ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଫୋନ୍‌ ଉଠାଉ ନାହାନ୍ତି ପ୍ରଧାନମନ୍ତ୍ରୀ ମୋଦୀ । ଏହି ଖବର ଏକ ଜର୍ମାନୀ ଖବର କାଗଜରେ ପ୍ରକାଶ ପାଇବା ପରେ ସମଗ୍ର ବିଶ୍ବରେ ଚର୍ଚ୍ଚା ଲାଗି ରହିଛି  । ଆଉ ଏବେ ଆମେରିକୀୟ ଗଣମାଧ୍ୟମ ‘ନ୍ୟୁୟର୍କ ଟାଇମ୍ସ’ରେ ପ୍ରକାଶିତ ଏକ ଖବର ପୁଣି ଏହି ଚର୍ଚ୍ଚାକୁ ବଢ଼ାଇ ଦେଇଛି । ଆମେରିକା ରାଷ୍ଟ୍ରପତି ଟ୍ରମ୍ପ ଭାରତ ଉପରେ ୫୦ ପ୍ରତିଶତ ଶୁଳ୍କ ଲାଗୁ କରିବା ପରେ ଦୁଇ ଦେଶ ମଧ୍ୟରେ ସମ୍ପର୍କରେ ତିକ୍ତତା ବୃଦ୍ଧି ପାଇଛି । ଅପରେସନ ସିନ୍ଦୂର ପରେ ଉତ୍ତେଜନା ରୋକିବାକୁ ଭାରତ ଏବଂ ପାକିସ୍ତାନ ମଧ୍ୟରେ ମଧ୍ୟସ୍ଥତା କରିଥିଲେ ବୋଲି ଟ୍ରମ୍ପ ଦାବି କରିଆସିଛନ୍ତି । ହେଲେ ଏହି ଦାବିକୁ ଖଣ୍ଡନ କରିଆସିଛି ଭାରତ । 

ବିଶ୍ବର ବିଭିନ୍ନ ପ୍ରାନ୍ତରେ ଯୁଦ୍ଧବିରାମ କରାଇ ନୋବେଲ ପାଇବାକୁ ଆଶା ରଖିଥିବା ଟ୍ରମ୍ପଙ୍କୁ ଭାରତର ଆଭିମୁଖ୍ୟ ପସନ୍ଦ ଆସିଲା ନାହିଁ ବୋଲି କୁହାଯାଉଛି । ସେପଟେ ପାକିସ୍ତାନ ଟ୍ରମ୍ପଙ୍କୁ ନୋବେଲ ପୁରସ୍କାର ପାଇଁ ନୋମିନେଟ୍‌ କରିଥିଲା । ଆମେରିକା ରାଷ୍ଟ୍ରପତି ଭାରତଠାରୁ ମଧ୍ୟ ଏହା ଆଶା କରୁଥିଲେ, କିନ୍ତୁ ତାହା ହୋଇନଥିଲା । ଦି ନ୍ୟୁୟର୍କ ଟାଇମ୍ସର ରିପୋର୍ଟ ଅନୁଯାୟୀ, ୧୭ ଜୁନ୍ ୨୦୨୫ରେ ଆମେରିକାର ରାଷ୍ଟ୍ରପତି ଟ୍ରମ୍ପ ପ୍ରଧାନମନ୍ତ୍ରୀ ମୋଦୀଙ୍କୁ ଫୋନ୍ କରିଥିଲେ । ଟ୍ରମ୍ପ ଚାହୁଁଥିଲେ ଯେ, ପ୍ରଧାନମନ୍ତ୍ରୀ ମୋଦୀ ତାଙ୍କ ନାମ ନୋବେଲ୍ ପୁରସ୍କାର ପାଇଁ ସୁପାରିଶ କରନ୍ତୁ । ଦୁଇ ନେତା ପ୍ରାୟ ୩୫ ମିନିଟ୍ ଧରି କଥାବାର୍ତ୍ତା ହୋଇଥିଲେ । 

ଟ୍ରମ୍ପଙ୍କ ଏହି ଦାବିରେ ପ୍ରଧାନମନ୍ତ୍ରୀ ମୋଦୀ ରାଗି ଯାଇଥିଲେ । ପ୍ରଧାନମନ୍ତ୍ରୀ ମୋଦୀ ତାଙ୍କୁ ସ୍ପଷ୍ଟ ଭାବରେ କହିଥିଲେ ଯେ, ଭାରତ-ପାକିସ୍ତାନ ଯୁଦ୍ଧବିରତି ସହିତ ଆମେରିକାର କୌଣସି ସମ୍ପର୍କ ନାହିଁ। ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧବିରତି ଲାଗି ସିଧାସଳଖ ଆଲୋଚନା ହୋଇଥିଲା । ରିପୋର୍ଟରେ ଦାବି କରାଯାଇଛି ଯେ, ନୋବେଲ ପୁରସ୍କାର ଲାଗି ତାଙ୍କୁ ନୋମିନେଟ କରିବାକୁ ମୋଦୀ ମନା କରିଦେବାରୁ  ଟ୍ରମ୍ପ ଏଥିରେ ନାରାଜ ହୋଇଯାଇଥିଲେ । ଏସବୁ ଭାରତ ଏବଂ ଆମେରିକା ମଧ୍ୟରେ ଏକ ବାଣିଜ୍ୟ ଚୁକ୍ତି ଉପରେ ଆଲୋଚନା ଚାଲିଥିଲା ବେଳେ ଘଟିଥିଲା ।

 ଜୁନ୍ ମାସରେ ପ୍ରଧାନମନ୍ତ୍ରୀଙ୍କୁ ଫୋନ୍ କରିବାର କିଛି ସପ୍ତାହ ପରେ, ଟ୍ରମ୍ପ୍ ଭାରତ ଉପରେ ୨୫ ପ୍ରତିଶତ ଶୁଳ୍କ ଘୋଷଣା କରିଥିଲେ। କିଛି ଦିନ ପରେ ରୁଷରୁ ତେଲ କିଣିବା ପାଇଁ ଭାରତ ଉପରେ ଅତିରିକ୍ତ ୨୫ ପ୍ରତିଶତ ଶୁଳ୍କ ଲାଗୁ କରାଯାଇଥିଲା । ଫଳରେ ଭାରତ ଉପରେ ମୋଟ ୫୦ ପ୍ରତିଶତ ଶୁଳ୍କ ଲଗାଇଥିଲେ ଟ୍ରମ୍ପ ।   ନୂଆ ରିପୋର୍ଟ ଅନୁସାରେ, ଟ୍ରମ୍ପଙ୍କ ଟିମ୍‌ ପରବର୍ତ୍ତୀ ସମୟରେ ମୋଦୀଙ୍କୁ ଫୋନ୍‌ ଲଗାଇଥିଲେ । କିନ୍ତୁ ଦୁଇ ନେତାଙ୍କ ମଧ୍ୟରେ ଆଲୋଚନା ହୋଇପାରି ନାହିଁ ।

ରିପୋର୍ଟ ଅନୁସାରେ, ମୋଦୀ ଏବଂ ଟ୍ରମ୍ପଙ୍କ ମଧ୍ୟରେ ଶେଷ ଥର ଲାଗି ଫୋନ୍ କଲ୍ ଜୁନ୍ ୧୭ ତାରିଖରେ କାନାଡାରେ ଅନୁଷ୍ଠିତ G7 ଶିଖର ସମ୍ମିଳନୀ ସମୟରେ ହୋଇଥିଲା। ଟ୍ରମ୍ପ ହଠାତ୍ ଶିଖର ସମ୍ମିଳନୀ ଛାଡ଼ି ୱାଶିଂଟନ ଫେରିବା ସମୟରେ ଏୟାର ଫୋର୍ସ ୱାନରୁ ମୋଦୀଙ୍କୁ ଫୋନ୍ କରିଥିଲେ । G7 ଅବସରରେ ଦୁଇ ନେତାଙ୍କ ମଧ୍ୟରେ ଦ୍ୱିପାକ୍ଷିକ ବୈଠକ ବାତିଲ କରାଯାଇଥିଲା । କଲ୍ ସମୟରେ ଟ୍ରମ୍ପ, ମୋଦୀଙ୍କୁ ୱାଶିଂଟନ ଯିବାକୁ ନିମନ୍ତ୍ରଣ କରିଥିଲେ । କିନ୍ତୁ କ୍ରୋଏସିଆ ଗସ୍ତ କାର୍ଯ୍ୟକ୍ରମ ଥିବାରୁ ତାଙ୍କ ଅନୁରୋଧକୁ ପ୍ରତ୍ୟାଖାନ କରିଥିଲେ ମୋଦୀ । ତେବେ ଏହି ସମୟରେ ହିଁ ଟ୍ରମ୍ପ ନୋବେଲ୍‌ ପ୍ରସଙ୍ଗରେ ମୋଦୀଙ୍କ ସହ ଆଲୋଚନା କରିଥିଲେ ବୋଲି ରିପୋର୍ଟରେ ଦାବି କରାଯାଇଛି । ସେପଟେ ଟ୍ରମ୍ପଙ୍କ ଟିମ୍‌ ମୋଦୀଙ୍କୁ କଲ ଲଗାଇବାକୁ ଅନେକ ଥର ଚେଷ୍ଟା କରିଥିଲା ବୋଲି ନ୍ୟୁୟର୍କ ଟାଇମ୍ସ ରିପୋର୍ଟରୁ ଜଣାପଡ଼ିଛି ।