ନୂଆଦିଲ୍ଲୀ, ୨୪/୦୭ : ବଡ଼ ଆତଙ୍କୀ ଯୋଜନା ପଣ୍ଡ। ଅଲକାଏଦାର ୪ ହାର୍ଡକୋର୍ ଆତଙ୍କବାଦୀଙ୍କୁ ଗିରଫ କଲା ଗୁଜରାଟ ଏଟିଏସ୍। ଏମାନଙ୍କ ମଧ୍ୟରୁ ୨ ଜଣଙ୍କୁ ଗୁଜରାଟରୁ ଏବଂ ଅନ୍ୟ ୨ ଜଣଙ୍କୁ ଦିଲ୍ଲୀ ଏବଂ ନୋଏଡାରୁ ଗିରଫ କରାଯାଇଛି। ଗିରଫ ହୋଇଥିବା ଆତଙ୍କବାଦୀ ହେଲେ ମହମ୍ମଦ ଫରଦୀନ, ସୈଫୁଲ୍ଲାହ କୁରୈଶୀ, ଜୀଶାନ ଅଲି ଏବଂ ମହମ୍ମଦ ଫୈକ। ଗୁଜରାଟ ପୁଲିସର ସାଇବର କ୍ରାଇମ୍ ଟିମ୍ ଏନେଇ ତଦନ୍ତ କରୁଛି। ୨୦-୨୫ ବର୍ଷୀୟ ଏହି ଆତଙ୍କୀଙ୍କୁ ଭାରତର ବିଭିନ୍ନ ସ୍ଥାନରେ ଆକ୍ରମଣ କରିବାକୁ ଟାର୍ଗେଟ୍ ମିଳିଥିଲା। ସେ ସମ୍ପର୍କରେ ସବିଶେଷ ତଥ୍ୟ ଜାଣିବାକୁ ଅଭିଯୁକ୍ତଙ୍କ ଚାଟ୍ ଓ ସୋସିଆଲ୍ ମିଡିଆ ପୋଷ୍ଟକୁ ବିଶ୍ଳେଷଣ କରାଯାଉଛି।
ଏଟିଏସ୍ ଡିଆଇଜି ସୁନୀଲ ଜୋଶୀ କହିଛନ୍ତି, ଏମାନେ ଅଲକାଏଦର ସ୍ଵତନ୍ତ୍ର ମିଶନରେ ଥିଲେ। ଭାରତର ବିଭିନ୍ନ ହାଇପ୍ରୋଫାଇଲ୍ ସ୍ଥାନରେ ଆଟାକ୍ କରିବାକୁ ଯୋଜନା କରିଥିଲେ। ଏକ ବଡ଼ ଅଘଟଣ ଘଟାଇବାକୁ ଷଡ଼ଯନ୍ତ୍ର ରଚିଥିଲେ। ଏହି ଆତଙ୍କବାଦୀମାନେ ଏକ ସୋସିଆଲ ମିଡିଆ ଆପ୍ ଜରିଆରେ ପରସ୍ପର ସହ ଲିଙ୍କ୍ରେ ଥିଲେ। ଭାରତରେ ୫ଟି ଇନଷ୍ଟାଗ୍ରାମ ଆକାଉଣ୍ଟ ଜରିଆରେ ଅଲକାଏଦା ବିଚାରଧାରାକୁ ପ୍ରଚାର ପ୍ରସାର କରୁଥିଲେ। ଏହି ଆକାଉଣ୍ଟ ମାଧ୍ୟମରେ ଏକ ବଡ଼ ଟିମ୍ ଗଠନ କରିଥିଲେ। ଧାର୍ମିକ ବିଚାରଧାରା ଆଧାରରେ ଭାରତ ବିରୋଧୀ ଆତଙ୍କ ଘଟାଇବାକୁ ଲୋକଙ୍କୁ ଉସକାଉଥିଲେ। ଏପରିକି ସେମାନଙ୍କ ମଧ୍ୟରେ ହୋଇଥିବା କଥାବାର୍ତ୍ତା ସଂପର୍କରେ ଯେପରି କେହି ସୁରାଗ ନ ପାଇବେ ସେଥିଲାଗି ଅଟୋ-ଡିଲିଟ୍ ଆପ୍ ବ୍ୟବହାର କରୁଥିଲେ। ଏମାନେ ଅପରେସନ ସିନ୍ଦୂର ନେଇ ଭାରତ ବିରୋଧରେ ବିଷ ଓଗାଳିଥିଲେ। ଏନେଇ ଗୁଜରାଟ ଏଟିଏସର ଡେପୁଟି ଏସପି ହର୍ଷ ଉପାଧ୍ୟାୟଙ୍କୁ ଜୁନ ୧୦ରେ ସୂଚନା ମିଳିଥିଲା। ଏଟିଏସ୍ ସୂଚନାରୁ ଆହୁରି ଜଣାପଡ଼ିଛି ଯେ, ଅଭିଯୁକ୍ତଙ୍କର ସୀମାପାର ଆତଙ୍କୀଙ୍କ ସହ ସଂପର୍କ ରହିଛି।
ଏହା ପୂର୍ବରୁ ମିଳିତ ଜାତିସଙ୍ଗ ସୁରକ୍ଷା ପରିଷଦର ଏକ ରିପୋର୍ଟରୁ ଅଲକାଏଦା ଆତଙ୍କୀ ସଙ୍ଗଠନ ନେଇ ବଡ଼ ଖୁଲାସା ହୋଇଛି। ଆତଙ୍କବାଦୀମାନେ ଭାରତର ଜମ୍ମୁ କାଶ୍ମୀର, ବାଙ୍ଗଲାଦେଶ ଏବଂ ମିଆଁମାରରେ ଆତଙ୍କବାଦୀ ଅଭିଯାନ ଚଳାଇବାକୁ ଚେଷ୍ଟା କରୁଛନ୍ତି। ଏଥିପାଇଁ ଅଲକାଏଦା ଏକ୍ୟୁଆଇଏସ୍ ନାମରେ ନୂଆ ସଙ୍ଗଠନ ତିଆରି କରିଛି। ଏହି ସଙ୍ଗଠନରେ ଅଲକାଏଦାର ପ୍ରାୟ ୨୦୦ ଆତଙ୍କୀ ସକ୍ରିୟ ଅଛନ୍ତି। ଓସମା ମହମ୍ମୁଦ ସେମାନଙ୍କର ମୁଖ୍ୟ।
