀ ପଦବୀ ମଧ୍ୟରୁ ୨ଜଣ ଥିବା ବେଳେ ଗୋଟିଏ ପଦବୀ ଦୀର୍ଘ ବର୍ଷ ହେଲା କେହି ନାହାନ୍ତି। ବ୍ଲକ କୃଷି ଅଧିକାରୀ ୯ଟି ପଦବୀ ମଧ୍ୟରୁ ୪ଟି ଖାଲିପଡିଛି । ସେକ୍ସନ ଅଫିସର ୪ଟି ମଧ୍ୟରୁ ୨ଟି ରେ କେହି ନାହାନ୍ତି। ବରିଷ୍ଠ ଓ କନିଷ୍ଠ ହିସାବ ରକ୍ଷକ ୧୭ଟି ପଦବୀ ମଧ୍ୟରୁ ଖାଲିପଡିଛି ୧୦ଟି ପଦବୀ। କନିଷ୍ଠ ସହାୟକ ୫ଟି ଯାକ ପଦବୀ ଖାଲି ପଡିଛି। ପିଅନ ୧୦ଟି ପଦବୀ ମଧ୍ୟରୁ ୮ଟି ପଦବୀ , ରାତ୍ର ଜଗୁଆଳି ୭ଟି ପଦବୀ ମଧ୍ୟରୁ ୪ଟି ପଦବୀ ଖାଲିପଡିଛି । ଏହା ବ୍ୟତୀତ ଅନ୍ୟାନ୍ୟ ପଦବୀ ଖାଲିପଡିଛି। କୃଷି ପରି ଗୁରୁତ୍ୱ ପୂର୍ଣ୍ଣ ବିଭାଗରେ ଯଦି ୯୪ଟି ପଦବୀ ଖାଲି ପଡିବ ବିଭାଗର ଉନ୍ନୟନ ମୂଳକ କାର୍ଯ୍ୟ କିପରି ହେବ ବୋଲି ସାଧାରଣରେ ଚର୍ଚ୍ଚା ହେଉଛି।
