ନୂଆଦିଲ୍ଲୀ: ବିହାରର ମୁଜାଫରପୁରରେ ଜଣେ ନାବାଳିକାକୁ ବଳାତ୍କାର ଏବଂ ହତ୍ୟା ଘଟଣାକୁ ନେଇ ତୀବ୍ର ଉତ୍ତେଜନା ପ୍ରକାଶ ପାଇଛି। ଜାତୀୟ ମହିଳା କମିଶନ ଏହି ଘଟଣାର ତଦନ୍ତ କରିଛି ଏବଂ କଂଗ୍ରେସ ମଧ୍ୟ ପ୍ରତିବାଦ କରିଛି। ଗତ ସପ୍ତାହରେ ବଳାତ୍କାରର ଶିକାର ହୋଇଥିବା ଏହି ଝିଅଟି ରବିବାର ଏକ ସରକାରୀ ହସ୍ପିଟାଲରେ ମୃତ୍ୟୁବରଣ କରିଛି।

ନଅ ବର୍ଷ ବୟସ୍କା ପୀଡିତାଙ୍କ ପରିବାର ହସ୍ପିଟାଲ ଉପରେ ଅବହେଳା ଅଭିଯୋଗ କରିଛନ୍ତି । ଜାତୀୟ ମହିଳା କମିଶନ (NCW) ସୋମବାର ଏହି ମାମଲାର ବିଚାର କରିଛି ଏବଂ ଝିଅର ମୃତ୍ୟୁ ପାଇଁ "ଘୋର ଅବହେଳା ଏବଂ ବ୍ୟବସ୍ଥାଗତ ବିଫଳତା"କୁ ନିନ୍ଦା କରିଛି।

ଜାତୀୟ ମହିଳା କମିଶନ (NCW) ଅଧ୍ୟକ୍ଷା ବିଜୟା ରାହତକର ପୀଡିତାଙ୍କ ମୃତ୍ୟୁ ପାଇଁ ଅବହେଳାକୁ ନିନ୍ଦା କରିଛନ୍ତି । କାରଣ କମିଶନ ଏହି ମାମଲାକୁ ଗମ୍ଭୀରତାର ସହ ନେଇଛନ୍ତି । NCW ମୁଖ୍ୟ ସଚିବ ଏବଂ ବିହାର ଡିଜିପିଙ୍କୁ ପୀଡିତାଙ୍କ ମୃତ୍ୟୁର ସମ୍ପୂର୍ଣ୍ଣ ଏବଂ ନିରପେକ୍ଷ ତଦନ୍ତ କରିବାକୁ ଆହ୍ୱାନ କରିଛି।

ଏନେଇ ନବିହାର ପୋଲିସ କହିଛି ଯେ, ଦ୍ରୁତ ବିଚାର ପାଇଁ ଆସନ୍ତା ୧୫ ଦିନ ମଧ୍ୟରେ ଚାର୍ଜସିଟ୍ ଦାଖଲ କରାଯିବ। ସମସ୍ତ ନମୁନା ସଂଗ୍ରହ କରାଯାଇଛି । ପୋଷାକରୁ ମଧ୍ୟ ନମୁନା ସଂଗ୍ରହ କରାଯାଇଛି । ଏହା ବ୍ୟତୀତ, ଆମେ ୧୫ ଦିନ ମଧ୍ୟରେ ଏକ ଚାର୍ଜସିଟ୍ ଦାଖଲ କରିବୁ ବୋଲି କହିଛି । ବିହାର ଏସପି କହିଛନ୍ତି ଯେ, ଏହାକୁ ଏକ ଦ୍ରୁତ ବିଚାର ଅଧୀନରେ ଅଣାଯିବ, ଯାହା ଦ୍ୱାରା ଆମେ ଆବଶ୍ୟକୀୟ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବୁ ।

ସେପଟେ ରାଜ୍ୟରେ ବିଧାନସଭା ନିର୍ବାଚନ ପୂର୍ବରୁ ଦଳିତ ଯୁବତୀଙ୍କ ବଳାତ୍କାର ଏବଂ ହତ୍ୟା ଘଟଣାକୁ ନେଇ କଂଗ୍ରେସ ରାଜ୍ୟ ସରକାରଙ୍କୁ ଘେରିଛି । ନୀତିଶ କୁମାର ସରକାରଙ୍କୁ ନିନ୍ଦା କରି କଂଗ୍ରେସ ମୁଜାଫରପୁରରେ ଏକ ପ୍ରତିବାଦ ପ୍ରଦର୍ଶନ କରିଛି। କଂଗ୍ରେସ ନେତା ତଥା ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ ମଧ୍ୟ ଘଟଣାକୁ ନିନ୍ଦା କରିଛନ୍ତି । ଏନେଇ ସେ X ରେ କହିଛନ୍ତି ଯେ, ମୁଜାଫରପୁରରେ ଜଣେ ନାବାଳିକା ଦଳିତ ଝିଅ ପ୍ରତି ହୋଇଥିବା ନିର୍ଯାତନା ଏବଂ ପରବର୍ତ୍ତୀ ସମୟରେ ତାଙ୍କ ଚିକିତ୍ସାରେ ଅବହେଳା ଅତ୍ୟନ୍ତ ଲଜ୍ଜାଜନକ। ଯଦି ତାଙ୍କୁ ଉଚିତ୍ ସମୟରେ ଚିକିତ୍ସା ମିଳିଥାନ୍ତା, ତେବେ ତାଙ୍କ ଜୀବନ ରକ୍ଷା ହୋଇପାରିଥାନ୍ତା। କିନ୍ତୁ ଡବଲ-ଇଞ୍ଜିନ୍ ସରକାର କେବଳ ସୁରକ୍ଷା ଯୋଗାଇବାରେ ନୁହେଁ ବରଂ ତାଙ୍କ ଜୀବନ ରକ୍ଷା କରିବାରେ ମଧ୍ୟ ଅବହେଳା କରିଥିଲେ ।