କଟକ, ୨୩/୧୧ : କଟକ ମଧୁପାଟଣା ଅଞ୍ଚଳରୁ ବାଂଲାଦେଶୀ ନାବାଳିକା ଉଦ୍ଧାର ହେବା ଘଟଣା। ନାବାଳିକାଙ୍କ ସ୍ଵାସ୍ଥ୍ୟାବସ୍ଥା ଯାଞ୍ଚ କରାଯାଇଛି। ତାଙ୍କର ସ୍ଵାସ୍ଥ୍ୟାବସ୍ଥା ସ୍ଥିର ରହିଛି। ସେ କଟକର ବସୁନ୍ଧରାରେ ରହୁଛନ୍ତି। ବାଙ୍ଗଲାଦେଶ ଦୂତାବାସ ସହ ଯୋଗାଯୋଗ କରିବା ଲାଗି ଜିଲ୍ଲାପାଳଙ୍କୁ ସିଡବ୍ଲ୍ୟୁସି ଜଣାଇଛି। ଏହି ଘଟଣାରେ ଅଧିକ ତଦନ୍ତ କରିବା ଲାଗି ଶିଶୁ ମଙ୍ଗଳ ସମିତି ପକ୍ଷରୁ ନିର୍ଦ୍ଦେଶ ଦିଆଯାଇଛି। ନାବାଳିକାଙ୍କୁ ହସ୍ତାନ୍ତର ପାଇଁ ପଦକ୍ଷେପ ନିଆଯାଉଛି। ଶିଶୁ ମଙ୍ଗଳ ସମିତି ଅଧ୍ୟକ୍ଷ ପ୍ରମୋଦ ଆଚାର୍ଯ୍ୟ ଏହି ସୂଚନା ଦେଇଛନ୍ତି।
ସୂଚନାନୁଯାୟୀ, ବାଂଲାଦେଶୀ ନାବାଳିକା ବୟସ ପାଖାପାଖି ୧୭ ବର୍ଷ ହେବ। ସେ ରୋଜଗାର ପାଇଁ ଭିଟାମାଟି ଛାଡ଼ିଥିଲେ। ଫେସବୁକ୍ ଜରିଆରେ ଜଣେ ଯୁବକଙ୍କ ସହ ପରିଚିତ ହେବା ପରେ ଭାରତ ଆସିଥିଲେ। ପ୍ରଥମେ ତାଙ୍କୁ କୋଲକତା ପରେ ଭୁବନେଶ୍ୱରରେ ରହିବାକୁ ପଡିଥିଲା। ରୋଜଗାର ଲାଗି କିଛି ଯୁବକ ତାଙ୍କୁ ଏକ ମସାଜ୍ ସେଣ୍ଟରରେ ଅବସ୍ଥାପିତ କରିଥିଲେ। ସେ କଟକ ଉପକଣ୍ଠ ଗୋପାଳପୁର ଠାରେ ରହୁଥିଲେ। ତେବେ ସେ କାହିଁକି ଗୋପାଳପୁର ଛାଡିଲେ, ତାହା ଏବେବି ଅସ୍ପଷ୍ଟ ରହିଛି। ନାବାଳିକାଙ୍କୁ କୌଣସି ଅନୈତିକ କାର୍ଯ୍ୟ ପାଇଁ ବାଧ୍ୟ କରାଯାଇଥିବା ନେଇ ସନ୍ଦେହ କରାଯାଉଛି।
ନାବାଳିକା ଜଣଙ୍କ ବାଙ୍ଗଲାଦେଶର ହୋଇଥିବାରୁ ପୋଲିସ ଏବଂ ପ୍ରଶାସନ ଖୁବ୍ ସତର୍କତାର ସହ ତଦନ୍ତ କରୁଛି। ସମୃକ୍ତ ନାବାଳିକାଙ୍କ ସହ ପ୍ରାୟ ୫ ଜଣ ବାଙ୍ଗଲାଦେଶୀ ଯୁବତୀ ସୀମା ପାର ହୋଇ ଭାରତ ଆସିଥିବା ସୂଚନା ମିଳିଛି। ଅନ୍ୟ ଯୁବତୀମାନଙ୍କୁ କୌଣସି ଅନୈତିକ କାର୍ଯ୍ୟରେ ନିୟୋଜିତ କରାଯାଇଥିବା ନେଇ ସନ୍ଦେହ ଉପୁଜିଛି। ତେବେ ଉକ୍ତ ଯୁବତୀମାନଙ୍କୁ କିଏ ଆଣିଲା, କେଉଁ ପରିସ୍ଥିତିରେ ସେମାନେ କଟକରେ ପହଞ୍ଚିଲେ ସେନେଇ ଅଧିକ ତଦନ୍ତ କରାଯାଉଛି। ଏହି ଘଟଣା ସାମ୍ନାକୁ ଆସିବା ପରେ ରାଜ୍ୟରେ ଏବେ ଯୁବତୀ ଚାଲାଣକାରୀ ରାକେଟ୍ ସକ୍ରିୟ ଥିବା ଅନୁମାନ କରାଯାଉଛି।
