ବଲାଙ୍ଗିର,୨୬/୧୦: ପାଟଣାଗଡ଼ ପାର୍ସଲ ବୋମା ବିସ୍ଫୋରଣ ମାମଲାର ଦୋଷୀ ପୁଞ୍ଜିଲାଲ ମେହେର ଅସୁସ୍ଥ ହୋଇ ହସ୍ପିଟାଲରେ ଭର୍ତ୍ତି ହୋଇଛି । ଗତ ୨୪ତାରିଖ ସଂଧ୍ୟାରେ ପୁଞ୍ଜିଲାଲର ସ୍ୱାସ୍ଥ୍ୟବସ୍ଥା ଅତି ଗୁରୁତର ହୋଇଯିବାରୁ ତାକୁ ଭୀମଭୋଇ ମେଡ଼ିକାଲ କଲେଜ ହସ୍ପିଟାଲର ପୁରୁଷ ମେଡ଼ିସିନ ୱାର୍ଡରେ ଭର୍ତ୍ତି କରାଯାଇଛି । ପୁଞ୍ଜିଲାଲ ପୂର୍ବରୁ ଚାକିରି କରୁଥିବା ଭଇଁଷା କଲେଜର ବିଭିନ୍ନ କାଗଜପତ୍ର ମାଗିଥିଲା । ହେଲେ ତାହା ମିଳୁନଥିବାରୁ ସେ ଅସନ୍ତୋଷ ପ୍ରକାଶ କରି ଗତ ୨୧ତାରିଖରୁ ଅନଶନରେ ବସିଥିଲା । ଏପରିକି ସେ କ୍ରମାଗତ ଖାଇବା ପିଇବା ଛାଡ଼ି ଧାରଣା ଦେଇଥିବାରୁ ଗୁରୁତର ହୋଇପଡିଥିଲା । ତେଣୁ କଡ଼ା ସୁରକ୍ଷାବଳୟ ଭିତରେ ତାକୁ ହସ୍ପିଟାଲ ନିଆଯାଇଥିବା ଜେଲ କର୍ତ୍ତୃପକ୍ଷ ସୂଚନା ଦେଇଛନ୍ତି ।
ସୂଚନାଯୋଗ୍ୟ ଯେ, ଗତ ୨୦୧୮ ମସିହା ଫେବୃଆରୀ ୨୩ତାରିଖରେ ବଲାଙ୍ଗିର ଜିଲ୍ଲା ପାଟଣାଗଡ଼ ବ୍ଲକଛକ ବାସିନ୍ଦା ରବିନ୍ଦ୍ର ସାହୁଙ୍କ ପୁଅ ସୌମ୍ୟଶେଖର ଏବଂ ସ୍ତ୍ରୀ ରୀମା ଓ ଜେଜେମା ମିଳିମିଶି ବିବାହ ଅଭ୍ୟର୍ଥନାରେ ମିଳିଥିବା ଉପହାରଗୁଡ଼ିକୁ ଖୋଲି ଦେଖୁଥିଲେ । ଉପହାର ପ୍ୟାକେଟ ସହିତ ଆସିଥିବା ଏକ ପାର୍ସଲ ଖୋଲିବା ସମୟରେ ସେଥିରୁ ପ୍ରଚଣ୍ଡ ବିସ୍ଫୋରଣ ଘଟିଥିଲା । ସେଥିରେ ଉଭୟ ବର-କନିଆଁଙ୍କ ସହ ନିକଟରେ ବସିଥିବା ଜେଜେମାଁ ଗୁରୁତର ଆହତ ହୋଇଥିଲେ । ଦେହର ଅଧିକାଂଶ ଭାଗ ବିସ୍ପୋରଣରେ ଜଳିଯାଇଥିଲା । ତିନି ଜଣଙ୍କୁ ଗୁରୁରୁତର ଅବସ୍ଥାରେ ପ୍ରଥମେ ପାଟଣାଗଡ଼ ହସପିଟାଲରେ ଭର୍ତ୍ତି କରାଯାଇଥିଲା । ଅବସ୍ଥା ସଂକଟାପନ୍ନ ଥିବାରୁ ସେମାନଙ୍କୁ ବଲାଙ୍ଗିର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ବଲାଙ୍ଗିର ହସପିଟାଲରେ ଜେଜେମାଁ ଜେମାଦେଇଙ୍କୁ ଡାକ୍ତର ମୃତ ଘୋଷଣା କରିଥିଲେ । ପରେ ନବଦମ୍ପତିଙ୍କ ସ୍ୱାସ୍ଥ୍ୟବସ୍ଥା ସଙ୍କଟାପନ୍ନ ହେବାରୁ ସୌମ୍ୟଶେଖରଙ୍କୁ ରାଉରକେଲା ସ୍ଥିତ ଆଇଜିଏଚ ହସ୍ପିଟାଲ ଏବଂ ରୀମାଙ୍କୁ ବୁର୍ଲା ବଡ଼ମେଡିକାଲକୁ ସ୍ଥାନାନ୍ତର କରାଯାଇଥିଲା । ହେଲେ ରାଉରକେଲା ଯିବା ବାଟରେ ସୌମ୍ୟଶେଖରଙ୍କ ମୃତ୍ୟୁ ହୋଇଥିଲା । ରୀମାଙ୍କୁ ବୁର୍ଲା ଡାକ୍ତରଖାନାକୁ ନିଆଯାଇଥିଲା । ଦୀର୍ଘଦିନର ଚିକିତ୍ସା ପରେ ରୀମା ସୁସ୍ଥହୋଇ ଫେରିଥିଲେ । ଏହାପରେ ବଲାଙ୍ଗିର ପୁଲିସ ଏବଂ ପରେ କ୍ରାଇମବ୍ରାଞ୍ଚ ତଦନ୍ତ କରି ଦୁଇଟି ଦଫାରେ ପ୍ରାୟ ୨ହଜାର ପୃଷ୍ଠାର ଚାର୍ଜସିଟ ଦାଖଲ କରିଥିଲା । ଆଉ ପ୍ରାୟ ୭ବର୍ଷର ନ୍ୟାୟିକ ପ୍ରକ୍ରିୟା ପରେ ଗତ ମେ ୨୯ତାରିଖରେ ଏହାର ଶୁଣାଣି ହୋଇଥିଲା । ପୁଞ୍ଜିଲାଲକୁ ଆଜୀବନ କାରାଦଣ୍ଡାଦେଶ ଶୁଣାଇବା ସହ ବିଭିନ୍ନ ଦଫାରେ ୧ଲକ୍ଷ ୪୦ହଜାର ଟଙ୍କାର ଆର୍ଥିକ ଜରିମାନା ପାଇଁ ଆଦେଶ ଦିଆଯାଇଥିଲା । ଏବେ ସେ ବଲାଙ୍ଗିର ଜେଲରେ ରହିଛି ।
