ନୂଆଦିଲ୍ଲୀ: ଜଣେ ୧୯ ବର୍ଷୀୟ କଲେଜ ଛାତ୍ରୀଙ୍କ ପିତାମାତା କାଲିଫର୍ନିଆର ଏକ କୋର୍ଟରେ ବୈଦ୍ୟୁତିକ ଯାନ ନିର୍ମାତା ଟେସଲା ବିରୋଧରେ ଏକ ମାମଲା ଦାୟର କରିଛନ୍ତି। ସେମାନେ ଅଭିଯୋଗ କରିଛନ୍ତି ଯେ ଡିଜାଇନ୍ ଜନିତ ତ୍ରୁଟି ଯୋଗୁଁ ତାଙ୍କ ଝିଅ ଜଳୁଥିବା କାରରୁ ବାହାରକୁ ବାହାରି ପାରି ନଥିଲେ ଏବଂ ନିଆଁ ଏବଂ ଧୂଆଁରେ ପୋଡ଼ି ଯିବା ଯୋଗୁଁ ତାଙ୍କର ମୃତ୍ୟୁ ହୋଇଥିଲା।
ଝିଅଟିର ବାପାମାଆ ଅଭିଯୋଗ କରିଛନ୍ତି ଯେ ଟେସଲା ବର୍ଷ ବର୍ଷ ଧରି ଏହି ତ୍ରୁଟି ବିଷୟରେ ଜାଣିଥିଲେ ମଧ୍ୟ ଏହାକୁ କେବେ ସଜାଡ଼ି ନଥିଲା। ଏହି କାରଣରୁ ଦୁର୍ଘଟଣା ସମୟରେ ବାହାରକୁ ବାହାରିବାକୁ ଚେଷ୍ଟା କରିବା ସତ୍ତ୍ୱେ ତାଙ୍କ ଝିଅ କ୍ରିଷ୍ଟା ସୁକାହାରା ଗାଡ଼ି ଭିତରେ ଫସି ଯାଇଥିଲା।
ମିଳିଥିବା ସୂଚନା ଅନୁଯାୟୀ, କ୍ରିଷ୍ଟା ସାନ ଫ୍ରାନ୍ସିସ୍କୋ ନିକଟସ୍ଥ କେଉଁ ଏକ ସ୍ଥାନକୁ ଯିବାପାଇଁ ସେ ଏକ ଟେସଲା ସାଇବରଟ୍ରକ ବୁକ୍ କରିଥିଲେ। ତେବେ ଉକ୍ତ ଗାଡି ଚଳାଉଥିବା ଡ୍ରାଇଭର ଜଣକ ମଦ୍ୟପାନ କରିଥିଲେ ଏବଂ ଡ୍ରଗ୍ସ ସେବନ କରିଥିଲେ। ଏଣୁ ଡ୍ରାଇଭର ଜଣକ ଭାରସାମ୍ୟ ହରାଇ ଟ୍ରକଟିକୁ ନେଇ ଏକ ଗଛରେ ବାଡେଇ ଦେଇଥିଲେ। ଡ୍ରାଇଭର ସମେତ ଗାଡ଼ି ଭିତରେ ଥିବା ଚାରି ଜଣଙ୍କ ମଧ୍ୟରୁ ତିନି ଜଣଙ୍କର ଦୁର୍ଘଟଣାରେ ମୃତ୍ୟୁ ହୋଇଥିଲା। ଚତୁର୍ଥ ଯାତ୍ରୀଙ୍କୁ ଝରକା ତାଡି ଉଦ୍ଧାର କରାଯାଇଥିଲା।
ଏହି ମାମଲାଟିରେ ଅଭିଯୋଗ କରାଯାଇଛି ଯେ ବ୍ୟାଟେରୀରେ ନିଆଁ ଲାଗିଗଲେ କିମ୍ବା ଅନ୍ୟଥା ବିଫଳ ହେଲେ ଟେସଲା କାରଗୁଡ଼ିକର ଦ୍ୱାର ଖୋଲିପାରେ ନାହିଁ। ବ୍ୟାଟେରୀ ଲକ୍ ବିଚ୍ଛିନ୍ନ କରୁଥିବା ମାନୁଆଲ୍ ରିଲିଜ୍ ଖୋଜିବା କଷ୍ଟକର। ଏହି ତ୍ରୁଟି ହିଁ କ୍ରିଷ୍ଟାଙ୍କ ମୃତ୍ୟୁର କାରଣ ହୋଇଥିଲା।
ଟେସଲା ଗାଡ଼ିଗୁଡ଼ିକର ସୁରକ୍ଷାକୁ ନେଇ ଆଗରୁ ମଧ୍ୟ ଅନେକ ମାମଲା ରୁଜୁ ହୋଇଛି। ଗତ ଅଗଷ୍ଟ ମାସରେ, ଫ୍ଲୋରିଡାର ଏକ ଜୁରି ଟେସଲା ସହିତ ଧକ୍କା ହେବା ପରେ ମୃତ୍ୟୁବରଣ କରିଥିବା ଜଣେ ଛାତ୍ରଙ୍କ ପରିବାରକୁ ୨ କୋଟିରୁ ଅଧିକ କ୍ଷତିପୂରଣ ରାଶି ପ୍ରଦାନ କରିଥିଲେ।
ଆମେରିକାର ନ୍ୟାସନାଲ ହାଇୱେ ଟ୍ରାଫିକ୍ ସେଫ୍ଟି ଆଡମିନିଷ୍ଟ୍ରେସନ୍ (NHTSA) ଗତ ମାସରେ ଟେସଲା କାରଗୁଡ଼ିକର ଦ୍ୱାରରେ ଫସି ରହିବା ସମସ୍ୟା ଉପରେ ଏକ ତଦନ୍ତ ଆରମ୍ଭ କରିଥିଲା। ଅନେକ ଡ୍ରାଇଭର ଅଭିଯୋଗ କରିଥିଲେ ଯେ ଜରୁରିକାଳିନ ପରିସ୍ଥିତିରେ ସେମାନେ ସେମାନଙ୍କ ଗାଡ଼ିରୁ ପିଲାମାନଙ୍କୁ ବାହାର କରିବା ପାଇଁ ପଛ ଦ୍ୱାର ଖୋଲି ପାରୁ ନଥିଲେ ଏବଂ କେତେକ ସମୟରେ ଝରକା ଭାଙ୍ଗି ଉଦ୍ଧାର କରିବାକୁ ବାଧ୍ୟ ହେଉଥିଲେ।
