ନୂଆଦିଲ୍ଲୀ ୧୧/୦୯: ବିଭିନ୍ନ ସମୟରେ ଭାରତ ଆଗରେ ଦବ୍ଦବା ଦେଖାଇଥାଏ ଚୀନ । ଭାରତର ବିନିର୍ମାଣ କ୍ଷେତ୍ରକୁ ହାନି ପହଞ୍ଚାଇବା ପାଇଁ ଏହା କେତେକ ସାମଗ୍ରୀର ରପ୍ତାନି ବ୍ୟାନ୍ କରିଦିଏ କିମ୍ବା ରପ୍ତାନି ପରିମାଣକୁ କମ୍ କରିଦିଏ । ନିକଟରେ ଚୀନ୍ ରେୟାର୍ ଆର୍ଥ ଧାତବର ରପ୍ତାନି ଉପରେ ରୋକ୍ ଲଗାଇଥିଲା । ଏବେ ଭାରତ ଏଭଳି ପରିସ୍ଥିତିର ମୁକାବିଲା ପାଇଁ ବିକଳ୍ପ ଖୋଜିସାରିଲାଣି । ଚୀନ୍ ଉପରୁ ନିର୍ଭରତା କମାଇବାକୁ ଏହା ଅନ୍ୟ ବାଟ ବାହାର କରୁଛି ।
ରୟଟର୍ସର ଏକ ତଥ୍ୟ ଅନୁସାରେ, ଭାରତ ମ୍ୟାନ୍ମାର୍ର ଏକ ଶକ୍ତିଶାଳୀ ବିଦ୍ରୋହୀ ଗୋଷ୍ଠୀଙ୍କ ସାହାଯ୍ୟରେ ଦୁର୍ଲଭ ଖଣିଜର ନମୁନା ନେବାକୁ ଉଦ୍ୟମ କରୁଛି । ଭାରତର ଖଣି ମନ୍ତ୍ରାଳୟ ରାଷ୍ଟ୍ରାୟତ୍ତ ଏବଂ ଘରୋଇ କମ୍ପାନିଗୁଡ଼ିକୁ ମ୍ୟାନ୍ମାରର ଉତ୍ତର ପୂର୍ବ ଅଞ୍ଚଳରେ ଥିବା ଖଣିଗୁଡ଼ିକରୁ ନମୁନା ଆଣିବା ପାଇଁ କହିଛି । ଏହି ଖଣିଗୁଡ଼ିକ କଚୀନ ଇଣ୍ଡିପେଣ୍ଡେନ୍ସ ଆର୍ମୀ(କିଆ)ର ନିୟନ୍ତ୍ରଣରେ ଅଛି । ମନ୍ତ୍ରାଳୟ ଚାହେଁ ଯେ, କମ୍ପାନିଗୁଡ଼ିକ ଏହି ଖଣିଜଗୁଡ଼ିକର ନମୁନା ପରୀକ୍ଷଣ କରନ୍ତୁ । ନମୁନାରେ ଭାରୀ ଦୁର୍ଲଭ ଖଣିଜ ରହିଛି ଅବା ନାହିଁ ତାହା ସୁନିଶ୍ଚିତ କରନ୍ତୁ । ଏହି ଖଣିଜର ବ୍ୟବହାର ଇଲେକ୍ଟ୍ରିକ୍ ଯାନ ଏବଂ ଅନ୍ୟ ଆଧୁନିକ ଉପକରଣରେ ବ୍ୟବହାର ହେଉଥିବା ଚୁମ୍ବକ ତିଆରିରେ କରାଯାଇଥାଏ ।
ସୂତ୍ର ଅନୁସାରେ, ସରକାରୀ କମ୍ପାନି ଆଇଆର୍ଇଏଲ୍ ଏବଂ ଘରୋଇ କମ୍ପାନି ମିଡ୍ୱେଷ୍ଟ ଆଡ୍ଭାନ୍ସଡ ମାଟେରିଆଲ୍ସ ଏହି ଆଲୋଚନାରେ ସାମିଲ ଅଛନ୍ତି । ଗତବର୍ଷ ମିଡ୍ୱେଷ୍ଟ ଆଡ୍ଭାନ୍ସଡ ମାଟେରିଆଲ୍ସକୁ ଦୁର୍ଲଭ ଖଣିଜରୁ ଚୁମ୍ବକ ତିଆରି କରିବା ପାଇଁ ସରକାରୀ ପାଣ୍ଠି ମିଳିଥିଲା ।
