ନୂଆଦିଲ୍ଲୀ,୪।୮:  ଏୟାର ଇଣ୍ଡିଆର ବିମାନ କୌଣସି ନା କୌଣସି କାରଣରୁ ସବୁବେଳେ ଚର୍ଚ୍ଚାରେ ରହିଥାଏ।  କେତେବେଳେ ଯାନ୍ତ୍ରିକ ତ୍ରୁଟି ଯୋଗୁଁ ବିମାନ ବାତିଲ ହେଉଛି ତ  ଆଉ କେତେବେଳେ ଯାତ୍ରୀମାନେ ଯାତ୍ରା ସମୟରେ ଅଦ୍ଭୁତ ଘଟଣା ଦେଖୁଛନ୍ତି। ଏବେ ଏକ ନୂତନ ମାମଲା ସାମ୍ନାକୁ ଆସିଛି, ଯେଉଁଥିରେ ବିମାନ ଭିତରେ ଛୋଟ ଛୋଟ ଅସରପା ଦେଖିବାକୁ ମିଳିଛି। ଆମେରିକାର ସାନ ଫ୍ରାନ୍ସିସ୍କୋରୁ ମୁମ୍ବାଇ ଆସୁଥିବା ଏକ ଏୟାର ଇଣ୍ଡିଆ ବିମାନରେ ଦେଖିବାକୁ ମିଳିଛି ଅସରପା। 

ଏୟାର ଇଣ୍ଡିଆର ବିମାନ AI180 ସାନ ଫ୍ରାନ୍ସିସ୍କୋରୁ କୋଲକାତା ଦେଇ ମୁମ୍ବାଇ ଯାଉଥିଲା। ବିମାନଟି ମୁମ୍ବାଇରେ ପହଞ୍ଚି ନଥିଲାବେଳେ ଦୁଇଜଣ ଯାତ୍ରୀ ବିମାନରେ ଅସରପା ଦେଖିଥିଲେ। ସେମାନେ ତୁରନ୍ତ ଏ ବିଷୟରେ କ୍ୟାବିନ କ୍ରୁଙ୍କୁ ଜଣାଇଥିଲେ, ଯାହା ପରେ ସେମାନଙ୍କୁ ଅନ୍ୟ ଏକ ସିଟରେ ବସାଯାଇଥିଲା। ଏୟାରଲାଇନ୍ସ କମ୍ପାନୀ ବିମାନରେ ଅସରପା ଚଢ଼ିବା ଏବଂ ଯାତ୍ରୀଙ୍କ ଅସୁବିଧା ପାଇଁ ନିଜର ଭୁଲକୁ ସ୍ୱୀକାର କରିଛି। 

ଏୟାର ଇଣ୍ଡିଆ ଏହି ଘଟଣାକୁ ଦୁର୍ଭାଗ୍ୟଜନକ ବୋଲି ଏକ ବିବୃତ୍ତି ଜାରି କରିଛି। କୋଲକାତାରେ ଇନ୍ଧନ ଭର୍ତ୍ତି କରିବା ସମୟରେ ବିମାନଟି ସଫା କରାଯାଇଥିଲା। ଯାତ୍ରୀମାନଙ୍କୁ ସମାନ କ୍ୟାବିନର ଅନ୍ୟ ସିଟରେ ବସାଇବାକୁ ଦିଆଯାଇଥିଲ। ଯେପରି ଯାତ୍ରା ସମୟରେ କୌଣସି ଅସୁବିଧାର ସମ୍ମୁଖୀନ ନ ହୁଅନ୍ତି। ଏୟାର ଇଣ୍ଡିଆ କହିଛି, ଯାତ୍ରୀମାନଙ୍କୁ ହୋଇଥିବା ଅସୁବିଧା ପାଇଁ ଆମେ କ୍ଷମା ପ୍ରାର୍ଥନା କରୁଛୁ। ପ୍ରତିଦିନ ସଫା କରିବା ସତ୍ତ୍ୱେ, କେତେକ ସମୟରେ କୀଟପତଙ୍ଗ ବିମାନ ଭିତରକୁ ପ୍ରବେଶ କରିଯାଆନ୍ତି। ବିମାନ ଭିତରକୁ ଅସରପା କିପରି ପ୍ରବେଶ କଲା? ଏହାର ତଦନ୍ତ କରାଯାଉଛି।