ନୂଆଦିଲ୍ଲୀ: ଆମ୍ ଆଦମୀ ପାର୍ଟି ନେତା ଏବଂ ଦିଲ୍ଲୀର ପୂର୍ବତନ ମନ୍ତ୍ରୀ ସୌରଭ ଭରଦ୍ୱାଜ ଭାରତୀୟ କ୍ରିକେଟ ଦଳର ଅଧିନାୟକ ସୂର୍ଯ୍ୟକୁମାର ଯାଦବଙ୍କୁ ଚ୍ୟାଲେଞ୍ଜ କରିଛନ୍ତି । ସେ ସୂର୍ଯ୍ୟକୁମାରଙ୍କୁ ଟାର୍ଗେଟ କରିଥିବା ବେଳେ ବିସିସିଆଇ ଉପରେ ମଧ୍ୟ ବର୍ଷିଛନ୍ତି । ବିସିସିଆଇ ଓ ଆଇସିସିକୁ ଚ୍ୟାଲେଞ୍ଜ କରି ସୌରଭ କହିଛନ୍ତ, ବ୍ରଡକାଷ୍ଟ ରାଇଟ୍ରୁ ଆୟ କରିଥିବା ଟଙ୍କା ପହଲଗାମ ଆକ୍ରମଣର ପୀଡ଼ିତା ମହିଳାଙ୍କୁ ଦିଆଯାଉ। ଏହା ପରେ ସେମାନଙ୍କ ପାଇଁ ମ୍ୟାଚ୍ର ବିଜୟ ଡେଡିକେଟ୍ ହୋଇଛି ବୋଲି ଜଣାପଡ଼ିବ ।
ସୌରଭ ଭରଦ୍ୱାଜ କଟାକ୍ଷ କରି କହିଛନ୍ତି, ‘ସୂର୍ଯ୍ୟକୁମାର ଯାଦବ କରମର୍ଦ୍ଦନ ନକରି ୧୪୦ କୋଟି ଦେଶବାସୀଙ୍କ ପ୍ରତି ଏକ ମହାନ ଉପକାର କରିଛନ୍ତି । ମୁଁ ଭାବୁଛି ଯେ, ସେ ଜନ୍ମ ନେଇ ଭାରତ ପାଇଁ ଉପକାର କରିଛନ୍ତି। ସେ (ସୂର୍ଯ୍ୟକୁମାର) ସେମାନଙ୍କଠାରୁ ମଧ୍ୟ ମହାନ ଯାହାଙ୍କ ପୁଅ ସୀମାରେ ପ୍ରାଣବଳି ଦେଇଛନ୍ତି । ଭାରତୀୟ ଜନତା ପାର୍ଟି ତାଙ୍କ ମହାନତାର ଢୋଲ ବଜାଉଛି। ଯଦି ଭାରତ ସରକାର ଚାହିଁବେ, ତେବେ ତାଙ୍କୁ ଭାରତ ରତ୍ନ ଦେଇପାରିବେ।’ ତେବେ ଗତକାଲି ମ୍ୟାଚ ଜିତିବା ପରେ, ଭାରତୀୟ ଖେଳାଳି ପାକିସ୍ତାନୀ ଖେଳାଳିମାନଙ୍କ ସହିତ ହାତ ମିଳାଇ ନଥିଲେ ଏବଂ ଅଧିନାୟକ ସୂର୍ଯ୍ୟକୁମାର ଏହି ବିଜୟକୁ ପହଲଗାମର ସହିଦମାନଙ୍କୁ ଉତ୍ସର୍ଗ କରିଥିଲେ ।
ସୋମବାର (୧୫ ସେପ୍ଟେମ୍ବର) ଆପ ନେତା ସୌରଭ ଭରଦ୍ୱାଜ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ବିରୋଧ ସତ୍ତ୍ୱେ କେନ୍ଦ୍ର ସରକାର ଭାରତ-ପାକିସ୍ତାନ କ୍ରିକେଟ୍ ମ୍ୟାଚ୍ ଆୟୋଜନ କଲେ। ଆମକୁ କୁହାଗଲା ଯେ, ଦୁବାଇର ଛୋଟ ଷ୍ଟାଡିୟମର ସମସ୍ତ ଟିକେଟ୍ ବିକ୍ରି ହୋଇଗଲା। ଟିକେଟ୍ କିଣିବା ପରେ, ଭାରତୀୟମାନଙ୍କର ବିବେକ ଜାଗ୍ରତ ହେଲା ଏବଂ ସେମାନେ ନିଷ୍ପତ୍ତି ନେଲେ ଯେ, ଯଦି ସେମାନେ ଏହି ଭାରତ-ପାକିସ୍ତାନ ମ୍ୟାଚ୍ ଦେଖିବାକୁ ଯିବେ, ତେବେ ସେମାନଙ୍କୁ ସର୍ବଦା ଦେଶଦ୍ରୋହୀ କୁହାଯିବ।
ଆପ ନେତା ଦାବି କରିଛନ୍ତି ଯେ, ବିଜେପି ସମର୍ଥକମାନେ ସୋସିଆଲ ମିଡିଆରେ କେନ୍ଦ୍ର ସରକାରଙ୍କୁ ମଧ୍ୟ ଗାଳି ଦେଉଛନ୍ତି। ଭାରତ ଏବଂ ପାକିସ୍ତାନ ମଧ୍ୟରେ ଏକ ମ୍ୟାଚ ହେଲା କିନ୍ତୁ ଦିଲ୍ଲୀରେ ଏହାର ଉତ୍ସାହ ଦେଖିବାକୁ ମିଳିଲା ନାହିଁ । ଅନେକ କ୍ଲବ୍ ଭିତରେ ମ୍ୟାଚ୍ ଦେଖାଇବାକୁ ଚେଷ୍ଟା କରାଯାଇଥିଲା। ଆମର କର୍ମୀମାନେ ବିଭିନ୍ନ ସ୍ଥାନକୁ ଯାଇଥିଲେ ଏବଂ ମ୍ୟାଚ୍ ନ ଦେଖାଇବାକୁ ଅପିଲ କରିଥିଲେ । ଅଧିକାଂଶ ସ୍ଥାନରେ କ୍ଲବ୍ ମାଲିକ ଏବଂ ରେଷ୍ଟୁରାଣ୍ଟ ମାଲିକମାନେ ଶୁଣିଥିଲେ ଏବଂ ମ୍ୟାଚ୍ ଦେଖାଇ ନଥିଲେ। ଏହା ଏକ ବଡ଼ କଥା ।
